Әюб 12 - Изге Язма

Әюбнең дүртенче нотыгы Акыл-зиһен миндә дә бар

¹ Җавабында Әюб болай диде:

² «Шулай-шулай, сез барысын да белә торган! Сезнең белән бергә зирәклек тә үләр, ахры!

³ Зиһен-акыл миндә дә бар ул, сездән бер дә ким түгелмен. Сез белгәннәрне, йә, кем белми?!

⁴ Дусларыма мин мәсхәрәләү өчен бер зат булдым: Аллаһыны дәшеп чакырган һәм Аңардан җавап алган, гадел һәм күңеле саф булган кеше шулай мәсхәрә иясенә әйләнде.

⁵ Кайгы-хәсрәтсезләр бәлагә юлыккан кешегә мыскыллап карый, сөртенгәнне тагын да төртеп җибәрә.

⁶ Ә юлбасарларның чатырлары хәвефсез, Аллаһының ачуын китерүче тыныч яши – әйтерсең, Аллаһыны үз кулында күтәреп йөртә.

⁷ Хайваннардан сорап бак – алар аңлатырлар, очар кошлардан сора – сөйләп бирерләр,

⁸ туфрак белән киңәшеп кара – ул сиңа аңлатыр, хәтта диңгез балыклары телгә килер.

⁹ Бар нәрсәнең Раббы кулы белән эшләнгәнен аларның кайсысы белмәс?!

¹⁰ Һәр җан иясенең яшәеше, һәр кешенең сулышы – Аның иркендә.

¹¹ Тел-аңкау азык тәмен тойган кебек, колак та һәр сүзне сынамыймы?!

¹² Зирәклек – картларда, гакыл озак яшәгәннәрдә була.

Аллаһының кодрәте

¹³ Аллаһыда – һәм зирәклек, һәм кодрәт; Аңарда – киңәш-табыш һәм гакыл.

¹⁴ Аллаһы җимергәнне кеше кабат тергезә алмас, Әгәр Ул иректән мәхрүм итсә – кеше кабат ирек күрмәс.

¹⁵ Ул яңгырларны туктатса – корылык килер, яудырса – җир йөзен су басар.

¹⁶ Кодрәт тә, гакыл да – Аңарда, алданучы да, алдаучы да – Аның ихтыярында.

¹⁷ Мәслихәтчеләрне Ул, акылын алып, чарасыз итәр, хөкем итүчеләрне юләргә чыгарыр.

¹⁸ Патшаларның билбауларын тартып өзәр, шулар урынына кол чүпрәге бәйләп куяр.

¹⁹ Руханиларны дәрәҗәле урыныннан мәхрүм итәр, борынгы хакимнәр токымын бәреп төшерер.

²⁰ Ышанычлы мәслихәтчеләрнең телен кыскартыр, өлкәннәрнең зиһенен чуалтыр.

²¹ Аксөякләрне хурлык белән каплар, куәтлеләрне коралсыз калдырыр.

²² Караңгылык тирәнлекләрен ачар Ул, дөм караңгылыкта булганны яктыга чыгарыр.

²³ Халыкларның берсен югары күтәрер, берсен харап итәр Ул, кайсын җыяр, кайсын таратып бетерер.

²⁴ Халыкларның юлбашчыларын акылдан яздырыр, аларны юлсыз чүлдә куып йөртер –

²⁵ яктылыкның әсәре дә булмаган караңгыда, капшанып, исерекләр кебек, алпан-тилпән йөрер алар.