Саннар 34 - Изге Язма

Кәнган җире чикләре

¹ Раббы Мусага әйтте:

² – Исраилиләргә шулай дип боер: «Кәнган җиренә кергәч, Мин сезгә бирәчәк ул җирнең чикләре түбәндәгечә булыр.

³ Көньяк тарафта сезнең җирләр Сыйн чүленнән, Эдом чикләреннән башланыр. Көньяк чигегез, Тозлы диңгез ярыннан башланып,

⁴ көньякка – Акраббим үткеленә таба дәвам итәр, аннары, Сыйн чүле аша узып, Кадыш-Барнианың көньягына чыгар. Шуннан ары Хатсар-Аддарга юнәлер һәм, Асмунга җитеп,

⁵ Мисыр чигендәге елгага таба борылыр да Урта диңгез буенда тәмамланыр.

⁶ Ә көнбатыш чикләрегез Бөек диңгез яры буйлап узар. Бу – сезнең көнбатыш чигегез.

⁷ Төньяк чигегез, Бөек диңгездән башланып, Һор тавына җитәр.

⁸ Һор тавыннан чик Хамат үткеленә таба китәр һәм, Седадтан үтеп,

⁹ Зифронга кадәр дәвам итәр дә Хатсар-Энанга җитеп туктар. Бу – сезнең төньяк тарафтагы чигегез.

¹⁰ Көнчыгыш чигегез, Хатсар-Энаннан башланып, Шефамга җитәр.

¹¹ Шефамнан чик Аинның көнчыгыш ягындагы Риблага таба сузылыр һәм аннан Киннерет күленең көнчыгыш ярындагы сөзәклекләр буенча дәвам итәр.

¹² Шуннан соң чик сызыгы Үрдүн елгасы буйлап төшәр дә Үле диңгезгә җитеп туктар. Һәр тарафта чикләре билгеләнгән менә бу җирләр – сезнекедер».

¹³ Шуннан соң Муса исраилиләргә болай дип боерды: – Тугыз ыругка һәм унынчы ыругның яртысына бирергә дип Раббы әмер иткән һәм сез, шобага салып, биләмәгә аласы җирләр менә шушыдыр.

¹⁴ Рубин ыругы, Гәд ыругы һәм Менашше ыругының бер яртысы үз биләмәләрен гаиләләре санынча алды инде.

¹⁵ Шушы ыруглар биләмә җирләрен Әрихә каршыннан, Үрдүннең көнчыгыш ярыннан алдылар.

Җир бүлүчеләр

¹⁶ Раббы Мусага әйтте:

¹⁷ – Җирне сезгә рухани Элгазар белән Нун углы Ешуа бүлеп бирәчәк.

¹⁸ Җирне бүлү өчен, һәр ыругтан берәр җитәкче дә алыгыз.

¹⁹ Менә аларның исемнәре: Яһүдә ыругыннан – Ифунни углы Кәлеб;

²⁰ Шимун ыругыннан – Аммиһуд углы Шемуил;

²¹ Беньямин ыругыннан – Кислон углы Элидад;

²² Дан ыругыннан – Йөгли углы Вуккый;

²³ Йосыф углы Менашше ыругыннан – Ифод углы Ханниел;

²⁴ Эфраим ыругыннан – Шифтан углы Кымуил;

²⁵ Зәбулун ыругыннан – Парнах углы Элисапан;

²⁶ Исәсхәр ыругыннан – Аззан углы Палтиел;

²⁷ Ашер ыругыннан – Шеломи углы Ахиһуд;

²⁸ Нәптали ыругыннан – Аммиһуд углы Педаһел.

²⁹ Кәнганда исраилиләргә җирне бүлеп бирү өчен Раббы билгеләгән кешеләр әнә шулар.