Саннар 1 - Изге Язма

Исраилиләрнең санын исәпкә алу

¹ Исраилиләрнең Мисырдан чыгуларына икенче ел китеп, елның икенче аенда, айның беренче көнендә Синай чүлендә корылган Очрашу чатырында Раббы Мусага түбәндәгеләрне әйтте:

^2-3 – Һарун белән икегез бөтен Исраил халкын кабиләләре вә гаиләләре буенча санап чыгыгыз. Сугышка яраклы, яше егермедән узган ирләрне, төркемнәргә бүлеп, берәм-берәм исәпкә алыгыз.

⁴ Һәр ыругтан нәсел башлыгы булган кеше сезгә ярдәм итәргә тиеш.

⁵ Менә сезгә ярдәм итәргә тиешле кешеләрнең исемнәре: Рубиннән – Шедур углы Элисур;

⁶ Шимуннан – Суришаддай углы Шелумиел;

⁷ Яһүдәдән – Амминадаб углы Нахшон;

⁸ Исәсхәрдән – Суар углы Нетанел;

⁹ Зәбулуннан – Хелон углы Элиаб;

¹⁰ Йосыф угылларыннан: Эфраимнән – Аммиһуд углы Элишама, Менашшедан – Педаһсур углы Гәмәлиил;

¹¹ Беньяминнән – Гидеони углы Абидан;

¹² Даннан – Аммишаддай углы Ахигызыр;

¹³ Ашердан – Өхрән углы Пагиел;

¹⁴ Гәдтән – Дегуил углы Эльясаф;

¹⁵ Нәпталидән – Энан углы Ахира.

¹⁶ Болар – халык арасыннан сайланган кешеләр, ыруг җитәкчеләре, Исраил кабиләләренең башлыклары.

¹⁷ Муса, Һарун вә исемнәре аталган шушы кешеләр

¹⁸ икенче айның беренче көнендә бөтен Исраил халкын җыеп алдылар да яше егермедән узган һәммә ир-атны кабиләләре вә гаиләләре буенча берәм-берәм исемлеккә теркәделәр.

¹⁹ Раббы Мусага кушканча, Синай чүлендә, шул рәвешле, Муса халык санын исәпкә алды.

^20-21 Исраилнең беренче углы Рубин нәселендә яше егермедән узган, сугышка яраклы ирләрнең саны, кабиләләр вә гаиләләр исемлеге буенча, кырык алты мең биш йөз булды.

^22-23 Шимун ыругында яше егермедән узган, сугышка яраклы ирләрнең саны, кабиләләр вә гаиләләр исемлеге буенча, тугыз мең өч йөз булды.

^24-25 Гәд ыругында яше егермедән узган, сугышка яраклы ирләрнең саны, кабиләләр вә гаиләләр исемлеге буенча, кырык биш мең алты йөз илле булды.

^26-27 Яһүдә ыругында яше егермедән узган, сугышка яраклы ирләрнең саны, кабиләләр вә гаиләләр исемлеге буенча, җитмеш дүрт мең алты йөз булды.

^28-29 Исәсхәр ыругында яше егермедән узган, сугышка яраклы ирләрнең саны, кабиләләр вә гаиләләр исемлеге буенча, илле дүрт мең дүрт йөз булды.

^30-31 Зәбулун ыругында яше егермедән узган, сугышка яраклы ирләрнең саны, кабиләләр вә гаиләләр исемлеге буенча, илле җиде мең дүрт йөз булды.

^32-33 Йосыф углы Эфраим ыругында яше егермедән узган, сугышка яраклы ирләрнең саны, кабиләләр вә гаиләләр исемлеге буенча, кырык мең биш йөз булды.

^34-35 Менашше ыругында яше егермедән узган, сугышка яраклы ирләрнең саны, кабиләләр вә гаиләләр исемлеге буенча, утыз ике мең ике йөз булды.

^36-37 Беньямин ыругында яше егермедән узган, сугышка яраклы ирләрнең саны, кабиләләр вә гаиләләр исемлеге буенча, утыз биш мең дүрт йөз булды.

^38-39 Дан ыругында яше егермедән узган, сугышка яраклы ирләрнең саны, кабиләләр вә гаиләләр исемлеге буенча, алтмыш ике мең җиде йөз булды.

^40-41 Ашер ыругында яше егермедән узган, сугышка яраклы ирләрнең саны, кабиләләр вә гаиләләр исемлеге буенча, кырык бер мең биш йөз булды.

^42-43 Нәптали ыругында яше егермедән узган, сугышка яраклы ирләрнең саны, кабиләләр вә гаиләләр исемлеге буенча, илле өч мең дүрт йөз булды.

⁴⁴ Муса, Һарун һәм Исраилнең унике башлыгы – һәр ыругтан бер вәкил – исемлеккә теркәгән ирләрнең саны әнә шундый.

⁴⁵ Йорт-гаиләләре буенча исәпкә алынган, яше егермедән узган, сугышка яраклы ирләрнең саны

⁴⁶ алты йөз өч мең биш йөз илле булды.

Леви ыругының исәпкә алынмавы

⁴⁷ Әмма Леви ыругындагы гаиләләр башкалар белән беррәттән исәпкә алынмады.

⁴⁸ Раббы Мусага:

⁴⁹ – Леви ыругын исемлеккә кертмә, аларны исраилиләр белән бергә санама, – диде. –

⁵⁰ Левиләр карамагына Шаһитлык чатырын, аның барлык әсбапларын һәм анда булган һәр нәрсәне тапшыр. Алар, шунда хезмәт итеп, чатырны һәм аның әсбапларын күчереп йөртсеннәр; үз чатырларын аның тирәли корсыннар.

⁵¹ Бер урыннан икенче урынга күчергәндә, чатырны левиләр генә сүтсен; һәм һәр яңа урында аны левиләр генә корсын. Ә инде чатырга башка бер адәм якын килсә, үлемгә дучар ителсен.

⁵² Исраилиләр үз чатырларын, кайсы төркемнән булуларына карап, үз байраклары астында корсыннар.

⁵³ Исраил халкына Аллаһының ачуы чыкмасын өчен, левиләр үзләренең чатырларын Шаһитлык чатыры тирәли корсыннар: Шаһитлык чатыры өчен левиләр җаваплы.

⁵⁴ Раббы Мусага ничек әмер итсә, исраилиләр нәкъ шулай эшләделәр дә.