Әюб 4 - Изге Язма

Әлифазның беренче нотыгы Адәм баласы Аллаһы каршында хаклы була алырмы?

¹ Теманлы Әлифаз аңа болай дип җавап бирде:

² «Кемдер үз фикерен әйтергә теләсә, сүзләре, бәлки, күңелеңә авыр килер, ләкин мондый чакта ничек дәшми каласың?!

³ Исеңә төшер: башкаларга ничек акыл-киңәш бирә идең үзең, кулы салынганнарга ничек көч-куәт өсти идең.

⁴ Абынганнарны син сүзең белән аягына бастырдың, тезләре калтыраганнарга таяныч булдың.

⁵ Инде үзеңә кайгы килгәч, шундук башыңны игәнсең, бәла килеп кагылуга, куркудан рухың төшкән.

⁶ Аллаһыдан курку сиңа ышаныч бирмимени? Саф хәятең сине өметләндермимени?

⁷ Уйлап кара: гаепсез бәндәләрнең кайсы һәлак булганы бар?! Күңеле тугры адәмнәрнең кайда юкка чыкканы бар?!

⁸ Мин күрдем ки, яманлык басуын сөреп, явызлык чәчкәннәр үзләре үк шул җимештән авыз итәләр;

⁹ алар Аллаһының кайнар сулышыннан үләләр, Аның дәһшәтле җиленнән гаип булалар.

¹⁰ Яманнар арысландай үкерешә бар көченә, ләкин аларның тешләре яшь арыслан тешләредәй сындырылыр.

¹¹ Табыштан мәхрүм калган арыслан һәлак була, ана арысланның балалары кайсы кая таралып бетә.

¹² Яшерен бер сүз килеп иреште миңа, колагыма бер пышылдау ишетелде.

¹³ Төнлә кешеләр, тирән йокыга талып, хәвефле төшләр күреп яткан чакта,

¹⁴ калтырау һәм курку биләп алды мине, сөякләремә кадәр курку үтеп керде.

¹⁵ Бер рухның җиле шулчак йөземә кагылып үтте, һәм чәчләрем үрә торды.

¹⁶ Ул каршымда иде, тик мин аның килеш-килбәтен төсмерли алмадым, күз алдымда бары аның томанлы бер рәвеше торып калды. Тынлык урнашты. Шул чакта тавыш ишеттем:

¹⁷ „Адәм баласы Аллаһы каршында хаклы була алырмы? Яратучысы каршында кем саф булып кала алыр?

¹⁸ Аллаһы хәтта Үзенең хезмәтчеләренә дә ышанып бетмәс, фәрештәләрендә дә җитешсезлек табар,

¹⁹ инде нигезе комга салынган балчык өйдә яшәүчеләрдә бигрәк тә табар: аларны бит көя күбәләгеннән дә җиңелрәк сытып үтерүе.

²⁰ Иртән бар иде алар, кичкә юк булалар – мәңгегә юкка чыгулары сизелми дә кала;

²¹ чатыр бавын өзгән кебек, тәннәренең бер сеңерен өзү җитә – акыл-зирәклеккә ирешмичә һәлак булалар“.