Ишагыйя 12 - Изге Язма

Котылганнарның рәхмәт җыры

¹ Шул көнне син, Исраил халкы: «Сиңа рәхмәтләремне әйтәм, и Раббы! – Синең ачуың чыккан иде миңа, инде ул басылды, һәм Син миңа юаныч бирдең, – дип әйтәчәксең. –

² Аллаһы – Коткаручым минем; өметемне Аңа баглыйм һәм курыкмыйм, чөнки Раббы – минем көч-кодрәтемдер, мине Ул коткара!»

³ Котылу чишмәләреннән сез сөенә-сөенә су алырсыз.

⁴ Шул көнне: «Раббыга рәхмәтләрегезне белдерегез, Аның исемен телгә алыгыз, халыкларга Аның гамәлләрен сөйләгез, исеменең бөеклеген яд итегез! – диярсез. –

⁵ Раббыга мәдхияләр җырлагыз, чөнки Аның эшләре гаҗәептер, моны бөтен җир йөзендә белеп торсыннар!

⁶ Әй Сион кешеләре, сөенешеп тантана итегез, шатлык авазлары яңгырап торсын: Исраилнең изге Алласы сезнең арада, һәм Ул бөектер!»