Әюб 11 - Изге Язма

Софарның беренче нотыгы Кодрәт иясенең бөеклеген белеп бетерә аласыңмы?!

¹ Нагамалы Софар болай дип сүз башлады:

² «Сүз куертучыга каршы әллә җавап юкмы?! Кем бик шома сөйли, әллә шул хаклымы?!

³ Син сафсата сатканда, башкалар тынып торсынмы?! Мыскыл иткәндә, сине туктатырлык адәм юктыр дисеңме?!

⁴ Син әйтәсең: „Мин дөрес фикер йөртәм һәм Аллаһы каршында пакь-чистамын“, – дип.

⁵ Аллаһы, телгә килеп, сиңа җавап бирергә теләсә иде,

⁶ сиңа зирәклекнең серләрен ачып салса иде! Чөнки чын зирәклек күпкырлы бит. Аңла: Аллаһы гөнаһларыңның кайберләрен күрми калырга булды.

⁷ Аллаһының тирән серләренә төшенә аласыңмы?! Кодрәт иясенең бөеклеген белеп бетерә аласыңмы?!

⁸ Ул бөеклек күкләрдән дә югарырак – син нәрсә генә эшли аласың? Үлеләр аймагыннан тирәнрәк – син нәрсә белә аласың?

⁹ Җир йөзеннән дә озынрак, диңгездән дә киңрәк.

¹⁰ Әгәр Ул, килеп, зинданга ябып куйса, мәхкәмә җыйса – Аны кем туктата алыр?!

¹¹ Ялганчыларны белә бит Ул: гөнаһ күргәч, игътибарсыз калдырырмы?!

¹² Кыргый ишәк кешегә әйләнергә мөмкин, әмма ахмакка беркайчан акыл кермәс.

Әгәр син йөрәгеңне Аллаһыга юнәлтсәң

¹³ Әгәр син йөрәгеңне Аллаһыга юнәлтсәң һәм, ялварып, кулыңны Аңа сузсаң,

¹⁴ кулыңны пычраткан бозыклыкны ташлый алсаң һәм өеңдә гаделсезлеккә юл куймасаң –

¹⁵ шул чагында оялмыйча йөзеңне күтәрә алырсың, курку белмичә аягыңда нык басып торырсың.

¹⁶ Шул чагында бар кайгыларың онытылыр, агып киткән сулар кебек тоелыр алар сиңа.

¹⁷ Тормышың көндезге нурдан да яктырак булыр, караңгылык таң белән алышыныр.

¹⁸ Алда өмет күреп тынычланырсың, тирә-юнең хәвеф-хәтәрсез булып, тыныч йокларсың.

¹⁹ Ятарсың тыныч – берәү дә сиңа янамас; һәм бик күпләр илтифатыңны эзләп килер.

²⁰ Ә яманнарның күзе томаланыр, алар сыеныр урын таба алмас, аларның бар өмете – соңгы сулышны алып үлеп китү».