Ешуа 15 - Изге Язма

Яһүдә ыругы җирләре

¹ Яһүдә нәселенә, аның барлык кабиләләренә жирәбә буенча чыккан җирләр көньяк тарафта Эдом төбәге чигенә, Сыйн чүленә кадәр сузыла.

^2-3 Яһүдә биләмәсенең көньяк чиге, Тозлы диңгезнең көньяк очындагы култыктан башланып, Акраббим үткеленең көньягыннан уза да Сыйн чүленә таба дәвам итә һәм Кадыш-Барниа шәһәренең көньягына күтәрелә. Аннары ул, Хесрон яныннан үтеп, Аддарга җитә дә Карка шәһәренә таба борыла.

⁴ Шуннан, Асмон яныннан узып, Мисыр чигендәге елга яры буйлап бара да диңгез буена җитеп тәмамлана. Аларның көньяк чикләре шушыдыр.

⁵ Көнчыгыш тарафтагы чик – Үрдүн тамагына кадәр Тозлы диңгез. Төньяк чик исә, Үрдүн елгасы коя торган диңгез култыгыннан башланып,

⁶ Бәйт-Хөглә шәһәренә таба күтәрелә дә Бәйт-Арабадан төньяктарак уза, аннары Рубин углы Бохан кыясына таба югары менә.

⁷ Шуннан ул Ахор үзәнлегеннән Дебиргә таба күтәрелә дә төньяк тарафка – тарлавыктан көньяктарак булган Адуммим үткеле каршындагы Гилгәл шәһәренә борыла һәм, Эн-Шемеш суы янына җитеп, Эн-Рогел чишмәсе буенда тәмамлана.

⁸ Шуннан Бен-Хинном үзәне буйлап югары менә дә, Явүснең (ягъни Иерусалимнең) көньягыннан үтеп, Хинном үзәненең көнбатышында, Рефаим үзәненең төньяк очында булган тау башына күтәрелә.

⁹ Тау башыннан чик сызыгы Нептоах суларына таба борыла да, Эфрон тавындагы шәһәрләргә җитеп, Багал (ягъни Кыръят-Ягарим) каласы ягына китә.

¹⁰ Багалдан соң ул көнбатыш тарафына, Сәгыйрь тавына таба борыла да, Ягарим (ягъни Кесалон) тавының төньяк битләвеннән узып, Бәйт-Шемеш шәһәренә төшә, Тимна шәһәре яныннан уза;

¹¹ Экрон шәһәре урнашкан тауның төньяк битләве буйлап баргач, Шиккерон каласына таба борыла һәм, Багал тавын үтеп, Явнеил каласына җитә дә диңгез буенда тәмамлана.

¹² Көнбатыш тарафтагы чик исә Бөек диңгез яры буйлап уза. Яһүдә ыругындагы нәселләргә бүлеп бирелгән биләмә җирләре менә шулардыр.

Кәлебнең үз өлешенә чыккан җирләрне яулап алуы

¹³ Ешуа, Раббы кушканча, Ифунни углы Кәлебкә Яһүдә угыллары биләмәсеннән өлеш чыгарды; бу өлеш – Анак атасы Арбаның Кыръят-Арба (ягъни Хебрун) шәһәре иде.

¹⁴ Кәлеб әлеге шәһәрдән Анакның өч нәсел варисын – Шешай, Ахиман һәм Талмайны куып чыгарды.

¹⁵ Аннары ул әүвәле Кыръят-Сәфәр дип аталган Дебиргә каршы яуга кузгалды.

¹⁶ – Кыръят-Сәфәргә һөҗүм итеп, аны яулап алучыга кызым Аксуны хатынлыкка бирәм, – дип белдерде Кәлеб.

¹⁷ Шәһәрне Кәлебнең ир туганы Кыназ углы Отниел яулап алды, һәм Кәлеб үзенең кызы Аксуны аңа хатынлыкка бирде.

¹⁸ Отниел янына күчеп килгәч, Аксу, иреннән рөхсәт алып, атасы Кәлебтән җир кишәрлеге сорарга булды. Аксу үзенең атланып килгән ишәгеннән төшкәч, Кәлеб аңардан: – Нәрсә телисең? – дип сорады.

¹⁹ – Фатихаңны күндер миңа, – диде Аксу. – Син миңа Нәгеб чүленнән җир бирдең, инде чишмәләр дә бирсәң иде. Шуннан Кәлеб аңа шул җирдәге югары һәм түбән чишмәләрне бирде.

