Matta 10 - Ǝlinjil ǝn Ɣaysa Ǝlmǝsix

Ǝzǝmmizǝl ǝn nǝttulab win maraw d ǝššin

¹ Iɣra-du Ɣaysa ǝs man-net inǝttulab-net win maraw d ǝššin, ikf-en tarna n ikus ǝn kǝlǝsuf daɣ aytedan, d ǝzuzǝy n a tǝqqal tǝwǝrna, d a iqqal ǝlɣib.

² Ǝntanay da esmawan ǝn nǝmmuzal win maraw d ǝššin: Wa azzaran esǝm-net Simɣon, itawann-as Butros, d Andrawǝs wa n amadray-net, ǝd Yaqub wa n ag Zabaday, ǝd Yaxya wa n amadray-net,

³ ǝd Filibus, ǝd Bartulamawǝs, ǝd Tuma, ǝd Matta wa izarzaman takǝsen, ǝd Yaqub wa n ag Alfay, ǝd Tadday,

⁴ ǝd Simɣon was itawannu wa Isaggatakken, ǝd Yahuza was itawannu Isxarǝyuti s ǝnta a zʼagin Ɣaysa daɣ fassan.

Ǝsǝssǝɣri wa n ǝššin: Ǝššǝɣǝl ǝn nalkiman d alɣazab-nasan Ammaran win iga Ɣaysa inalkiman-net

⁵ Ǝntanay da da maraw nǝttulab d ǝššin win izammazal Ɣaysa dǝffǝr as tan-omâr inn-asan: «Ad wǝr tǝtakkim aytedan win wǝr nǝmos Kǝl-Ǝlyǝhud, wala deɣ tǝggǝzam aɣrǝm waliyyan ǝn Kǝl-Samarǝya.

⁶ Kalar akkiwat Kǝl-Israyil, win ǝmosnen zun ayfǝd ǝssiggalnen.

⁷ Agliwat a dasan-tǝtaggim isalan n âs Taɣmar ta n jǝnnawan tǝhôz-du.

⁸ Zuzǝyat imiranan, a du-tǝsankaram inǝmmǝttan, tǝzzuzǝyam aytedan win igraw kǝtru, tǝzzǝzdǝgam-tan, ad tǝtâkkasam kǝlǝsuf daɣ aytedan. Bannan as tǝtawakfam, daɣ adi kawanay da hakkiwat bannan.

⁹ Ad wǝr tǝtawayam urǝɣ, wala azrǝf, wala deɣ a tǝqqǝl tafelt daɣ nǝfdan-nawan,

¹⁰ wala deɣ aɣrǝg daɣ ǝšikǝl-nawan, wala tǝkadkat ta n sanatat, wala tǝsǝsǝlt ta n sanatat, wala tallaq. Ǝssǝnat as edag tosam ad tǝtǝwǝsǝmǝgurem fǝlas imaššaɣalan-in a tǝmosam, amaran amaššaɣal kul ila alxaq n ad igrǝw a itša.

¹¹ As du-tǝggazam aɣrǝm, madeɣ taɣrǝmt, tǝgmǝyam awedan wa inahaggan d a ɣur-ǝs tǝssǝgǝnam, taqqamim ɣur awedan wǝdi da har assaɣa a daɣ tǝgmadam aɣrǝm wǝdi.

¹² As du-tǝggazam ehan tannim: "Alxer fall-awan!"

¹³ Kud aytedan n ahan wǝdi nihaggan d a ɣur-san tǝssǝgǝnam, wǝdi tǝwatray n alxer ta dasan-tǝgam a fall-asan tǝqbǝl, mišan as wǝr nahaggan d a ɣur-san tǝssǝganam, wǝdi tǝwatray ten wǝr za tǝqbel fall-asan.

¹⁴ As wǝr tǝtawaqbalam, wǝr itawasasam deɣ i batu-nawan daɣ ǝɣrǝm wǝdi, made daɣ aɣaywan wǝdi, tǝgmadam-tu, tabbakbakam-in ǝgodrar-net wa iwaran idaran-nawan.

¹⁵ Ǝggǝyyeɣ ǝsilakanaɣ-awan as, ǝzǝl wa n tabadday, aytedan n ǝɣrǝm wǝdi, ad agin alɣazab ogaran wa zʼagin win amaḍal ǝn Sǝdom ǝd Gamora.»

Amagrad ǝn Ɣaysa s awa zʼigrǝwan inalkiman-net

¹⁶ «Ǝssǝnat as zimazalaq-qawan tǝmosam zun ayfǝd ǝhânen ammas ǝn ridalan, daɣ adi iliwat tayttay tagim ǝnnǝyat zun awa tagginat taššolen, talim ǝd tǝdǝbren a wǝr iwer a imosan lahan.

¹⁷ Ǝnkǝdat y aytedan, fǝlas a kawan-ǝssǝbdǝdan dat saggawaran n ǝššǝriɣa, a kawan-ǝggatan ǝs lǝkkad daɣ nan n ǝlɣibada ǝn Kǝl-Ǝlyǝhud.

¹⁸ Ad tǝtǝwǝsǝbdǝdam dat naxkiman ǝd mǝnokalan fǝlas kawan-iwar esǝm-in, tǝqqǝlam šiggǝyyawen-in y-asan ǝntanay d aytedan win wǝr nǝmos Kǝl-Ǝlyǝhud.

¹⁹ Mišan assaɣa wad za tǝtǝwǝggim daɣ fassan, a kawan-wǝr-iššǝwǝš ǝmmǝk was za tǝššiwǝlam, wala deɣ awa za tannim, fǝlas arat wa za tannim a fall-awan d-azzabbat daɣ amazay wa da daɣ tǝram tǝnna-net,

²⁰ id wǝrge kawanay a zʼiššǝwǝlnen, kalar Infas wa Zǝddigan n Abba-nawan, a daɣ-wan išawalan.

