Әюб 36 - Изге Язма

Элиһуның дүртенче нотыгы Аллаһының гаделлеге

¹ Элиһу болай дип өстәде:

² «Аз гына көтеп тор – һәм мин сиңа аңлатып бирермен, Аллаһыны яклап, тагын кайбер нәрсәләр әйтермен.

³ Фикерләремне ерактан башлыйм, Яратучымның гаделлеген исбатлап бирәм.

⁴ Чынлап та, минем сүзләрем ялган түгел, синең каршыңда камил белемле кеше басып тора.

⁵ Аллаһы – кодрәтле! Әмма Ул беркемгә дә мыскыллап карамый. Аның көче һәм акылы бөектер.

⁶ Яман кешене Ул исән калдырмас, ә мазлумнарга гаделлек белән гамәл кыла;

⁷ тәкъвалардан йөзен чөермәс, аларны тәхеткә, патшалар рәтенә утыртыр, күтәрелүләре мәңгелеккә булыр.

⁸ Әгәр кеше бәхетсезлек белән богауланган, бәйлелеккә төшкән икән,

⁹ димәк, Аллаһы аларның эш-гамәлләренә, тәкәбберлектә кылынган җинаятьләренә ишарәли,

¹⁰ үгет-нәсыйхәтен ишетсеннәр өчен, шулай колакларын ача, гөнаһлардан баш тартырга куша.

¹¹ Инде тыңласалар һәм Аңа хезмәт итә башласалар, алдагы көннәре – иркен, мул тормышта, калган гомерләре шатлыкта үтәр.

¹² Ә тыңламасалар – юк ителерләр, акыл-зиһенгә ирешмичә һәлак булырлар.

¹³ Денсезләрнең йөрәгендә ачу ярсый; Аллаһы аларны богаулап куйгач та, Аңардан шәфкать сорап ялвармыйлар.

¹⁴ Алар яшьли үләләр, тормышлары фәхеш ирләрнекедәй кыска була.

¹⁵ Мазлумнарны исә Аллаһы газап биреп коткара, газап чиккәндә, Үзен ишетсеннәр дип, колакларын ача.

¹⁶ Тарлыктан Ул сине дә киртәләр булмаган киңлеккә чыгарыр иде, өстәлең сый-нигъмәттән сыгылып торыр иде.

¹⁷ Ләкин сине яманнарга тәгаенләнгән хөкем көтә – гадел хөкем куып тотар сине.

¹⁸ Сак бул, байлык сине кызыктырмасын, мул ришвәт сине юлыңнан яздырмасын.

¹⁹ Бөтен егәрең, туплаган бар байлыгың сине бәладән коткарырмы?!

²⁰ Бөтен халыкларның җир йөзеннән юкка чыгар төнен көтмә!

²¹ Бозыклык юлына аяк басудан саклан, газаплар сиңа юкка гына бирелмәгән.

Аллаһының бөеклеге

²² Күрче: Аллаһының куәте никадәр бөек! Аның кебек берәр остаз бармы тагын?!

²³ Ничек эшләргә кирәклеген Аңа кем күрсәткән?! „Син дөрес эшләмәдең“, – дип, Аңа каршы кем әйткән?!

²⁴ Җырларда макталган Аның изге гамәлләренә мәдхияләр яудырырга син онытма.

²⁵ Аның эшләрен бар кеше күреп тора, гаҗәпләнеп читтән тамаша кыла.

²⁶ Шулай, Аллаһының бөеклеген аңлап бетерерлек түгел, Аның гомер хисабы санап бетергесез.

²⁷ Ул, су тамчыларын бергә җыеп, томаннан яңгыр туплый,

²⁸ болыттан яңгыр яудыра, кешеләрне ташкын сулар белән күмә.

²⁹ Болытларның агышын, Аллаһы чатырыннан чыккан күк күкрәү авазларын төшенергә кемнең хәленнән килер?!

³⁰ Болытларны Ул әнә балкышларга күмә, диңгез тирәнлекләрен караңгылык белән каплап куя.

³¹ Халыклар өстеннән Ул менә шул рәвешле хакимлек итә һәм аларга мул итеп ризыгын да бирә.

³² Аның кул очыннан яшен очып чыга – кайда кушса, шунда яшен суга;

³³ күк күкрәүләр Аның килүен хәбәр итә, хәтта хайваннар да Аның якынлашуын аңлый.