Яратылыш 11 - Изге Язма

Бабил манарасы

¹ Башлангычта бөтен кешеләр бер телдә, бер шивәдә сөйләшәләр иде.

² Алар, көнчыгыштан хәрәкәт итеп, Шинар үзәнлегендә үзләренә урын табып, шунда җирләштеләр.

³ Бер-берләренә: – Әйдәгез, кирпеч сугып, утта яндырыйк! – диделәр. Таш урынына – кирпеч, известь урынына җир сумаласы куллана башладылар.

⁴ Соңра әйттеләр: – Җир йөзе буйлап сибелеп бетмик һәм исемебезне данга күмик дисәк, үзебезгә бер шәһәр төзеп, башы күкләргә тиярдәй биек манара торгызыйк! – диделәр.

⁵ Раббы, адәм балалары төзи башлаган шәһәрне һәм манараны күрү өчен, күктән иңде

⁶ һәм болай диде: – Менә, болар барысы да бер телдә сөйләшүчеләр, бер кавем кешеләре, әнә нәрсә эшли башлаганнар. Инде болар уйлаган эшләреннән кире кайтмаячак.

⁷ Шуңа күрә, түбән иңеп, телләрен буташтырыйк, сөйләшкәндә, берсе-берсен аңламас булсыннар.

⁸ Шулай дип, Раббы адәм балаларын җир йөзе буйлап чәчте, алар бу шәһәрне төзүдән туктадылар.

⁹ Шунлыктан шәһәр Бабил дип аталды. Чөнки Раббы адәм балаларының сөйләмә телен шунда буташтырды, аларны шуннан торып җир йөзе буйлап чәчте.

Шемның нәсел шәҗәрәсе

¹⁰ Шемның нәсел шәҗәрәсе түбәндәгечә. Туфаннан соң ике ел узгач, йөз яшендәге Шемның Әрпәхшәд исемле углы туды.

¹¹ Әрпәхшәд туганнан соң, Шем тагын биш йөз ел яшәде. Башка угыллары, кызлары булды.

¹² Әрпәхшәдкә утыз биш яшь булганда, углы Шелах туды.

¹³ Шелах туганнан соң, Әрпәхшәд тагын дүрт йөз дә өч ел яшәде. Башка угыллары, кызлары булды.

¹⁴ Шелахка утыз яшь булганда, углы Гыйбер туды.

¹⁵ Гыйбер туганнан соң, Шелах тагын дүрт йөз дә өч ел яшәде. Башка угыллары, кызлары булды.

¹⁶ Гыйберга утыз дүрт яшь булганда, углы Пелег туды.

¹⁷ Пелег туганнан соң, Гыйбер тагын дүрт йөз дә утыз ел яшәде. Башка угыллары, кызлары булды.

¹⁸ Пелегка утыз яшь булганда, углы Регу туды.

¹⁹ Регу туганнан соң, Пелег тагын ике йөз дә тугыз ел яшәде. Башка угыллары, кызлары булды.

²⁰ Регуга утыз ике яшь булганда, углы Серуг туды.

²¹ Серуг туганнан соң, Регу тагын ике йөз дә җиде ел яшәде. Башка угыллары, кызлары булды.

²² Серугка утыз яшь булганда, углы Нахор туды.

²³ Нахор туганнан соң, Серуг тагын ике йөз ел яшәде. Башка угыллары, кызлары булды.

²⁴ Нахорга егерме тугыз яшь булганда, углы Терах туды.

²⁵ Терах туганнан соң, Нахор тагын йөз дә унтугыз ел яшәде. Башка угыллары, кызлары булды.

²⁶ Терахка җитмеш яшь тулганнан соң, аның Ибрам, Нахор һәм Һаран исемле угыллары туды.

Терахның нәсел шәҗәрәсе

²⁷ Терахның нәсел шәҗәрәсе: Терах – Ибрамның, Нахорның һәм Һаранның атасы иде. Һаранның Лут исемле бер углы булды.

²⁸ Һаран, атасы Терах исән чакта ук, туган җирендә – килданиләрнең Ур шәһәрендә вафат булды.

²⁹ Ибрам белән Нахор исә өйләнеп яшәделәр. Ибрам хатынының исеме Сарая, Нахор хатыныныкы Милкә иде. Милкәнең һәм Искәнең атасы – Һаран иде.

³⁰ Сарая, кысыр калып, бала тапмады.

³¹ Терах, үзенең углы Ибрамны, оныгы Лутны (Һаранның углын) һәм киленен – Ибрам хатыны Сараяны ияртеп, Кәнган җиренә күчеп китү нияте белән килданиләр шәһәре Урдан юлга чыкты. Әмма Харанга җиткәч, тукталып, алар шунда торып калдылар.

³² Терах, барлыгы ике йөз дә биш ел яшәп, Харан шәһәрендә вафат булды.