Ачылыш 7 - Изге Язма

Мөһер сугылган йөз кырык дүрт мең кеше

¹ Шуннан соң мин җирнең дүрт почмагында торучы дүрт фәрештәне күрдем. Алар, җиргә, диңгезгә һәм бер генә агачка да исмәсен дип, җирнең дүрт җилен тотып торалар иде.

² Мәңге тере Аллаһының мөһерен кулында тотып, көнчыгыштан күтәрелеп килүче башка фәрештәне күрдем. Ул җиргә һәм диңгезгә зыян китерергә вәкаләт бирелгән дүрт фәрештәгә көчле тавыш белән кычкырып эндәште:

³ «Без Аллабыз колларының маңгайларына мөһер сукканчы, җиргә, диңгезгә һәм агачларга зыян китермәгез».

⁴ Мин мөһер сугылган кешеләрнең санын ишеттем. Исраил ыругларының барысы арасыннан бер йөз кырык дүрт мең кеше мөһерләнгән иде:

⁵ Яһүдә ыругыннан унике мең кеше, Рубин ыругыннан унике мең кеше, Гәд ыругыннан унике мең кеше,

⁶ Ашер ыругыннан унике мең кеше, Нәптали ыругыннан унике мең кеше, Менашше ыругыннан унике мең кеше,

⁷ Шимун ыругыннан унике мең кеше, Леви ыругыннан унике мең кеше, Исәсхәр ыругыннан унике мең кеше,

⁸ Зәбулун ыругыннан унике мең кеше, Йосыф ыругыннан унике мең кеше, Беньямин ыругыннан унике мең кеше мөһерләнде.

Ак киемле зур халык төркеме

⁹ Шуннан соң, бихисап күп кешене күрдем. Аларны һичкем санап чыга алмас иде! Алар һәр милләттән вә кабиләдән, һәр халыктан вә төрле телләрдә сөйләшүчеләрдән иде. Ак киемле ул кешеләр, кулларына хөрмә ботаклары тотып, тәхет һәм Бәрән алдында басып торалар иде.

¹⁰ Алар көчле тавыш белән: «Котылу тәхеттә утыручы Аллабыздан һәм Бәрәннән килә!» – дип кычкырдылар.

¹¹ Тәхет тирәли, өлкәннәр һәм дүрт җан иясе тирәли баскан фәрештәләр тәхет алдында йөзтүбән капланып, Аллаһыга табынуларын әйттеләр:

¹² «Амин! Аллабызга мактау һәм дан, тирән гакыл һәм рәхмәт, хөрмәт, кодрәт һәм куәт мәңге-мәңгегә булсын! Амин».

¹³ Шунда өлкәннәрнең берсе миннән: «Ак киемле кешеләр кемнәр алар һәм каян килгәннәр?» – дип сорады.

¹⁴ Мин аңа: «Әфәндем, син беләсең», – дидем. Ул миңа болай диде: «Алар бөек афәт кичереп килгәннәр. Киемнәрен Бәрәннең каны белән юып агартканнар.

¹⁵ Шуңа күрә алар Аллаһы тәхете алдында торалар, Йортында Аңа көне-төне хезмәт итәләр. Тәхеттә Утыручы алар өстендә Үзенең саклап торучы чатырын корыр.

¹⁶ Алар һичкайчан ачыкмаслар, һичкайчан сусамаслар. Аларны кояш та, эсселек тә көйдермәс инде,

¹⁷ чөнки тәхет уртасындагы Бәрән аларга Көтүче булыр, аларны тереклек суы чишмәләренә алып барыр. Аллаһы аларның һәрбер күз яшен сөртер».