Luke 23 - Thet1 မှနောက်အာ တရားလွတ်တော်ဝါစုဝေးဟေကား လူအပေါင်းရက်စာ ကိုယ်တော်ယေရှုငင် ရောမဘုရင်ခံပိလတ်ထနဲ့ အော်လားကလင်ဂို့။ 2 မှလူးနာ တိုင်းသူပြည်သားရက်အင် အပါးနာဂါအပါးနာ ကယ်တင်ရှင်မေရှိယငါဟေကား ဘုရင်တစ်ပါးဖြစ်ဟေ ငါးဂို့ လှည့်ဖြားပြိစ်ကို ဧကရာဇ်မင်ငင် အခွန်အဆက်သကဇိစ် တားမြစ်တုန်းဟေကား ငါရက်ပိုဒက်ဟေ" ငါးဂို့ ပိလတ်ကရှေ့အာ ကိုယ်တော်ငင် စွပ်စွဲပြိစ်လင်ကဟေ။ 3 အိမ်မအခါ ပိလတ်ဘုရင်ခံနာ ကိုယ်တော်ယေရှုငင် "နင်နာ ဂျူးရက်က ဘုရင် ရိဟေလဲ" ငါးဂို ကတာလင်ကရပ် ကိုယ်တော်နာ "နင်ဂါ ငှားကားအတိုင်း ဖြစ်ဟေ" ငါးဂို့ ပြန်းဖြေလင်က ဟေ။ 4 ပိလတ်ဘုရားခံနာ ဂျူးပုရောဟိတ်အကြီးအကဲရက်အိမ် လူးထုဘက်အာလှည့်ဂို့ "မှလူးထနဲ့ အပြစ်ဆူဝါးယေ့ ငါအပိုပါ(လ်)" ငါးဂို့ ငှားနက်ကယေ့ 5 အိမ်မလူးစုတ်ရက်နာ "မှာလူးနာ ဂါလိလဲပြည် ယာဘင်းစကို ပြည်သူလူထုယင် ရုတ်ရင်းဆန်ခတ်ဖြစ်မနီး လှုံဆော်ဗန်(ဖ်)ကား အတတ် မနေရာယေ့ ဗန်(ဖ်)ကိုလိစ်တုန်းဗာ(ဖ်)ဟေ" ငါးဂို့ အခိုင်အမာငှားတုန်းလင်ကဟေ။ 6 အိမ်ဒေလေပြိစ်တုန်းက ပိလတ်တတ်ဟေကားခါ "မှလူးနာ ဂါလိလဲပြည်သားလဲ" ငါးဂို့ ကတာကို 7 ဟေရုဒ်အုပ်စိုးဟေကား ဂါလိလဲနယ်ကဖြစ်ဟေကအကြောင်း ချေးဟေကအခါ အိမ်မာအ ချိန်ယာ ဂျေရုဆလင်မြို့ယာ ထုန်တုန်းဗာ(ဖ်)ကား ဘုရင်ခံဟေရုဒ်ကမား ကိုယ်တော်ယေရူယင် ပါ(လ်) နက်လင်ကဟေ။ 8 ဟေရုဒ်နာ ကိုယ်တော်ယေရှုကအကြောင်းငင် တတ်ပီကို့ ပိုကက်ကနာ ကြားနန်ဖြစ် ကအကြောင့် ကိုယ်တော်ငင် ပိုဟေကရပ် တဗျင်းပျော်လင်ကဟေ။ အမာစာ ကိုယ်တော်ယေရူ လိစ်ဟေကား အံ့ဖွယ်အမူအရာဆူးဝါပါဆာ ပိုကဇိစ် မျှော်လင့်တုန်းလင်ကဟေ။ 9 မှအကြောင့် ဟေရုဒ် နာ ကိုယ်တော်ငင် မေးခွန်းဘောင်းကိုကတာကယေ့ ကိုယ်တော်နာ တစ်စုံတစ်ရာယေ့ ဖြေဟေကား အငါပါ(လ်)။ 10 မှနောက်အာ ဂျူးပုရောဟိတ်အကြီးအကဲရက်အိမ်ကျမ်းတတ်ဆရာရက်နာ စက်ဂို့ ကိုယ်တော်ငင် ပြင်းထန်စွာစွပ်စွဲလင်ကဟေ။ 11 ဟေရုဒ်အိန်း အမာဂါရဲမက်ရက်နာ ကိုယ်တော်ငင် လှောင်ပြောင်ဂို့ အနေးလင်ကို ကိုယ်တော်ငင် တန်ဖိုးပြောင်ဟေကားအဝတ်အင် တုဇိစ်ဂို့ ပိလတ်ဘုရင်ခံ ထနဲ့ ပြန်းပို့လင်ဂါဟေ။ 12 ဟေရုဒ်အိမ်ပိလတ်ရက်နာ မလားကရပ် ရန်သူဖြစ်တက်ကယေ့ အိမ်မာရယက်အာက(လ်) မိတ်ဆွေအဖြစ် ထုန်ကလင်ဂါဟေ။ 13 ပိလတ်ဘုရင်ခံနာ ဂျုးပုရောဟိတ်အကြီးအကဲရက်၊ ဂျူးဘာသာရေးခေါင်းဆောင်ရက်အိမ် လူထုပရိသတ်ရက် စုဝေးဇိစ်ကို 14 "မှလူးနာ ဆူပူမှုဖြစ်စရောက်မှလှုံ့ဆော်တုန်းဟေငါ့ကို့ နနိန်ရက် ပြိစ်ကို ငါထနဲ့အော်လာကန်ကအတွက် နနိန်ရက်ကအရှေ့မယ် ငါအမင် စစ်ဆေးဒက်ကယေ့ နနိန်ရက် စွပ်စွဲကဒေလေ အပြစ်ရက်ကျူးလွန်ပီးဟေက အပိုပါ(လ်)။ 15 ဟေရုဒ်ယေ အမင် အပြစ်ဆုံးဂို အပိုကို့ ဆူးယေ့ကအပြစ်ဒဏ်အအီထမ်း ငါကမားပြန်ကိုပါ(လ်)ဝန်ဟေ။ မှလူးထနဲ့ ဆိန်းသင့်ဟေက အပြစ်တစ် စုံတစ်ရာအငါကား ထင်ရှားဟေ။ 16 မှကြောင့် အမင် ကြိမ်ဒဏ်အီဂို့ ပြန်ကိုဖြောက်နက်က"ငါ့ကို ငါ့လင်ကဟေ။ 17 ပိလတ်နာ အိမ်ဒေလေငါ့ပိုကနာ ပွဲတော်ရယက်အာ လူးဟူးဝါးဇီ ဖြောက်အီဟေကား ထုံးစံကြောင့်ဖြစ်ဟေ။ 18 ဆို့ဆော် လူထုဆန်းစူရက်နာ "အမင်ကတိုက်ကို "ဗာရဗ္ဗ" ငင် လွတ်အီယန်" ငါဂို တစ်ပြိုင်တည်း ဟော်ဂိုတောင်းဆိုလင်ကဟေ။ 19 အတတ်ကအခါ "ဗာရဗ္ဗ"နာ မြို့ထဲယာ ဖြစ်ပျက်ဒက်က ပုန်ကန်မူအိမ် လူသတ်မှုရက်အင် ကျူးလွန်ဟေကလူးဖြစ်ကို အကျဉ်းထောင်ထဲငါ အပြစ်ဒဏ် ဟြိုက်တုန်းလင်ကဟေ။ 20 ပိလတ်နာ ကိုယ်တော်ယေရှုငင် လွှတ်အီကဇိစ် အလိုငါဟေက အကြောင့် လူထုအိမ် ဘာသာရေးခေါင်းဆောင်ရက်အင် အယောက်ဟက်တာ ကတာလင်ပီကဟေ။ 