Әюб 35 - Изге Язма

Элиһуның өченче нотыгы Берсе дә: «Безне бар кылган Аллаһы кайда соң?» – димәс

¹ Сүзен дәвам итеп, Элиһу болай диде:

² «Синең „Аллаһы түгел, мин хаклы“ дигән сүзләрең дөрес дип уйлыйсыңмы?!

³ „Гөнаһ кылмаудан миңа ни файда һәм ни табыш?“ – дип сорасаң,

⁴ сиңа да, дусларыңа да болай диеп җавап бирәм:

⁵ күккә күтәрелеп кара, болытларны күзәт – алар синнән ничек биекләр!

⁶ Гөнаһ кылсаң, Аллаһыга моннан ни зарар?! Гаепләреңне арттырасың икән, Аллаһыга моннан ни зыян?!

⁷ Тәкъвалыгың Аңа ни бирә?! Синең кулдан нәрсә кабул итеп ала Ул?!

⁸ Яманлыгың бары адәм балаларына кагыла, дөреслегең дә бары кешеләр өчен генә.

⁹ Кешеләр җәбер-золымнан ыңгыраша, көчлеләр кулыннан коткару сорап кычкыра.

¹⁰ Әмма берсе дә: „Безне бар кылган Аллаһы кайда соң? Төннәрен безгә өмет җыры бүләк итүче кайда?

¹¹ Җир йөзендәге хайваннарга караганда безгә күбрәк акыл биргән һәм безне очар кошлардан зирәгрәк иткән Яратучыбыз кайда?“ – димәс.

¹² Мондыйларга, ыңгырашып кычкырсалар да, Аллаһы җавап бирми, чөнки аларның күңелләре тәкәббердер.

¹³ Аллаһы аларның ялваруын ишетми, Кодрәт иясе аларга игътибар итми.

¹⁴ Ләкин ничек итеп син: „Аны күрмим“, – дип әйтә аласың?! Синең дәгъваң Аның кулында – хөкемен көт!

¹⁵ Тагын син: „Аллаһы гөнаһларга дикъкать бирми, ярсуын түгәргә ашыкмый“, – дип әйтәсең.

¹⁶ Шулай авызы белән тегермән тарта Әюб, тиле сүз белән дөньяны тутырды».