²¹ Ad sǝttǝrmǝsan aytedan imǝdrayan-nasan sǝssugin iman-nasan, sǝttǝrmasan abbatan bararan-nasan sǝssugin iman-nasan, affallagan bararan fǝl marwan-nasan sǝssugin iman-nasan.

²² Awedan kul a kawan-igzǝr fǝlas kawan-iwar esǝm-in, mišan wa daɣ-wan izmaran har tǝzǝrǝst, wǝdi ad iɣlǝs.

²³ As tǝtawasasam daɣ ǝɣrǝm taddarragam s iyyan. Ǝggǝyyeɣ ǝsilakanaɣ-awan as wǝr du-za-tǝɣrǝdam iɣǝrman n Israyil harwa da as du-z-ǝqqǝla nak Ag Aggadǝm.»

²⁴ «Attalami wǝr oger ǝššex-net, wala deɣ ogar ǝkli mǝššis.

²⁵ Igda y attalami ad agdu d ǝššex-net, akli deɣ igd-as ad agdu ǝd mǝššis. Dad zamas ǝmuzar n aɣaywan ǝgan-as esǝm Aššaytan ǝn Baɣalzabul, manǝmmǝk as wǝr zʼagin arak batuten i kǝl aɣaywan-net?»

A kawan-wǝr-tǝggǝz tasa

²⁶ «Daɣ adi a tan-wǝr-tiksadam. Arat kul wa iɣbaran ad itǝwǝsǝnǝfilǝl, amaran ǝssir kul ad affaggu.

²⁷ Arat wa dawan-ǝnne daɣ šiyyay, anniwat-tu ezal a mallan. Amaran arat kul wa dawan-itawasataktakan anniwat-tu s afalla.

²⁸ Ad wǝr tiksadam win naqqinen taɣǝssa n awedan ɣas, amaran wǝr ǝfregan aɣšud ǝn wala i man-net. Kalar iksadat Mǝššina a ifragan ahluk ǝn tǝɣǝssa harkid man, aggadl-en daɣ Jahannama.

²⁹ Awak wǝrgeɣ ǝššin gǝḍad tefelt iyyadda a nazzan? Dǝr iga awen da za, wǝr tan-iha i zʼǝgmǝdan man ar ǝs turagat n Abba-nawan Mǝššina.

³⁰ Kawanay amaran wala anzadan ǝn ɣafawan-nawan da kul ǝḍḍunan.

³¹ Daɣ adi ad wǝr tiksadam wala, fǝlas ɣur Mǝššina togaram igǝḍad ǝlqimat!»

Ɣaysa ilas awal daɣ batu n awa zʼagin fǝl nalkiman-net

³² «Awedan kul wa iggǝyyen dat aytedan as nak a t-ilan, wǝdi nak da a fall-as aggayyeɣ dat Abba-nin ihan ijǝnnawan.

³³ Mišan wa di-inkuran dat aytedan, wǝdi nak da ad t-unkaraɣ dat Abba-nin ihan ijǝnnawan.»

³⁴ «Ad wǝr tǝɣilam assa a d-ǝgeɣ ewâya-du alxer s ǝddǝnet: kala kala wǝr d-ewayaɣ alxer, ǝmǝgǝr a d-ewaya.

³⁵ Ose-du y ad zǝnnǝmǝzrǝyaɣ alǝs d abba-net, zǝnnǝmǝzrǝya tǝbarart d anna-net, zǝnnǝmǝzrǝya deɣ tǝdaggalt ǝd tǝntut ǝn barar-net,

³⁶ ǝqqǝlan kǝl aɣaywan n awedan izǝnga-net.

³⁷ I igan y abba-net madeɣ anna-net tara togarat ta di-iga, wǝdi wǝr ihor ǝd tišit n ǝnalkim-in. I igan i barar-net madeɣ tǝbarart-net tara togarat ta di-iga, wǝdi wǝr ihor ǝd tišit n ǝnalkim-in.

³⁸ I wǝr nǝdkel tǝgǝttawt-net, agu imateran-net, ilkǝm-i, wǝdi wǝr ihor ǝd tišit n ǝnalkim-in.

³⁹ Awedan wa wǝr nǝkǝttǝw ar iman-net daɣ ǝddǝnet ta, wǝdi ad affatu daɣ alaxirat. Amaran wa iqbalan ad isaffatu iman-net daɣ ǝddǝnet ta fǝl ǝddǝlil-in, wǝdi a tan-igrǝw.»

⁴⁰ «I dawan-igan isǝxlak, wǝdi nak as tan-iga, amaran i di-tan-igan, wǝdi wa di-d-izammazalan as tan-iga.

⁴¹ I igan isǝxlak y ǝnnǝbi ǝn Mǝššina fǝl tišit-net ǝnnǝbi, wǝdi ad igrǝw arozan win igarraw ǝnnǝbi. Amaran i igan isǝxlak y alɣadil ǝn Mǝššina, fǝl ǝddǝlil ǝn tǝlɣudǝla-net, wǝdi ad igrǝw arozan win igarraw alɣadil.

⁴² Ǝggǝyyeɣ ǝsilakanaɣ-awan as, i iššǝšwan wala ablu n aman sammodnen y iyyan daɣ nalkiman-in win ogarnen tǝmmǝdrǝyt, fǝlas imos ǝnalkim-in, wǝdi illikan as ad igrǝw arozan-net.»