Лүк бәян иткән яхшы хәбәр 3 - Изге Язма

Чумдыручы Яхъяның вәгазьләве

¹ Кайсар Тибери хакимлегенең унбишенче елында, Яһүдиядә римлы Понти Пилат идарә иткән чорда, өлкә идарәчесе вазифасын Гәлиләядә – Һируд, Итурая һәм Трахунитис өлкәләрендә – аның бертуган кардәше Филип, Абилинидә Лусани башкарды.

² Олуг рухани вазифасын Һаннас һәм Кәяфәс башкара иде. Шул көннәрдә чүлдә яшәүче Зәкәрия углы Яхъяга Аллаһы сүзе килеп иреште.

³ Шуннан Яхъя, Үрдүн елгасы тирәсендәге барлык төбәкләрне әйләнеп чыгып, тәүбәгә килүегезнең билгесе итеп суга чуму йоласын үтәгез, һәм Аллаһы сезнең гөнаһларыгызны кичерер, дип халыкны вәгазьләп йөрде.

⁴ Ишагыйя пәйгамбәр китабында бу хакта болай дип язылган: «Чүлдә әнә бер аваз яңгырый: „Раббыга юл әзерләгез: Аның барыр сукмакларын турайтыгыз,

⁵ һәрбер чокыр тигезләнсен, таулар һәм калку урыннар түбәнәйсен, бормалы юллар турылансын, сикәлтәләр тигезләнсен –

⁶ шул чагында барча кешеләр Аллаһының коткаруын күрерләр“».

⁷ Суга чуму йоласын үтәр өчен күпләп-күпләп килгән халыкка Яхъя: – И-и сез, елан токымы! Башыгызга төшәсе Аллаһы ачу-ярсуыннан качып котыла алырбыз дигән фикерне кем әйтте сезгә? – диде. –

⁸ Тәүбәгә килүегезнең ихлас күңелдән икәнен эшегез белән раслагыз. «Безнең атабыз Ибраһим бит, котылырбыз!» дип уйлый күрмәгез. Шуны әйтәм сезгә: Аллаһы әнә шул ташлардан да Ибраһимга балалар бар кыла ала.

⁹ Агач тамыры янында балта әзер ята: яхшы җимеш бирмәүче һәр агачны, кисеп, утка ташлыйлар.

¹⁰ – Безгә нәрсә эшләргә соң? – дип сораган халыкка Яхъя:

¹¹ – Ике күлмәге булган кеше аның берсен күлмәксезгә бирсен. Ризыгы барлар ашарына булмаган кеше белән бүлешсен, – дип җавап кайтара иде.

¹² Суга чумдыру йоласын үтәр өчен, салым җыючылар да килделәр һәм Яхъядан: – Остаз! Ә безгә нәрсә эшләргә? – дип сорадылар.

¹³ Ул аларга: – Тиешеннән артыгын таләп итмәгез, – дип җавап бирде.

¹⁴ Гаскәриләр дә: – Ә безгә нәрсә эшләргә? – дип сорады. – Беркемнән дә көчләп, янап әйбер алмагыз. Хезмәт хакыгыздан канәгать булыгыз, – диде Яхъя.

¹⁵ Халык өметләнеп яшәде; Яхъя хакында күңеленнән һәркем: «Мәсих шул түгел микән?» – дип уйлады.

¹⁶ Әмма Яхъя аларның барысына болай дип җавап бирде: – Мин сезне суга чумдырам. Ләкин миннән кодрәтлерәк Берәү килә, мин Аның аяк киеме каешын чишәргә дә лаек түгелмен. Ул башкарган чумдыру Изге Рух һәм ут белән булыр.

¹⁷ Ындырдагы ашлыкны җилгәрер өчен, Ул кулына җилгәргеч тоткан; бодаен, аерып, келәтенә салыр, ә кибәген сүнмәс утта яндырыр.

¹⁸ Яхъя шулай, халыкка күп нәрсәләр турында үгет-нәсыйхәт биреп, Яхшы хәбәрне бәян итеп йөрде.

¹⁹ Әмма өлкә идарәчесе Һируд, бертуган кардәшенең хатыны Һирудия белән булган мөнәсәбәтләре һәм башка явызлыклары өчен Яхъя тарафыннан фаш ителеп,

²⁰ кылган җинаятьләренә тагын бер җинаять өстәде – Яхъяны зинданга утыртты.

Гайсәнең суга чуму йоласын үтәве

²¹ Бар халык суга чуму йоласын үтәгән вакытта, Гайсә дә бу йоланы үтәде. Ул дога кылып торган чакта, күк капусы ачылды да

²² Аңа күгәрчен рәвешендә Изге Рух иңде, һәм күкләрдән: – Син – Минем сөекле Углым; Син – Минем куанычым! – дигән сүзләр яңгырады.

Гайсәнең нәсел шәҗәрәсе

²³ Хезмәтен башлаган вакытта, Гайсә утыз яшьләр чамасында иде. Кешеләр Аны Йосыф углы дип уйлады. Эли углы Йосыфның ата-бабалары шулар: Эли,

²⁴ Маттат, Леви, Мәлки, Яннай, Йосыф,

²⁵ Мәттития, Амотс, Нахум, Һесли, Нәггәй,

²⁶ Махат, Мәттития, Шымгый, Йосых, Йода,

²⁷ Йоханан, Риса, Зеруббабел, Шеһалтиел, Нер,

²⁸ Мәлки, Адди, Көсам, Элмадам, Эр,

²⁹ Ешуа, Элигызыр, Йорим, Маттат, Леви,

³⁰ Шимун, Яһүдә, Йосыф, Йонам, Эльякыйм,

³¹ Мелеа, Менна, Маттата, Натан, Давыт,

³² Ишай, Обид, Богаз, Салмон, Нахшон,

³³ Амминадаб, Админ, Арни, Хесрон, Перес, Яһүдә,

³⁴ Ягъкуб, Исхак, Ибраһим, Терах, Нахор,

³⁵ Серуг, Регу, Пелег, Гыйбер, Шелах,

³⁶ Кынан, Әрпәхшәд, Шем, Нух, Ләмех,

³⁷ Мәтушелах, Ханох, Еред, Маһалалел, Кынан,

³⁸ Энош, Шет, Адәм, Адәм исә – Аллаһы углы.