Әюб 6 - Изге Язма

Әюбнең икенче нотыгы Аллаһы гомер җебемне өзсә иде

¹ Җавабында Әюб болай диде:

² «Әгәр минем хәсрәтемне үлчәп карасаң, бизмәннәргә салсаң бар кайгымны –

³ диңгез комыннан да авыррак тартыр иде ул. Шуңа күрә сүзләрем өзек-төтек!

⁴ Кодрәт иясенең уклары кадалгандыр тәнемә, рухым эчә агуын шуларның, Аллаһының барча дәһшәтләре миңа каршы юнәлгән.

⁵ Җәйләүдәге ишәк кычкырырмы, анда үлән җитәрлек булса?! Арандагы сыер мөгрәрме, алдында ашарына булса?!

⁶ Тозсыз ашның тәме бармы әллә?! Йомырка агының тәме булырмы?!

⁷ Күңелем һич кабул итми, хәтта кагыласым килми, андый аш күңелне болгата!

⁸ Аһ, теләгем кабул булса иде, Аллаһы өметемне акласа иде –

⁹ юк итәргә теләп мине, тәвәккәлләп, күтәрсә иде дә кулын, гомер җебемне өзсә иде!

¹⁰ Шунда миңа бер юаныч булыр иде, туктаусыз газап чиккәндә дә куаныр идем. Чөнки бит мин Изге Затның сүзеннән чыкмадым!

¹¹ Өметемне өзмәс өчен, кайдан куәт алыйм? Гомеремнең азагы нинди булыр, ничек түзеп торыйм?

¹² Минем көчем таш кебек ныкмы?! Гәүдәм әллә бакырданмы минем?!

¹³ Бу чарасыз хәлләр эчендә ярдәм итәрлек көч бармыни соң минем үземдә?

Дусларыннан Әюбнең күңеле суыну

¹⁴ Хәтта Кодрәт иясеннән куркуны оныткан кешегә дә дусларының мәрхәмәте кирәк.

¹⁵ Минем дуслар инеш кебек ышанычсыз, суы агып беткән ермакка охшаш:

¹⁶ язгы ташудан ул болганчыкланыр, кар суларыннан ташкынга әверелер;

¹⁷ челлә җиткәч, тынычланып, суы юкка чыгар, кызудан елга үзәне кибеп калыр.

¹⁸ Кәрваннар, су эзләп, юлларыннан язар, чүлдә каңгырып йөреп, шунда һәлак булыр.

¹⁹ Тейма кәрванчылары су эзләп йөрер, Шеба сәүдәгәрләре су табылыр дип өмет итәр.

²⁰ Ләкин аларның көткәннәре акланмас, коры елга үзәненә килеп җитәрләр дә котлары очар.

²¹ Хәзер сез дә минем өчен шулай ышанычсыз булдыгыз: хәлемне күреп куркып калдыгыз.

²² Мин сездән нинди дә булса бүләк сорадыммы?! „Минем хакка байлыгыгыздан өлеш чыгарыгыз“, – дидемме?!

²³ „Дошман кулыннан коткарыгыз мине“ яки „Йолым түләп, рәхимсез бәндәләрдән азат итегез“, – дип әйттемме?!

²⁴ Аңлатыгыз миңа, һәм мин тынып калырмын, күрсәтеп бирегез: нәрсәдә минем ялгышым?

²⁵ Хак сүздән дә каты нәрсә юктыр, тик сезнең шелтәгез нидән гыйбарәт соң?

²⁶ Сез бары шелтәле сүзләр генә уйлап таба аласызмы? Гаҗиз кешенең ялваруы сезгә – искән җил тавышы гынамы?

²⁷ Сез ятимне жирәбә салып бүлешәсез, дустыгызны сатып җибәрергә әзерсез.

²⁸ Борылып карагыз әле миңа – күзегезгә карап алдаша алыр идемме мин?

²⁹ Хаталанмас өчен, акылыгызга килегез, шикләнмәгез, хак исемемә әле тап төшмәгән.

³⁰ Авызымнан әллә ялган сүз чыктымы – телем явызлык тәмен сизми дисезме?!