Яратылыш 10 - Изге Язма

Нух угылларының нәсел шәҗәрәсе

¹ Нух угыллары Шем, Хам вә Яфетның нәсел шәҗәрәләре түбәндәгечә. Туфаннан соң аларның үз угыллары туды.

² Яфетның угыллары: Гомәр, Магог, Мадай, Яван, Түбәл, Мешех һәм Тирас.

³ Гомәрнең угыллары: Ашкеназ, Рифат һәм Түгәрмә.

⁴ Яванның угыл-нәселләре: Элиша, Таршиш һәм киттиләр белән доданиләр.

⁵ Болар – үз телләрендә сөйләшеп, кабилә-кабилә булып, диңгез ярында үз җирләрендә яшәгән Яфет балаларыдыр.

⁶ Хамның угыллары: Күш, Мисраим, Пут һәм Кәнган.

⁷ Күшнең угыллары: Себа, Хавилә, Сабта, Рагма һәм Сабтеха. Рагманың угыллары: Шеба һәм Дедан.

⁸ Күшнең Нәмруд исемле бер углы булды. Нәмруд җир йөзендә батырлыгы белән дан алды.

⁹ Раббы хозурында ул кыю бер аучы иде. «Раббы хозурындагы Нәмруд кеби кыю аучы» дигән сүзләр шуннан килә.

¹⁰ Әүвәлендә аның патшалыгы Шинар җирләрендәге Бабил, Әрех, Аккад һәм Кәлне шәһәрләрен үз эченә ала иде.

^11-12 Соңра, патшалыгы Ашшурга таба киңәеп, ул Ниневә, Рехобот-ир, Кәләх калаларын һәм Ниневә белән Кәләх арасында Ресен каласын төзеде. Ул бөек шәһәр иде.

¹³ Мисраим – луди, ганәми, ләһаби, нәфтухи,

¹⁴ патруси, кәслухи (пелештиләр шулардан чыккан) һәм кәфтуриләрнең нәселбашы булды.

^15-18 Кәнганнан туган беренче угыл Сидун булды, аннары – Хит. Ул шулай ук явүси, амори, гиргәши, хивви, аркый, сини, әрвади, семари һәм хаматиләрнең нәсел атасы булды. Бу ыруг-кабиләләр соңыннан төрлесе-төрле якта таралышып яшәделәр.

¹⁹ Кәнганиләр яшәгән җирләрнең чикләре Сидуннан Герар аша Газага кадәр, аннан Сәдүм, Гамура, Адма һәм Сәбоим аша Лашага кадәр сузылган иде.

²⁰ Болар – үз телләрендә сөйләшеп, үз җирләрендә кабилә-кабилә булып яшәгән Хам балаларыдыр.

²¹ Яфетның өлкән абыйсы Шемның да угыллары булды. Шем – бөтен Гыйбер угыллары нәселенең атасы иде.

²² Шемның угыллары: Элам, Ашшур, Әрпәхшәд, Луд, Арам.

²³ Арамның угыллары: Утс, Хул, Гетер һәм Маш.

²⁴ Әрпәхшәднең Шелах исемле бер углы булды. Шелахтан Гыйбер туды.

²⁵ Гыйберның ике углы булды. Берсенең исеме Пелег иде. Чөнки Пелег яшәгән заманда җир йөзе бүленеп бетте. Пелегның кардәше Йоктан исемле иде.

²⁶ Йоктаннан Алмодад, Шелеф, Хатсармавет, Ярах,

²⁷ Һадорам, Узал, Дыйкла,

²⁸ Обал, Абимаил, Шеба,

²⁹ Офир, Хавилә һәм Йовав тудылар. Боларның һәммәсе – Йоктан угылларыдыр.

³⁰ Аларның тереклек иткән җирләре Мешадан көн чыгышы тарафында – Сефар тауларына кадәр сузылган мәйданны биләп тора иде.

³¹ Болар – үз телләрендә сөйләшеп, үз җирләрендә кабилә-кабилә булып яшәгән Шем угылларыдыр.

³² Туфаннан соң Нух угыллары нәселеннән чыккан һәм кавем-кабилә булып җир йөзенә сибелгән халыкларның нәсел шәҗәрәсе шушыдыр.