Саннар 13 - Изге Язма

Мусаның Кәнган җиренә күзәтчеләр җибәрүе

¹ Аннары халык, Хасероттан кузгалып, Паран чүленә җитте һәм шунда чатырларын корып урнашты.

² Раббы Мусага әйтте:

³ – Исраилиләргә Мин бирәсе Кәнган җирләрен карап кайтыр өчен, кешеләр җибәр – һәр ыругтан берәр җитәкче барсын.

⁴ Муса, шулай итеп, Раббы күрсәтмәсе буенча, шул кешеләрне Паран чүленнән Кәнганга җибәрде. Исраилиләрнең җитәкчеләре булган әлеге кешеләрнең

⁵ исемнәре түбәндәгечә: Рубин ыругыннан – Зәкүр углы Шаммуа;

⁶ Шимун ыругыннан – Хори углы Шафат;

⁷ Яһүдә ыругыннан – Ифунни углы Кәлеб;

⁸ Исәсхәр ыругыннан – Йосыф углы Игәл;

⁹ Эфраим ыругыннан – Нун углы Һошея;

¹⁰ Беньямин ыругыннан – Рафу углы Палти;

¹¹ Зәбулун ыругыннан – Соди углы Гәддиел;

¹² Йосыф углы Менашше ыругыннан – Суси углы Гәдди;

¹³ Дан ыругыннан – Гемалли углы Аммиел;

¹⁴ Ашер ыругыннан – Микәил углы Сетур;

¹⁵ Нәптали ыругыннан – Вуфси углы Нахби;

¹⁶ Гәд ыругыннан – Махи углы Гәвел.

¹⁷ Кәнган җирен карап кайтыр өчен, Муса җибәргән кешеләр әнә шулар. (Нун углы Һошеягә Муса яңа исем бирде – аны Ешуа дип атады.)

¹⁸ Кәнган җирен карарга җибәргәндә, Муса аларга әйтте: – Нәгеб чүле аша шушы таулы илгә барыгыз.

¹⁹ Аның нинди җир икәнен, анда нинди халык яшәвен, аның көчлеме яки көчсезме, зурмы яки кечкенәме булуын карагыз.

²⁰ Ул халык яши торган җир нинди – яхшымы яисә начармы? Яши торган шәһәрләре нинди? Алар чатырларда яшиме яисә ныгытмалардамы?

²¹ Ул җирнең туфрагы нинди – уңдырышлымы яки уңдырышсызмы? Анда агачлар үсәме, юкмы? Кыю булыгыз һәм ул җирнең җимешләрен алып кайтыгыз. (Бу – йөзем өлгергән вакыт иде.)

²² Шуннан алар китеп бардылар һәм, Сыйн чүленнән башлап, Лебо-Хамат янындагы Рәхуб шәһәренә кадәр җиткәнче, бөтен җирне карап-тикшереп чыктылар.

²³ Аннары, Нәгеб чүлен үтеп, Анак угыллары Ахиман, Шешай һәм Талмай яшәгән Хебрунга барып җиттеләр. (Хебрун Мисырдагы Соган шәһәреннән җиде ел элегрәк төзелгән булган.)

²⁴ Аннары Эшкүл үзәнлегенә төштеләр һәм анда ботагы белән бергә бер тәлгәш йөзем өзеп алдылар, аны, колгага беркетеп, ике кеше күтәреп барды. Шулай ук анар һәм инҗир җимешләре дә өзеп алдылар.

²⁵ Йөзем тәлгәше өзеп алган урынны исраилиләр Эшкүл үзәне дип атадылар.

²⁶ Әлеге җирләрне үз күзләре белән күргән исраилиләр кырык көннән соң кире кайттылар.

Күзәтчеләрнең хисабы

²⁷ Паран чүлендәге Кадышка – Муса, Һарун һәм Исраил халкы янына әйләнеп кайткач, күзәтчеләр бөтен күргән-белгәннәрен аларга сөйләп бирделәр, шул җирдән алып кайткан җимешләрне күрсәттеләр.

²⁸ Алар Мусага: – Син җибәргән якларда булдык без, – диделәр. – Ул җирдә чынлап та сөт вә бал ага икән, менә ул җирнең җимешләре.

²⁹ Әмма ул җирдә яшәүче халык көчле, шәһәрләре ныгытылган һәм бик зур; без анда Анак угылларын да күрдек.

³⁰ Амалыкыйлар – Нәгебтә, хиттиләр, явүсиләр һәм амориләр – таулы илдә, ә кәнганиләр исә диңгез буйларында һәм Үрдүн елгасы тирәсендә яши.

³¹ Мусаны әйләндереп алган халыкны тынычландырмакчы булып, Кәлеб: – Әйдәгез, һөҗүм итеп, ул җирне басып алыйк, бездә көч җитәрлек бит! – диде.

³² Әмма аның белән бергә барганнар: – Без ул халыкка һөҗүм итә алмыйбыз, чөнки алар бездән көчлерәк, – диделәр

³³ һәм үзләре карап кайткан җир турында исраилиләр арасында яман хәбәр тарата башладылар: «Без карап кайткан ул җир үзендә яшәүчеләрне йота икән, һәм анда яшәүчеләрнең барысы да зур гәүдәлеләр.

³⁴ Без анда әзмәвердәй кешеләр күрдек (Анак угыллары әзмәверләр токымыннан иде). Алар янында без чикерткәләр кебек кенә идек. Алар да безне шундый итеп күрделәр».