Әюб 40 - Изге Язма

Синең кулыңның куәте Аллаһыныкы кебекме?!

¹ Шулчак давыл эченнән Әюбкә Раббы болай диде:

² «Ир бул, билеңне кысыбрак бу! Мин сорыйм синнән, ә син аңлатып бир.

³ Син шулай итеп Минем хөкемне юкка чыгарасыңмы, үзеңне аклар өчен, Мине гаеплисеңме?

⁴ Синең кулыңның куәте Аллаһыныкы кебекме?! Тавышың, Аныкы сыман, күк күкрәвенә тиңме?!

⁵ Алай икән, үзеңне мәһабәт вә бөеклек белән бизә, дан вә шөһрәткә төрен.

⁶ Ачу-ярсуыңа ирек бир, һәр тәкәббергә кара да буйсындыр аны,

⁷ һәр тәкәббергә кара да тез чүктер, ә яманнарны басып торган урынында таптап из!

⁸ Битләренә кәфен ябып, табутка сал, барысын бергә җиргә күм.

⁹ Шул чагында Мин Үзем үк сине мактармын, уң кулың сине коткара, диярмен!

Әнә, бегемотка кара

¹⁰ Әнә, бегемотка кара: аны да, сине дә Мин бар иттем! Ул, үгез сыман, үлән белән туклана.

¹¹ Ботларының ныклыгына кара син аның, корсагының көчле мускулларына кара;

¹² аның койрыгы эрбет агачыдай нык, ботларындагы сеңерләре үрелгән кебек;

¹³ аякларын бакыр торбалар дип белерсең, кабыргалары тимерчыбык сыман.

¹⁴ Аллаһы башкарган эшләрнең иң мәһабәте ул; Яратучысы гына аңа Үзенең кылычын күтәрә ала.

¹⁵ Ризыкны аңа киек җәнлекләр йөгерешеп уйнап йөргән таулар бирә.

¹⁶ Саз камышлыгында качып ята ул, лотослар арасында ял итә;

¹⁷ лотослар күләгәсе каплап тора аны, тирәсендә – инеш таллары.

¹⁸ Менә аңа ташкын сулар ургыла – ул селкенеп тә карамый, авызына Үрдүн суы ташып керсә дә – ул тыныч.

¹⁹ Аны эләктереп алган берәү бармы?! Кем аның борынына ыргак кигертә алыр?

Ливьятанны кармакка тота аласыңмы?!

²⁰ Ә Ливьятанны кармакка тота аласыңмы?! Бау белән телен бәйләп куя аласыңмы?!

²¹ Борынына аркан кигертә, теш казнасын ыргак белән тишә аласыңмы?!

²² Ул синнән кат-кат ялварып сорармы, назлы сүзләре белән йомшартырга тырышырмы?!

²³ Мәңге колың булырга синең белән килешү төзерме?!

²⁴ Кошчык белән уйнагандай, аның белән уйнарсыңмы, кызларыңа бер кызык булыр дип, бәйгә куярсыңмы?!

²⁵ Балыкчылар аның өчен сатулашырмы, сәүдәгәрләргә аны бүлеп бирерме?!

²⁶ Ыргаклы сөңге белән аны тишә, балыкчы чәнечкесе белән башын чәрдәкли алырсыңмы?!

²⁷ Кагылып кына кара – кабат аңа кул сузмассың һәм ул сугышны гомереңдә оныта алмассың!