Яһүдә ыругына тигән шәһәрләр

²⁰ Яһүдә ыругындагы нәселләрнең биләмә җирләре түбәндәгечә.

²¹ Эдом белән чиктәш Нәгебтә, көньякта, Яһүдә ыругына тигән шәһәрләр шушы булды: Кабсеил, Эдер, Ягур,

²² Кина, Димона, Адада,

²³ Кыдыш, Хатсор, Итнан,

²⁴ Зиф, Телем, Беалот,

²⁵ Хатсор-Хадатта, Кыръют-Хесрон (ягъни Хатсор),

²⁶ Амам, Шема, Молада,

²⁷ Хатсар-Гадда, Хешмон, Бәйт-Пелет,

²⁸ Хатсар-Шуал, Беер-Шеба, Бизиотия,

²⁹ Багал, Иим, Эсем,

³⁰ Элтолад, Кесил, Хорма,

³¹ Сыйкләг, Мадманна, Сансанна,

³² Лебаот, Шилхим, Аин һәм Риммун – тирә-яктагы авыллар белән барлыгы егерме тугыз шәһәр.

³³ Көнбатыш тарафтагы тау буйларында: Эштаол, Сорга, Ашна,

³⁴ Зануах, Эн-Ганним, Таппуах, Энам,

³⁵ Иармут, Адуллам, Сохо, Азыка,

³⁶ Шагараим, Адитаим, Гедера, ягъни Гедеротаим – тирә-яктагы авыллар белән барлыгы ундүрт шәһәр.

³⁷ Сенан, Хадаша, Мигдал-Гәд,

³⁸ Дилеан, Миспа, Йоктеил,

³⁹ Лахиш, Боскат, Эглон,

⁴⁰ Каббон, Лахмас, Китлиш,

⁴¹ Гедерот, Бәйт-Дагон, Нагама һәм Маккеда – тирә-яктагы авыллар белән барлыгы уналты шәһәр.

⁴² Либна, Этер, Ашан,

⁴³ Ифтах, Ашна, Несиб,

⁴⁴ Кыгыйлә, Акзиб һәм Мареша – тирә-яктагы авыллар белән барлыгы тугыз шәһәр.

⁴⁵ Әйләнә-тирәсендәге авыллар белән Экрон;

⁴⁶ Экроннан көнбатыштагы, Ашдод янындагы шәһәрләр һәм алар тирәсендәге авыллар;

⁴⁷ тирә-ягындагы авыллар белән бергә Ашдод һәм Газа, шулай ук Мисыр чигендәге елгага җиткәнче һәм Бөек диңгез буендагы барлык шәһәрләр.

⁴⁸ Таулы-калкулыклы җирләрдә: Шамир, Яттир, Сохо,

⁴⁹ Данна, Кыръят-Санна (ягъни Дебир),

⁵⁰ Анаб, Эштемога, Аним,

⁵¹ Гошен, Холон һәм Гило – тирә-яктагы авыллар белән барлыгы унбер шәһәр;

⁵² Араб, Думаһ, Эшан,

⁵³ Яним, Бәйт-Таппуах, Афека,

⁵⁴ Хумта, Кыръят-Арба (ягъни Хебрун) һәм Сиор – тирә-яктагы авыллар белән барлыгы тугыз шәһәр;

⁵⁵ Магон, Кәрмил, Зиф, Ютта,

⁵⁶ Изрегыл, Йокдегам, Зануах,

⁵⁷ Каин, Гибга һәм Тимна – тирә-яктагы авыллар белән барлыгы ун шәһәр;

⁵⁸ Халхул, Бәйт-Сур, Гедор,

⁵⁹ Магарат, Бәйт-Анот һәм Элтекон – тирә-яктагы авыллар белән барлыгы алты шәһәр;

⁶⁰ Кыръят-Багал (ягъни Кыръят-Ягарим) һәм Рабаһ – тирә-яктагы авыллар белән ике шәһәр.

⁶¹ Сахрада: Бәйт-Араба, Миддин, Секаха,

⁶² Нибшан, Ир-Мелах һәм Эн-Геди – тирә-яктагы авыллар белән барлыгы алты шәһәр.

⁶³ Әмма Яһүдә угыллары явүсиләрне Иерусалимнән куып чыгара алмадылар. Явүсиләр бүгенге көндә дә Яһүдә халкы белән бергә шунда яши бирәләр.