21 ဆို့ဆော် အမာရက်နာ "အမင် လက်ဝါးကပ်တိုင်ယာတင်ငင်"၊ ငါးဂို့ ဆက်လက်ဂို တောင်းဆိုတုန်း လင်ဂါဟေ။ 22 အိမ်မအခါ ပိလတ်နာ "အမှာနာ အဆာမီကပြစ်မှုမျိုးငင် ကျူးလွန်ဒက်ကိုယား။ အမင် သေဒဏ်အီပေါဇရိုးမှက အပြစ်ဆုံးဂို အလူပါ(လ်)။ မှအကြောင့် အမင်ဆုံးမကို လွတ်အီနက်ကား"ငါ့ကို တတိယအကြိမ်ထပ်မံကို ငါ့လင်ကဟေ။ 23 ညီးင့ဒင့်ယေ့ လူထုပရိတ်သတ်ရက်အ(လ်) ကိုယ်တော် ယေရှုငင် သေဒဏ်အီကအတွက်မယ် ကျယ်လောင်စွာ ဟော်လင်ဂါဟေ။ 24 နောက်ဆုံးငါ လူထုပရိသတ်ရက်ကတောင်းဆိုကအတိုင်း ပိလတ်ဘုရင်ခံယေ့ လိုက်လျှောအီကို 25 အမာစာ လူထုပရိသတ်နာ ဖြောက်ဇိစ်ကက်ကား ပုန်ကန်မူအိမ် လူသတ်မူရက်အင် ကျူးလွန်ကို အကျဉ်းထောင် ထဲယာ ပြစ်ဒဏ်ဟြတ်တုန်းကလူး ရာဇဝတ်သား ဗာရဗ္ဗယင် လွတ်အီနက်ကို ကိုယ်တော်ယေရူယင် အိမ်မားလူးရက်က သဘောဆန္ဒအတိုင်း လိစ်ကဇိစ် အမာရက်ကမား အက်လင်ကဟေ။ 26 ရဲမတ်ရက်စာ ကိုယ်တော်ယင် အော်လားကလင်ကရပ် ကုရေနေအရပ်အာဘင်း ရှိမုန်ငါဟေက လူးနာ လယ်ဒါဘင်းပြန့်ငန်က ပိုဟေကရပ် အမင် ရိန်ကို ကိုယ်တော်ကအလိုဝါ လက်ဝါးကပ်တိုင်းငင် ဖေးကိုယောဇိစ်လင်ကဟေ။ 27 လူးအမြောက်အမြားအိမ်တကွ ကိုယ်တော်ကအတွက် ရင်ဘက်အင် ပေါက်ကို ဟြရ်တုန်းကား တာဆာလောင်ရက်အ(လ်) ကိုယ်တော်ကအလိုဝါ ယောလင်ကဟေ။ 28 ကိုယ်တော်နာ အိမ်မားလူးရက်ကဘက်အာလှည့်ကို "ဂျေရုဆလင်က တာဆာလောင်ရက်၊ ငါက အတွက်အဟြရ်အဲ့။ နနိန်ရက်အိမ် နနိန်ရက်ကအဆာ၊ဆာအိကအတွက်မယ် ဟြရ်အင်း။ 29 "ဘင်းစားမက် တာဆလောင်a၊ ကိုယ်ဝန်အဆောင်ဟြာကအပိအိန်း အစုပ်အတိန်ဟေကားသားမြတ်ရက်နာ ကံမီဟေ' ငါ့ကို လူးရက်နာ ပြိစ်လင်ပိုကားရယက် ထုန်ဗာ(ဖ်)လင်ကဟေ။ 30 အိမ်မကာလထုန်နဲ့က(လ်) လူးရက် နာ တာဂိုးရက်အင် "ငါရက်က အဖုံးငါဟြန်အန်"ငါ့ကို