Ишагыйя 13 - Изге Язма

Бабилнең ахыры инде якын

¹ Амотс углы Ишагыйягә ирешкән вәхи – Бабил турындагы пәйгамбәрлек сүзе.

² Раббы әйтә: «Шәрә тау өстендә байрак күтәрегез, хакимнәр капкасыннан керсеннәр өчен, гаскәрләргә каты итеп кычкырып кул болгагыз.

³ Үзем сайлап алганнарга Мин боерык бирдем – ачуымны гамәлгә ашырсыннар өчен, мәһабәтлегемә сокланучы гаскәриләремне чакырып алдым».

⁴ Таулардан гавам шаулашуын хәтерләткән гөрелте ишетелә, бер урынга җыелган патшалыклар вә халыклар тавышы бу: Күкләр Хуҗасы Раббы сугыш өчен гаскәрләрен барлый.

⁵ Алар ерак илдән, күк читеннән үк килә: Раббы Үзенең газаплый торган коралы белән бөтен җир йөзен тар-мар итәчәк!

⁶ Үкереп-үкереп елагыз, чөнки Раббы көне якын! Кодрәт иясе җибәргән һәлакәт булып килә ул!

⁷ Шуңа күрә бар кешенең кулы салынып төшәр, һәр кешенең йөрәге куркудан туктап калыр.

⁸ Аларның котлары алыныр, һәрберсе авырту вә газапка дучар булыр; алар бала табучы хатын кебек изаланыр, куркышып, бер-берсенә карар, битләре уттай янып торыр.

⁹ Менә, Раббының рәхимсез көне якынлаша, ул көн дәһшәт һәм янып торган ярсу алып килә, җирне чүлгә әйләндерергә, гөнаһлы бәндәләрне юк итәргә килә!

¹⁰ Күктәге йолдызлардан вә йолдызлыклардан якты төшмәс, чыккан чагында, кояш сүрән булыр, ай да үз яктысын бирмәс.

¹¹ Раббы әйтә: «Дөньяны Мин – явызлыгы өчен, яманнарны кылган җинаятьләре өчен җәзага тартырмын; тәкәбберләрнең мин-минлегенә, залимнәрнең масаюына чик куярмын.

¹² Кешеләрне Мин саф алтыннан, Офир алтыныннан да сирәгрәк очрый торган итәрмен.

¹³ Шуның өчен күкләрне дер селкетермен, һәм, Күкләр Хуҗасы Раббының ачуы дөрләгән көнне, Аның ярсуыннан Җир үз күчәреннән чыгар!

¹⁴ Шул чагында һәркем, аучы эзәрлекләгән болан, көтүчесез калган сарык сыман, үз халкына таба йөгерер, үз җиренә качар.

¹⁵ Качып котыла алмаганына сөңге кадалыр, кулга эләккәне кылычтан һәлак булыр.

¹⁶ Сабый балаларын ташка бәреп үтерерләр, йортларын таларлар, хатыннарын мәсхәрә итәрләр.

¹⁷ Менә, бабиллеләргә каршы Мин көмеш дип исе китмәгән, алтынга хирыс булмаган мадайлыларны күтәрермен.

¹⁸ Мадайлыларның ук-җәяләре яшь егетләрне үтерер; сабыйларны алар аямас, балаларны кызганмас.

¹⁹ Барлык патшалыклар арасында иң гүзәле, килданиләрнең даны һәм горурлыгы булган Бабилне Аллаһы юк иткән Сәдүм вә Гамура язмышы көтә!

²⁰ Инде анда беркайчан да яшәмәсләр, мәңге беркем килеп урнашмас; күчмә халыклар үз чатырларын анда кормас, көтүче дә сарыкларын ял итәргә тупламас.

²¹ Анда чүл җанварлары гына хәл җыяр, йортларга ябалаклар кереп тулыр, анда тәвә кошлары яшәр, кәҗә тәкәләре уйнаклап йөрер.

²² Андагы ныгытмаларда – сыртланнар, гүзәл сарайларда чүл бүреләре улар. …Бабилнең ахыры инде якын, аның көннәре аз калды».