I Елъязма 9 - Изге Язма

¹ Шул рәвешле, Исраилнең бар халкы нәселнамәдә гаилә-гаилә саналып чыгып, әлеге мәгълүматлар Исраилнең патшалар китабына теркәлде. Раббыга хыянәт иткән өчен, Яһүдә халкы Бабилгә сөрелгән иде.

Бабилгә сөрелгәннәрнең кабат Иерусалимгә әйләнеп кайтуы

² Беренче булып үзләренең кала вә биләмәләренә гади исраилиләр, шулай ук рухани, леви һәм Изге йорт хезмәтчеләренең бер өлеше генә әйләнеп кайтты.

³ Яһүдә, Беньямин, Эфраим һәм Менашше ыругыннан Иерусалимгә кайтып урнашкан кешеләр түбәндәгеләр.

⁴ Яһүдә углы Перес нәселеннән: Бани углы Имридән туган Омри оныгы – Аммиһуд углы Утай;

⁵ Шела нәселеннән: аның беренче углы Асая һәм аңардан туган угыллар;

⁶ Зерах нәселеннән – Ягуһел. Димәк ки, җәмгысы алты йөз туксан кеше.

⁷ Беньямин нәселеннән: Һассенуһа углы Һодавиядән туган Мешуллам углы Саллу;

⁸ Ерухам углы Ибнея; Микри углы Уззидән туган Элаһ; Ибния углы Регуилдән туган Шефатия углы Мешуллам.

⁹ Беньяминнәрнең нәселнамәсеннән күренгәнчә, аларның саны тугыз йөз илле алты кеше иде. Аларның һәммәсе гаилә башлыгыдыр.

¹⁰ Руханилардан: Едагыйя, Яһояриб, Яхин;

¹¹ Аллаһы йортының башлыгы булган Әхитүб углы Мәрают тудырган Садыйк углы Мешулламнан туган Хилкыйя углы Азария;

¹² Малкия углы Пашхурдан туган Ерухам углы Адая; Иммер углы Мәшиллемит тудырган Мешуллам углы Яхзерадан туган Адиел углы Масай;

¹³ һәм аларның кардәшләреннән бер мең дә җиде йөз алтмыш гаилә башлыгы. Алар барысы да Аллаһы йортында хезмәт итәргә яраклы адәмнәр иде.

¹⁴ Левиләрдән: Мерари нәселеннән булган Хәшәбия углы Азрикам тудырган Хашшуб углы Шәмәгыйя;

¹⁵ Бакбаккар, Хереш, Гәләл; Асаф углы Зихри тудырган Микә углы Маттания;

¹⁶ Едутун углы Гәләл тудырган Шәмәгыйя углы Убадия; Нетофа авылларында яшәгән Элкана углы Аса тудырган Бәрәхия.

¹⁷ Капка каравылчыларыннан: Шаллум, Аккуб, Талмун, Ахиман һәм аларның кардәшләре. Шаллум аларның башлыклары иде.

¹⁸ Әлеге кешеләр кояш чыгышына караган Патша капкасы төбендә бүген дә сакта торалар. Левиләрдән капка сакчылары шушыдыр.

¹⁹ Корах углы Эбъясаф тудырган Коре углы Шаллум һәм аның Корах нәселеннән булган кардәшләре, Раббы станына керә торган юлны саклаган ата-бабалары кебек үк, Изге чатырның бусага төбендә сакчылык кылдылар.

²⁰ Элгәре сакчыларның башлыгы Элгазар углы Пинхәс булып, Раббы аның юлдашы иде.

²¹ Мешелемия углы Зәкәрия исә Очрашу чатырының ишеге төбендә сакта торды.

²² Шул заманнарда Очрашу чатырының ишекләрен сакларга барлыгы ике йөз дә унике кеше сайлап алына. Аларның исемнәре авыллары буенча нәселнамәләренә теркәлгән. Әлеге кешеләрне, тугры булганнары өчен, Давыт һәм гаиптән хәбәр бирүче Шемуил билгеләгән була.

²³ Сакчылар үзләре дә, аларның угыл-оныклары да Раббы йортының капкасы төбендә – Изге чатырның ишеге янында сакта тордылар.

²⁴ Каравылчылар көнчыгыш, көнбатыш, төньяк һәм көньякта – һәр дүрт тарафта сакта булдылар.

²⁵ Авылларда яшәүче кардәшләре вакыт-вакыт җидешәр көнгә аларга ярдәмгә киләләр иде.

²⁶ Левиләрдән дүрт баш каравылчы Аллаһы йортындагы бүлмәләр һәм хәзинә саклагычы өчен җаваплы булды.

²⁷ Алар төннәрен Аллаһы йорты тирәли сакта торып, һәр иртәне ачкыч белән ишекләрне ачу да аларга йөкләнгән иде.

²⁸ Левиләрнең беришләре, Аллаһы йортында гыйбадәт кылганда кулланыла торган савыт-сабага күз-колак булыр өчен куелып, аны санап тапшыра, санап кабул итә торган булганнар.

²⁹ Икенчеләренә изге урындагы башка кирәк-ярак, бүтән әйберләр һәм сыйфатлы бодай оны, шәраб, зәйтүн мае, хуш исле сумала-майлар өчен җаваплылык йөкләнде.

³⁰ Руханилардан кайберәүләр төрле сумала-майлардан катнашмалар әзерли торган иде.

³¹ Корах нәселеннән булган Шаллумның баш углы – Леви ыругы кешесе Мәттитиягә Раббыга тәкъдим ителә торган икмәкне пешерү йөкләнде.

³² Аларның кайбер ир кардәшләре исә – Коһат угыллары – һәр шимбәне изге икмәк пешерә торган иде.

³³ Җырчы вазифасын башкарган левиләрнең гаилә башлыклары Изге йорт бүлмәләрендә яшәде, көн-төн үзләренең төп вазифаларын башкарганга күрә, алар бүтән төр хезмәттән азат иделәр.

³⁴ Боларның һәрберсе, нәсел шәҗәрәләренә теркәлгәнчә, левиләрнең гаилә башлыгыдыр. Алар Иерусалимдә яшәделәр.

Шаулның нәсел шәҗәрәсе

³⁵ Гибгонның атасы Егыил Гибгонда яшәде. Аның хатыны Мәгакәһ атлы иде.

³⁶ Егыилнең өлкән углы – Абдун, аңардан соң дөньяга килгән угыллары: Сур, Кыйш, Багал, Нер, Надаб,

³⁷ Гедор, Ахъя, Зәкәрия, Миклут.

³⁸ Миклутның углы – Шимһам. Аларның нәселе бер-берсе белән янәшә Иерусалимдә яшәде.

³⁹ Нер – Кыйшның, ә Кыйш Шаулның атасы иде. Шаулдан Йонатан, Малки-Шуа, Абинадаб һәм Эшбагал туды.

⁴⁰ Йонатанның углы Мериб-Багалдан Михә дөньяга килде.

⁴¹ Михәнең угыллары: Питун, Мәлик, Тахреа һәм Әхәз.

⁴² Әхәздән туган Ягъра угыллары: Алемет, Азмавет һәм Зимри. Зимридән соң нәсел җебенең дәвамы: Моса,

⁴³ Бинга, Репая, Элгаса, Әсел.

⁴⁴ Әселнең алты углы туды: Азрикам, Бокеру, Исмәгыйль, Шегарья, Убадия һәм Ханан; болар Әселнең угылларыдыр.