Әюб 18 - Изге Язма

Билдадның икенче нотыгы Яман кешегә якты ут та сүнә

¹ Шуахлы Билдад исә җавабында болай диде:

² «Кайчан бетәр сүздән бау ишүләрегез? Әүвәл уйлашыгыз – аннан сөйләшербез.

³ Нигә соң әле хайванга әйләнергә һәм синең күзеңә томана булып күренергә?

⁴ Син ачудан өзгәләнәсең – синең хакка әллә җир йөзе бушап калсын да, кыяташлар үз урыныннан кузгалсынмы?

⁵ Яман кешегә якты ут та сүнә, аның утыннан хәтта очкын да калмый,

⁶ чатырыннан яктылык китә, шәмдәлдәге уты да сүнә.

⁷ Адымнарының куәте кими аның, уй-ниятләре үз башына җитә.

⁸ Үз аягы белән тозакка барып керә ул, ау ятьмәсенә үзе килеп баса.

⁹ Үкчәсен кыл тозак эләктереп ала аның, гәүдәсен элмәк кысып тота.

¹⁰ Яшерен ау җебе сагалый аны, сукмагында капкын көтеп тора.

¹¹ Һәрьяклап дәһшәт яный аңа, эзенә басып куа килә.

¹² Бәла аны тотып йотарга тели, һәлакәт аның абынганын көтеп тора.

¹³ Аның тиресе чиргә азык булыр, тәнен үлем зәхмәте йотар.

¹⁴ Аны имин чатырыннан йолкып алырлар да дәһшәтләр патшасы каршысына алып китәрләр.

¹⁵ Аның чатырын ут ялмап алыр, йортына күкерт коелыр.

¹⁶ Астан аның тамырлары корыр, өстән ботаклары шиңәр.

¹⁷ Җирдә аны хәтерләүче калмас, урамда исемен дә телгә алучы булмас.

¹⁸ Яктылыктан караңгыга куып чыгарырлар аны, җир йөзеннән сөрерләр.

¹⁹ Үзеннән соң халкы арасында ни баласы, ни токымы калмас, беркеме дә калмас яшәгән җирендә.

²⁰ Аның язмышын ишетеп, көнбатыштагыларның коты очар, көнчыгыштагыларны да тирән курку биләп алыр.

²¹ Явызларның тораклары белән һәрчак шулай булыр, Аллаһыны танымаган кешенең язмышы шул булыр».