Саннар 10 - Изге Язма

Көмеш быргылар турында

¹ Раббы Мусага әйтте:

² – Халыкны бергә җыю һәм юлга кузгалу өчен, ике көмеш быргы чүкеп ясат.

³ Быргылар кычкырткан вакытта, бөтен халык синең янга – Очрашу чатыры алдына җыелыр.

⁴ Бер генә быргы кычкыртса, синең янга җитәкчеләр, ягъни Исраилнең гаскәрбашлары җыелыр.

⁵ Быргылар хәвефле аваз салуга, көнчыгыш тарафта стан булып урнашкан ыруглар кузгалып китәр.

⁶ Кузгалу турында икенче мәртәбә кычкыртканда, көньяк тарафта урнашкан ыруглар кузгалып китәр. Юлга кузгалу турында быргыларның хәвефле авазы хәбәр итәр.

⁷ Җыелыш җыярга кирәк булганда, быргы кычкыртыгыз, ләкин аның тавышы хәвефле булмасын.

⁸ Быргыларны Һарун угыллары, ягъни руханилар кычкыртырга тиеш. Бу сезнең өчен нәселдән нәселгә күчеп килә торган мәңгелек кагыйдә.

⁹ Сезгә һөҗүм итүче дошманга каршы үз җирегездә сугышка чыкканда, кузгалу турында быргылар кычкыртыгыз. Шул чакта сез Раббы Аллагыз тарафыннан искә алынырсыз һәм дошманнарыгыздан котылып калырсыз.

¹⁰ Шатлыклы көннәрегездә һәм билгеләнгән бәйрәмнәрегездә, яңа ай туган көннәрдә, тулаем яндыру һәм татулык корбаннарыгызны тәкъдим иткәндә, быргылар уйнатыгыз – үзегез турында Аллаһының исенә төшерү булыр. Мин – Раббы, сезнең Аллагыз.

Исраилиләрнең Синай чүленнән китүе

¹¹ Икенче елның икенче аенда, айның егерменче көнендә Шаһитлык чатыры өстеннән болыт күтәрелде,

¹² һәм исраилиләр, Синай чүленнән кузгалып китеп, бер урыннан икенче урынга күчә-күчә, юлларын дәвам иттеләр. Ниһаять, болыт Паран чүленә җитеп туктап калды.

¹³ Раббының Муса аша биргән әмере нигезендә, беренче тапкыр юлга чыгулары иде бу.

¹⁴ Беренче булып төркемнәргә бүленгән Яһүдә ыругы үзенең байрагы астында кузгалып китте. Яһүдә ыругының гаскәрбашы Амминадаб углы Нахшон иде.

¹⁵ Исәсхәр ыругының гаскәрбашы Суар углы Нетанел иде.

¹⁶ Зәбулун ыругының гаскәрбашы Хелон углы Элиаб иде.

¹⁷ Изге чатыр сүтеп алынганнан соң, Гершон һәм Мерари угыллары, чатырны күтәреп, юлга чыктылар.

¹⁸ Аннары төркемнәргә бүленгән Рубин ыругы үзенең байрагы астында кузгалып китте. Рубин ыругының гаскәрбашы Шедур углы Элисур иде.

¹⁹ Шимун ыругының гаскәрбашы Суришаддай углы Шелумиел иде.

²⁰ Гәд ыругының гаскәрбашы Дегуил углы Эльясаф иде.

²¹ Алардан соң, изге әйберләрне күтәреп, Коһат токымы юлга чыкты. Алар яңа урынга килеп җиткәндә, Изге чатыр инде корылган булырга тиеш иде.

²² Аннан соң төркемнәргә бүленгән Эфраим ыругы үзенең байрагы астында кузгалып китте. Эфраим ыругының гаскәрбашы Аммиһуд углы Элишама иде.

²³ Менашше ыругының гаскәрбашы Педаһсур углы Гәмәлиил иде.

²⁴ Беньямин ыругының гаскәрбашы Гидеони углы Абидан иде.

²⁵ Иң ахырдан төркемнәргә бүленгән Дан ыругы үзенең байрагы астында кузгалып китте. Дан ыругының гаскәрбашы Аммишаддай углы Ахигызыр иде.

²⁶ Ашер ыругының гаскәрбашы Өхрән углы Пагиел иде.

²⁷ Нәптали ыругының гаскәрбашы Энан углы Ахира иде.

²⁸ Төркемнәргә бүленгән исраилиләрнең юлга чыгу тәртибе әнә шундый иде.

²⁹ Муса үзенең кайнатасына – мидьяни Регуил углы Хобабка: – Раббыбыз: «Сезгә бирермен», – дип вәгъдә иткән җирләргә барырга чыгабыз; син дә безнең белән бар, сиңа мөнәсәбәт яхшы булыр; Раббы Исраилгә күп яхшылыклар вәгъдә итә, – диде.

³⁰ Әмма Хобаб аңа әйтте: – Бармыйм мин, үз җиремә, туган халкым янына кайтам.

³¹ Муса исә аңа: – Ташлап китмә безне, син бит чүлдә чатырларны кайда корырга кирәклеген беләсең, безгә күз-колак булырсың.

³² Безнең белән бергә барсаң, Раббының безгә күрсәтәчәк барлык яхшылыкларын синең белән бүлешербез, – диде.

³³ Исраилиләр, Раббы тавыннан китеп, өч көн буе юлда булдылар, һәм шул өч көн дәвамында, аларга ял итәр урынны күрсәтер өчен, Раббының Килешү сандыгы алар алдыннан барды.

³⁴ Туктаган урыннарыннан кузгалып киткән вакытта, Раббының болыты көндез алар өстендә булды.

³⁵ Аллаһы сандыгы юлга чыккан саен, Муса: «Әй Раббы, күтәрел! Дошманнарың таралып бетсен, Сине өнәмәүчеләр алдыңнан качып китсен!» – дип әйтә иде.

³⁶ Аллаһы сандыгы туктаган саен, ул: «Әй Раббы, меңнәрчә һәм меңнәрчә Исраил халкы янына кире кайт!» – дип әйтә иде.