တောင်ကုန်းရက်အင်ယေ့ "ငါရက်အင် ဖုံးအုပ်အန်' ငါ့ကို ငါ့လင်ကား။ 31 စိမ်းလန်းကအဖင်းရက်တလေ အပြစ်ကင်းစင်ဟေကား ငါကအဖုံးငါဒင့် အတတ်ကဒေလေက ဆိုးရွားကအူဇာရက်ဖြစ်တုန်းနဲ့က(လ်) ရကူ(ဖ်)ဟေကအဖင်းရက်တလေ အပြစ်ဒုစရိုက်သမားရက်ဖြစ်ဟေကား နနိန်ရက်ကအဖုံးငါ အဆာတတ်ပိုကို ဆိုးရွားလင်ကယား" ငါ့ကို ငါ့လင်ကဟေ။ 32 အယိုကားရာဇဝတ်သားနိမ့်ဟူးယေ့ ကိုယ်တော်အိန်မက်တာ သေဒဏ်အီကဟင်းက ဇိစ် အော်လားကန်ကဟင်းလင်ပိုကဟေ။ 33 အဟူးခွံဂါးဂို့ အမိန်းငါဟေကား တာဂိုးဖုံးငါ ထုန်နဲ့က(လ်) ကိုယ်တော်ငင် လက်ဝါးကပ်တိုင်းဖုံးငါတင်ဂို့ ဇေ့နက်လင်ကဟေ။ ကိုယ်တော်က ဟက်တာစီယာ ရာဇဝတ်သားနိမ့်ဟူးယေ့ ကိုယ်တော်က ပုတ်ဆလက်ဖက်အာဟူးဝါး၊ ပေလက်ဖက်ညာဟူးဝါး လက်ဝါးကပ်တိုင်းဖုံးငါတင်ဂို့ ဇေ့နက်လင်ကဟေ။ 34 မှအခါ ကိုယ်တော်နာ "အဗား(ဖ်)ဘုရားရှင်၊ အမှာ ရက်နာ အပါနာကအပါနာ အဇာလိစ်တုန်းဟေကားငါ့ကို အချေးကအတွက် အမှာရက်အင် ခွင့်လွှတ် အီယန်နက်နိမ့်" ငါးဂို့ ဆုတောင်းလင်ဟေ။ ရဲမက်ရက်နာ ကိုယ်တော်ဂါအဝတ်ရက်အင် လောင်းကစား လိစ်ကိုး ခွဲလာလင်ကဟေ။ 35 လူးရက်နာစက်ဂို့ ယူးတုန်းဂါရပ် အကြီးအကဲရက်နာ ကိုယ်တော်ယေရှုငင် လှောင်ပြောင်ဂို့ "အမှာနာ တစ်ခြားလူးရက်အင် ကယ်တင်ဒက်ဟေ။ တကယ်လို့ အမှာနာ ဘုရားရှင်ရွေးချယ်ပီက မေရှိယမှန်နဲ့က(လ်) အမာဂါအမာကယ်တင်လင်နူ(ဖ်)" ငါးဂို့ ငှားလင်ကဟေ။ 36 ရဲမက်ရက်အ(လ်) ကိုယ်တော်ငင် လှောင်ပြောင်ဂိုး ဝိုင်ချဉ်ငင် တိမ်ဂို့ 37 "နင်နာ ဂျူးလူမျိုးရက်က ဘုရင်ငါ့နဲ့က(လ်) အပါးနာကအပါးနာ ကယ်တင်ငင်" ငါးဂို ငှားလင်ကဟေ။ 38 ကိုယ်တော်ကအဟူးဖုံးငါယေ့ မှလူးစာ ဂျူးရက်ကဘုရင်ဖြစ်ဟေ'ငါ့ကို ကမ္ပည်းရေးပီကား ဆိုင်းဘုတ် အင် ချိတ်လင်ကဟေ။ 39 လက်ဝါးကပ်တိုင်ဖုံးငါ ချိတ်ဆွဲကဟင်းပိုကား ရာဇဝတ်သားဟူးဝါးနာ ကိုယ်တော်ငင် 'နင်နာ' 'ကယ်တင်ရှင်မေရှိယ' ငါနဲ့က(လ်) အပါးနာကအပါးနာ ကယ်နက်ကို ငါရက်အင် ယေ့ ကယ်ယန်" ငါးဂို ကဲ့ရဲ့ဂို ငါ့လင်ကဟေ။ 40 ဆိုဆော် အယိုးကားရာဇဝတ်သားဟူဝါးနာ အိမ်မလူးငင် "နင်နာ မှလူးအိမ်မက်တာအပြစ်စီရင်ကဟင်းတုန်းပိုကဒင့် ဘုရားရှင်ငင် အစက်လဲ။ 41 ငါ့ရက်နာ အပြစ်လိစ်ပီကအတွက် အပြစ်ဒဏ်ဟင်းဂါဇိစ် ထိုက်တန်ဟေ။ ညီးင့ဒင့်ယေ့ မှလူးက(လ်) ဆူယေ့က အပြစ်ကျူးလွန်ပီကအငါ့ပါ(လ်)"ငါးဂို့ ငှားနပ်ကဟေ။ 42 မှနောက်အာ အမှာနာဆက်ဂို ကိုယ်တော် ယေရှုငင် "နင်နာ ရှင်ဘုရင်တစ်ပါးအဖြစ် အုပ်စိုးကဇိစ် ပြန်ငန်ကရပ် ငင်ယင် သတိလှုယင့်" ငါးဂို့ လျှောက်တင်လင်ကဟေ။ 43 အိမ်မအခါ ကိုယ်တော်ယေရှုနာ "နင်ငင် ငါအမှန်ငန်းဂါ။ နင်နာ ယက်တင့် ငါအိန်းမက်တာ " ပရဒိသုဘုံ"c ငါ ငန်ကား" ငါးဂို ငှားလင်ကဟေ။ 44 အိမ်မအချိန်နာ နေမွန်းတည်းချိန် ဖြစ်ကယေ့ နက်တပ်ဖက်သုံးနာအထိ ကမ္ဘာတစ်ခွင်လုံးငါကား ကောင်းကလက်နာ မှောင်တုန်းလင်ကဟေ။ 45 စမိတ်ကအလင်းရောင်ယေ့ ပျောက်ကလင်ကို့ ဗိမာန်တော်ဝါ ငါဟေကား အမြင့်မြတ်ဆုံးနေရာယင် ဖုံးအုပ်ပီကား ကန့်လန့်ကာပြောင်စာ နှစ်ခြမ်းပီက လင်ကဟေ။ 46 ကိုယ်တော်ယေ ဟော်ကို "ငါကဝိညာဉ်ယင် အဗာ(ဖ်)ဘုရားကတာဟူးငါ အက်နက် အန်ဟေ"ငါ့ကို ငါ့ကျီးကရပ် အဆက်မုန်ဖြောက်လင်ကဟေ။ 47 မှအဖြစ်အင်ပိုဟေကား ရောမတပ်မှူနာ ဘုရားရှင်ဂါဂုဏ်တော်ငင် ချီးမွမ်းဂို့ "မှလူးနာ ဖြောင့်မတ်မှန်ကန်ဟေကားလူးဖြစ်ဟေ" ငါးဂို့ ငှားလင်ကဟေ။ 48 မှအနိဌာရုံမြင်ကွင်းယင် ယူကဇိစ် စုဝေးကိုထုန်ဗာ(ဖ်)ဟေကား လူထုပရိသတ် ပြောင်စာ ကိုယ်တော်ကအဖြစ်အင်ပိုကို ရင်ကွဲလုမတတ် ဝမ်းနည်းကို အပါနာရက်က ကိန်းငါ ပြန်လင် ကဟေ။ 49 ဆိုးဆော် ကိုယ်တော်ယေရှုက