Ишагыйя 21 - Изге Язма

Бабилнең җиңелүе турында пәйгамбәрлек сүзе

¹ Диңгез буендагы чүл турында әйтелгән пәйгамбәрлек сүзе. Нәгебтә дулаган өермә сыман, чүлдән, куркыныч илдән килә ул.

² Миңа куркыныч бер вәхи килеп иреште: «Хыянәтче сата, талаучы талый. Элам, һөҗүмгә бар! Мадай, камап ал! Бабил китергән барлык аһ-зарга Мин чик куячакмын!»

³ Боларны күреп, тәнемне авырту биләп алды, бала табучы хатындай газап кичердем. Ишеткән бар нәрсәм мине куркуга салды, күргән бар нәрсәм котымны алды.

⁴ Йөрәгем калтырады, бөтен тәнем дер-дер килде; элек мин көтеп алган эңгер-меңгер вакыт минем өчен коточкыч бер нәрсәгә әйләнде.

⁵ Табыннар корылган, келәмнәр җәелгән: аш мәҗлесе бара… Торыгыз, гаскәрбашлары, калканнарыгызны майлагыз!

⁶ Чөнки Хуҗа-Хаким миңа болай диде: «Бар, күзәтче куй, күргәннәрен әйтә барсын.

⁷ Пар ат җигелгән арбаларны, ишәкләргә һәм дөяләргә атланган җайдакларны күргәч, игътибарлы булсын ул, тырышып күзәтсен!»

⁸ Шунда күзәтче кычкырды: «Хакимем, күзәтү манарасында мин көнозын торам, төннәрен дә урынымнан китмим.

⁹ Менә күрәмен: пар ат җигелгән арбаларда ирләр килә!» Шуннан соң күзәтче: «Төшерелде, бәреп төшерелде Бабил! Илаһларының барлык сыннары җимерелде, алар җирдә аунап ята!» – диде.

¹⁰ Әй ындырда суктырылган халкым минем! Күкләр Хуҗасы Раббыдан, Исраил Алласыннан нәрсә ишетсәм, сезгә шуны җиткердем.

Эдом турында әйтелгән пәйгамбәрлек сүзе

¹¹ Думаһ турында әйтелгән пәйгамбәрлек сүзе. Миңа Сәгыйрьдән: «Әй сакчы, төн әле күпмегәчә сузылачак? Күпмегә сузылачак ул, әй сакчы?» – дип кычкыралар.

¹² Сакчының җавабы шундыйдыр: «Таң атып килә, ләкин әле төн дәвам итә. Әгәр инде күбрәк беләсегез килсә, кабат килеп сорагыз».

Гарәпләр җире турында әйтелгән пәйгамбәрлек сүзе

¹³ Гарәпләр җире турында әйтелгән пәйгамбәрлек сүзе. Әй деданиләр кәрваны, гарәпләр җирендәге әрәмәләрдә төн кунарсың!

¹⁴ Тейма җирендә яшәүчеләр, шул сусаганнарга су алып килегез, шул качакларга икмәк китерегез!

¹⁵ Чөнки алар кылычтан качалар, кынысыннан чыккан кылычтан, киерелгән җәядән, дәһшәтле сугыштан кача алар.

¹⁶ Хуҗа-Хаким миңа болай диде: – Ялланып эшләгән кеше елларны төгәл санаган кебек, нәкъ өч ел үтүгә, Кыдарның барлык шөһрәте юкка чыгачак.

¹⁷ Укчылардан, Кыдар сугышчыларыннан, бик азы гына исән калачак. Исраилнең Раббы Алласы әнә шулай дип әйтте.