Маттай 7 - Изге Язма

Берәүне дә хөкем итмәгез

¹ Берәүне дә хөкем итмәгез, сезне дә Аллаһы хөкем итмәс.

² Нинди хөкем белән хөкем итсәгез, сез дә шундый хөкем белән хөкем ителерсез. Нинди үлчәм белән үлчәсәгез, сезгә дә шундый үлчәм белән үлчәп бирелер.

³ Ничек син туганың күзендәге чүп бөртеген күрәсең, ә үз күзеңдәге бүрәнәне сизмисең?

⁴ Үз күзеңдә бүрәнә булганда, син ничек туганыңа: „Күзеңдәге чүпне алыйм әле“, – дип әйтә аласың?

⁵ Икейөзле! Элек үз күзеңдәге бүрәнәне чыгар, аннары инде күзләрең яхшырак күрер һәм туганыңның күзендәге чүпне ала алырсың.

⁶ Изге нәрсәне этләргә бирмәгез: алар, сезгә борылып, үзегезне ботарлар. Энҗегезне дуңгызлар алдына сипмәгез: алар энҗегезне аяклары белән таптарлар.

Сорагыз, эзләгез, шакыгыз

⁷ Сорагыз – сезгә бирерләр, эзләгез – табарсыз, шакыгыз – сезгә ачарлар.

⁸ Чөнки һәр сораучы ала, эзләүче таба һәм шакучыга ачалар.

⁹ Арагыздан кайсыгыз икмәк сораучы углына таш тоттырыр?

¹⁰ Ул балык сораганда, кайсыгыз елан бирер?

¹¹ Әгәр сез, явыз кешеләр булып та, балаларыгызга яхшы бүләкләр бирә беләсез икән, Күктәге Атагызның Үзеннән сораганнарга яхшы нәрсәләрне бирүе шөбһәсездер.

¹² Кешеләрнең сезгә нәрсә эшләүләрен теләсәгез, үзегез дә аларга шуны эшләгез. Муса канунының һәм пәйгамбәрләр язганнарның мәгънәсе шундадыр.

Тар капка

¹³ Тар капкадан керегез, чөнки һәлакәткә илтүче юл җиңел, капкасы да киң, һәм күпләр шул капкадан керәләр.

¹⁴ Ә тормышка керә торган капка кысан, юлы тар, һәм аны азлар гына таба.

Ялган пәйгамбәрләр

¹⁵ Яныгызга сарык тиресе ябынып килүче ялган пәйгамбәрләрдән сакланыгыз: эчендә ерткыч бүреләр алар.

¹⁶ Сез аларны җимешләренә карап танырсыз. Күгән куагыннан – йөзем, тигәнәктән инҗир җыялармыни?

¹⁷ Менә шулай, яхшы агач – яхшы җимеш, ә начар агач начар җимеш бирә.

¹⁸ Яхшы агач – начар җимеш, начар агач та яхшы җимеш бирә алмый.

¹⁹ Яхшы җимеш бирми торган һәр агачны, кисеп, утка ташлыйлар.

²⁰ Шулай итеп, ялган пәйгамбәрләрне җимешләренә карап танырсыз.

²¹ Күк Патшалыгына Миңа: „Хакимем! Хакимем!“ – дип әйтүче һәркем түгел, ә Күктәге Атам ихтыярын үтәүче генә керәчәк.

²² Кыямәт көнендә Миңа күпләр: „Хакимем, Хакимем! Без Синең исемеңнән пәйгамбәрлек итмәдекмени?! Синең исемең белән җеннәрне куып чыгармадыкмыни?! Синең исемең белән башка күп кодрәтле эшләр эшләмәдекмени?!“ – дип әйтерләр.

²³ Менә шул вакытта Мин аларга: „Сезне, явызлык кылучыларны, Мин һичкайчан белмәдем, китегез янымнан!“ – дип җавап кайтарырмын.

Ике төзүче

²⁴ Шулай итеп, сүзләремне ишетеп, аларны үтәүче һәркем үзенең йортын таш өстенә салган акыллы кешегә охшаган.

²⁵ Яңгыр явып, елгалар ташып, көчле җилләр исеп, шул йортка ябырылган, әмма ул җимерелмәгән, чөнки таш нигез өстенә салынган булган ул.

²⁶ Ә инде ишетеп тә, сүзләремне үтәмәүче кеше үзенең йортын ком өстенә төзегән акылсыз кешегә охшаган.

²⁷ Яңгыр явып, елгалар ташып, көчле җилләр исеп, шул йортка ябырылган. Ул йорт җимерелгән, һәм аның җимерелүе коточкыч булган».

²⁸ Гайсә сүзләрен тәмамлагач, Аның өйрәтүләреннән халык хәйран калды,

²⁹ чөнки Ул канун белгече сыман түгел, ә бәлки хакимлеккә ия булган кеше кебек өйрәтте.