Маттай 4 - Изге Язма

Гайсәнең иблис тарафыннан вәсвәсәгә салынуы

¹ Шуннан соң, Рух Гайсәне, иблис тарафыннан вәсвәсәгә салу өчен, чүлгә ияртеп алып китте.

² Ризык капмыйча, кырык көн һәм кырык төн уздырып, Гайсә бик нык ачыкты.

³ Аздыручы иблис, Аның янына килеп: – Әгәр Син Аллаһы Углы булсаң, бу ташларга боер, икмәккә әйләнсеннәр! – диде.

⁴ Гайсә аңа болай дип җавап бирде: – «Кеше икмәк белән генә түгел, Аллаһы әйткән һәр сүз белән яши», – дип язылган Изге язмада!

⁵ Шуннан соң, иблис Аны Иерусалимгә – изге шәһәргә алып килеп, Аллаһы йортының иң биек урынына китереп бастырды

⁶ һәм: – Әгәр Син Аллаһы Углы булсаң, түбәнгә ташлан! – диде. – Изге язмада әйтелгән бит: «Аллаһы Синең турыда фәрештәләренә әмер бирер. Алар Сине кулларына күтәреп алырлар, аякларың ташка абынмас».

⁷ – Анда: «Раббы Аллаңны сынама», – дип тә язылган, – дип җавап бирде Гайсә.

⁸ Аннары иблис, Аны бик биек тауга алып менеп, дөньяның барлык патшалыкларын һәм аларның бөтен зиннәтен күрсәтте

⁹ һәм: – Әгәр йөзтүбән капланып, миңа табынсаң, боларның һәммәсен Сиңа бирермен! – диде.

¹⁰ – Кит, иблис! – дип җавап бирде Гайсә. – Изге Язмада язылган: «Раббы Аллаңа табын, Аңа гына хезмәт ит».

¹¹ Шуннан соң иблис Аны калдырып китте, һәм янына фәрештәләр килеп, Гайсәгә хезмәт күрсәтте.

Гайсәнең хезмәт итә башлавы

¹² Яхъяның зинданга утыртылуы хакында белгәннән соң, Гайсә Гәлиләягә китте.

¹³ Насараны калдырып китеп, Ул Гәлиләя күле янындагы Зәбулун һәм Нәптали җирендәге Кәпәрнаум шәһәренә барып урнашты.

¹⁴ Бу исә Ишагыйя пәйгамбәр аша әйтелгәннәр гамәлгә ашсын өчен булды:

¹⁵ «Зәбулун җире, Нәптали җире! Диңгезгә алып баручы юл, Үрдүн аръягындагы Гәлиләя – мәҗүсиләр иле!

¹⁶ Караңгылыкта яшәүче халык көчле яктылыкны күрде. Үлем караңгылыгында яшәүчеләр өчен нур балкыды».

¹⁷ Шул вакыттан алып Гайсә: – Тәүбәгә килегез! Күкләр Патшалыгы инде бик якын! – дип игълан итеп йөрде.

Гайсәнең беренче шәкертләре

¹⁸ Гәлиләя күле яныннан үтеп барганда, Гайсә бертуган кардәшләрнең – Петер дип аталган Шимун һәм Әндринең – күлгә ятьмә салуларын күрде. Алар балыкчылар иде.

¹⁹ – Миңа иярегез! Мин сезне кеше аулаучы итәрмен! – диде аларга Гайсә.

²⁰ Алар шунда ук, ятьмәләрен калдырып, Аңа иярделәр.

²¹ Аннан киткәч, Гайсә башка бертуган кардәшләрне – Зебедәй углы Ягъкубны һәм Яхъяны күреп алды. Алар аталары Зебедәй белән бергә көймәдә ятьмәләрен сиплиләр иде. Ул Үзенә иярергә өндәде.

²² Алар шунда ук, көймәне һәм аталарын калдырып, Гайсәгә иярделәр.

Гайсәнең гыйлем бирүе, савыктыруы

²³ Гайсә бөтен Гәлиләя җирендә гыйбадәтханәләрдә гыйлем биреп, Патшалык хакында Яхшы хәбәрне сөйләп, халыкны төрле авырулардан һәм чирләрдән савыктырып йөрде.

²⁴ Бөтен Сүрия буйлап Аның хакында хәбәр таралды. Янына төрле авырулардан һәм интектергеч чирләрдән җәфаланганнарны, җенлеләрне, өянәк белән авырганнарны һәм паралич сукканнарны алып килделәр. Гайсә аларны савыктырды.

²⁵ Аның артыннан Гәлиләядән, Ун каладан, Иерусалимнән, Яһүдиядән һәм Үрдүн аръягыннан килгән халык төркемнәре йөрде.