Әюб 32 - Изге Язма

Элиһуның нотыклары

¹ Шул чагында әлеге өч ир бәхәсләшүдән туктадылар, чөнки үзенең хаклыгына Әюбнең иманы камил иде.

² Әмма Рам токымына караган, Бузның нәсел варисы Баракел углы Элиһу чыгырыннан чыкты. Әюбнең Аллаһыны түгел, ә бәлки үзен хаклы санавына ачуы килде аның;

³ «Әюб хаклы түгел», – дип санасалар да, аңа каршы дәлил таба алмаган Әюбнең дусларына да ачуы чыкты.

⁴ Элиһу Әюбкә сүз катарга ашыкмаган иде, чөнки тегеләр аннан олырак яшьтә иде;

⁵ ләкин бу өч ирнең әйтер сүзе беткәнне күргәч, ачуын баса алмады.

Элиһуның беренче нотыгы Олы яшькә җиткәннәр генә дөрес фикер йөртәме?!

⁶ Бузның нәсел варисы Баракел углы Элиһу болай диде: «Мин яшьмен, ә сез – өлкәннәр; шуның өчен дә каушап һәм куркып калдым, белгәннәремне сөйләмичә тордым.

⁷ Мин болай дип фикер йөрттем: ярар, әйдә, өлкәннәр сөйләсен, олы яшьтәгеләр акыл өйрәтсен.

⁸ Ләкин кешегә зиһенне аның рухы – Кодрәт иясенең сулышы бирә!

⁹ Яшен яшәгән кеше генә гакыллымы, олы яшькә җиткәннәр генә дөрес фикер йөртәме?!

¹⁰ Шулай булгач, хәзер инде мине тыңлагыз, белгәнемне мин дә әйтим!

¹¹ Мин сезне сабыр гына тыңладым, сез сүз сайлаган арада, фикер сөрешегезне аңларга тырыштым.

¹² Сүзләрегезнең асылына төшенергә тырыштым: сезнең берегез дә Әюбнең фикерен бәреп екмады, беркем дә аның сүзләренә җавап бирмәде.

¹³ „Без акыллы фикергә килдек: аны кеше түгел, ә бәлки Аллаһы фаш итсен!“ – дип әйтә күрмәгез.

¹⁴ Әюбнең сүзләре миңа юнәлмәгән, һәм мин аңа сезнеңчә җавап бирмәячәкмен.

¹⁵ Әюб, алар аптырашта калганнар, берни дәшмиләр, чөнки башка әйтер сүзләре юк;

¹⁶ аларның сүзләре беткән икән, нәрсә дип миңа көтеп торырга?!

¹⁷ Минем дә бит әйтер сүзем бар, белгәнемне мин дә әйтим.

¹⁸ Күңелемдә минем – сүзләр ташкыны, борчуларым тынгы бирми миңа,

¹⁹ әйтерсең лә, эчемдә шәраб кайный – шартлап ярылырга җиткән яңа турсык кебекмен.

²⁰ Әйтермен дә – җиңеләеп китәрмен; авызымны ачып җавап бирим.

²¹ Кемнең кем булуына карап тормастан, берәүгә дә ярарга тырышмыйча әйтәм.

²² Хәер, мин ялагайлана белмим дә, югыйсә Яратучым күптән юк итәр иде мине!