မိတ်ဆွေအပေါင်းအိန်း ဆွေမျိုးသားချင်းရက်၊ ဂါလိလဲ ယာဘင်းယောဝန်ကား တဆာလောင်ရက်နာ လင်းစန်ဗြောင်ဆာနေရာဘင်း စက်ဂို့ ယူတုန်းလင်ကဟေ။ 50 အိမ်မားအချိန်အခါယာ ယုဒပြည် အရိမဿဲအရပ်အာက ယောသပ်ငါဟေကလူးဟူးဝါနာ ငါ့လင်ကဟေ။ အမာနာ လူရိုးလူကောင်းဟူးဝါဖြစ်ဂို့ ဂျူးလူမျိူးရက်က လွတ်တော်အဖွဲ့ဝင် ဟူးဝါဖြစ်လင်ကဟေ။ 51 အမာနာ ကိုယ်တော်ယေရူယင် ကတိုက်ကဇိစ်ကြံစည်ဒက်ကား အယောက်က လွှတ်တော်အဖွဲ့ဝင်ရက်ကား ဆုံးဖြတ်ချက်အိမ် လုပ်ဆောင်ချက်ရက်အင် သဘောအတူဒက်ပါ(လ်)။ မှတောင်မဒင့် မှကမ္ဘာယာ ဘုရားရှင်ကသာသနာတော် ထုန်ကဇိစ် တဗျင်းလိုလားတုန်းက လူးယေ ဖြစ်ဟေ။ 52 အမာနာ ကိုယ်တော်ဂါအလောင်းငင် သင်္ဂြိုလ်ခွင့်အီကဇိစ် ပိလတ်ထနဲ့ စိန်ဟေကရပ် ပိလတ်အ(လ်) ခွင့်ပြုလင်ကဟေ။ 53 မှအကြောင့် အမာစာ ကိုယ်တော်ကခန္တာကိုယ်ယင် လက်ဝါးကပ်တိုင်ဖုံးငါဘင်း အမုတ်အာအဟြိုက်ဂိုး မှီးဟေကအဝတ်ချာအိန်း ပတ်လင်ကဟေ။ ကျီးကအိမ် တလုံဗြောင်တစ်လုံးငင် ထွင်းပီးဟေက ဟူးဝင်ယေ့အပီပိုနိမ့်ကား သင်္ချိုင်းဂူအနန်းထဲယာ ကိုယ်တော်ကခန္ဓာကိုယ်ယင် ကနင်းဖူ(ဖ်)ဆာ ပီလင်ကဟေ။ 54 အိမ်မရယက်နာ ပြင်ဆင်ရာနေ့ဖြစ်ကို့ ဥပုသ်ရယက်စကဇိစ် နီးကပ်ဟေကအချိန်ဖြစ်ဟေ။ 55 ဂါလိလဲဒေသယာဘင်း ကိုယ်တော်အိန်းမက်တာ ယောဝန်က တာဆာလောင်ရက်အ(လ်) သင်္ချိူင်းဂူယင်လည်းကောင်း၊ ကိုယ်တော်ကခန္ဓာကိုယ်ယင် လှဲလျောင်းပီဟေကလည်းကောင်း ပိုလင်ဂါဟေ။ 56 မှနောက်အာ အမာရက်နာ ကိန်းငါပြန်းဂို ကိုယ်တော်ငင် ပူဇော်ကဇိစ် ဆီမွှေးအိန်းနံ့သာရက်အင် ပြင်ဆင်လင်ကဟေ။ ဆိုရာတွင် အမှာရက်နာ ပညတ်တော်အရ ဥပုသ်ရယက်အာ အနားလာလင်ဂါဟေ။ |
This translation of the Thet Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.