Амос 6 - Изге Язма

Ваемсыз һәм тәкәббер исраилиләргә – кайгы

¹ Сионда ваемсыз яшәүчеләр – кайгы сезгә! Самарея тавында үзегезне имин санаучылар – кайгы сезгә! Сез – беренчеләрдән саналган халыкның каймагы, исраилиләр, ярдәм сорап, яныгызга килгән түрәләр.

² Кәлне шәһәрен барып карагыз, аннан бөек Хаматка юл тотыгыз, пелештиләрнең Гәт шәһәренә төшегез – алар сезнең патшалыклардан яхшыракмы, җирләре сезнекеннән киңрәкме?!

³ Әй сез, бәла көне ерак дип санаучылар, сез бит аны – җәбер-золым көнен якынайтасыз!

⁴ Сез фил сөяге белән бизәлгән ятакларда ятасыз, түшәкләрегездә назланасыз, көтүдәге иң яхшы бәрән ите, утлаудагы иң симез бозау ите белән тукланасыз.

⁵ Үзегезне Давыт сыман оста уйнаучы күреп, лира чиртеп, төрле көй чыгарып утырасыз.

⁶ Сез касә-касә шәраб эчәсез, хушбуйның иң гүзәлен ягынасыз, әмма Йосыф токымы өстенә төшәсе бәлагә көенмисез.

⁷ Менә шуларның барысы өчен сез беренчеләрдән булып әсир китәрсез – назлыларның хушланып утыруы шулай тәмам булыр.

⁸ Хуҗа-Раббы Үз затыннан ант итә, Күкләр Хуҗасы Раббы болай ди: «Ягъкуб токымының тәкәбберлеген күреп җирәнәм, кальгаларына нәфрәтләнеп карыйм; аларның шәһәрен Мин бар мал-мөлкәте белән бергә дошманнары кулына тапшырачакмын!»

⁹ Берәр йортта унлап кеше исән калса, алары да үләр!

¹⁰ Кардәше, яндырмакчы булып, мәрхүмнең җәсәден алырга килгәч, өйнең аулак почмагына кереп поскан берәүне күреп: «Яныңда тагын берәрсе бармы?» – дип сораса, тегенең: «Беркем дә юк!» – дигән җавабына каршы: «Дәшмә! Раббы исемен без телгә алырга тиеш түгелбез!» – дияр.

¹¹ Менә, Раббы боерыр да, зур йортлар җимерелеп төшәр, кечеләре тәмам хәрабәгә әйләнер.

¹² Атлар кыяташ өстендә чабышырмы, үгез җигеп, кыяташны сөрерләрме?! Хәлбуки сез гадел хөкемне – зәһәр агуга, хаклык җимешен әче әремгә әйләндерәсез.

¹³ Сез Ло-Дебар шәһәренең җиңелүенә куанасыз, «Карнаим шәһәрен үз көчебез белән яулап алдык!» – дисез.

¹⁴ Әмма Күкләр Хуҗасы Раббы: «Әй исраилиләр! Сезгә каршы бер халыкны котыртачакмын, – ди, – һәм сез Лебо-Хаматтан башлап Араба үзәненә кадәр сузылган җирләрдә җәбер-золым эчендә яшәрсез!»