Luke 22 - Thet1 ကျီးကအိမ် ပသခါပွဲတော်ငါ့ကိုအော်ဟေကား a တဆေးမဲ့မုန့်ပွဲတော်အချိန် နီးကပ်ဗန်(ဖ်) ကဟေ။ 2 ဂျူးပရောဟိတ်အကြီးအကဲရက်အိမ် ကျမ်းတတ်ဆရာရက်စာ လူထုယင် အစက်တုန်းက ဖြစ်ကို ကိုယ်တော်ယေရူယင် အဆာမီအကြောင်းဆုံးကို တိတ်တဆိတ် ကတိုက်ကနည်းလမ်းယင် ဆုံးလင်ကဟေ။ 3 မှနောက်အာ သာဝကတစ်ဆယ့်နှစ်ပါး အပါအဝင်ဖြစ်ဟေကား ယုဒရှကာရုတ်ကမား မာရ်နတ်စာ ဆင်ဂိုပူးကပ်လင်ကဟေ။ 4 ကျီးကအိမ် ယုဒနာ ဂျူးပုရောဟိတ်အကြီးကဲရက်အိမ် ဗိမ္မာန်တော်အရာရှိထနဲ့ ချဉ်းကပ်ဂို့ ကိုယ်တော်ယေရှုငင် အမာရက်ကလက်ထဲယာ အဇာမီအက်လှုဂါယာ ငါးဟေကား ဆွေးနွေးတုန်းလင်ကဟေ။ 5 အိမ်မလူးရက်အ(လ်) ဝမ်းမြောက်ဂို့ ယုဒဇိစ် တင်္ဂါးအီဂါဇိစ် သဘောတူလင်ဂါဟေ။ 6 ယုဒယေ့ သဘောတူဂို့ လူးစုလူဝေး အငါကားအချိန်ငင် ကိုယ်တော်ယေရူယင် ရိန်ဂါးအတွက် အခွင့်ကောင်းငင် စောင်တုန်းလင်ဂါဟေ။ 7 မှနောက်အာ တဆေးမဲ့တဗန်း(ဖ်)ပွဲတော်ငါ့ဟေကား ပသခါပွဲတော်အတွက် သိုးသူငယ်ယင် ပူဇော်ကရယက်အာ ထုန်လင်ကဟေ။ 8 မှကြောင်း ကိုယ်တော်ယေရှုနာ ပေတရုအိမ်ယောဟန်ငင် "ပသခါပွဲတော်အင် ငါ့ရက်မက်တာဆားကဇိစ် လင်ဂိုပြင်ဆင်ယင့်ဂီး" ငါးဂို့ ငါ့လင်ကဟေ။ 9 အမာရက်အ(လ်) "ကိုယ်တော်၊ ငါ့ရက်အင် အဇာမီကနေရာ ပြင်ဆင်းဇိစ်ကက်ဟေယား" ငါးဂို့ ကတာလင်ကို့ 10 ကိုယ်တော်နာ "မြို့အတာဟုန်းငါဆင်လင်နဲ့က(လ်)၊ အူးကူဖေးဗန်ဂါး လူးဟူးဝါနာ နနိန်ရက်အင် ကြိုဆိုလင်ကား။ အမာကအလိုဝါးယိုးဂို အမှာဆင်ဟေကားကိန်းငါ ဆင်လင်ဂီး။ 11 ကျီးနဲ့ ကိန်းဆိန်ငင် "ငါ့ရက်ကားဆရာနာ တပည့်ရက်အိန်း ပသခါပွဲတော်ညစာယင် သုံးဆောင်ပိုကားအခန့် မာနားငါ့ဟေယားငါ့ကို နင်ငင် ကတာကဖန်းငန်ဟေ" ငါးဂို့ ငါ့နက်အင့်ဂီး။ 12 "အိမ်မအခါ ကိန်းဆိမ်းနာ နနိန်ရက်အင်း အဖုန်းထပ်အာ အော်လင်ဂို့ ကျယ်ဝန်းဂါး အခန်းတစ်ခန်းငင် ဆနပ်လင်ကား။ အိမ်မ အခန်းငါ ပွဲတော်အတွက် ပြင်ဆင်လင်ဂီး" ငါးဂို့ ငါ့လင်ကဟေ။ 13 မှနောက်အာ ပေတရုအိန်းယောဟန် ရက်အ(လ်) ပြုကလင်ကို ကိုယ်တော်ငှားဟေကားအတိုင်း ပိုကို ပသခါပွဲတော်အတွက် ကောင်းမွန်စွာ အဆင်သင့် ပြင်ဆင်လင်ဂါဟေ။ 14 အချိန်ထုန်ဗာ(ဖ်)ကားအခါ ကိုယ်တော်နာ တပည့်တော်ရက်နာအိမ်မက်တာ စားပွဲခုံငါ တုန်းလင်ဂါဟေ။ 15 မှနောက်အာ ကိုယ်တော်နာ အမှာရက်အင် "ငါဒုက္ခဝေဒနာအဟင်းမီ မှပသခါပွဲယင် နနိန်ရက်အိမ်မက်တာ ဆားကဇိစ် ငါတဗျင်းအလိုငါဟေ"။ 16 နနိန်ရက်အင် ငါငန်းကား။ ပသခါပွဲ တော်နာ အစပြုကို ဘုရားရှင်နာ နောက်ဆုံးအချိန်ငါ နေရာတိုင်း၊ လူတိုင်းငင် အုပ်စိုးကအချိန် အထုန်မိ အချိန်ထိ ငါနာ အယောက်ဟက်တာ ပသခါပွဲတော်ယင် ဆာလင်ကအရိနန်း"ငါ့ကို ငါ့လင်ကဟေ။ 17 မှနောက်အာ ကိုယ်တော်နာ ဟွက်အင်လာဂို့ ဘုရားဂုဏ်တော်ငင် ချီးမွမ်းကျီးနဲ့ " မှဟွက်အင်လာဂို့ အချင်းချင်းခွဲဂို့ အူးဝင့်။ 18 နနိန်ရက်အင် ငါငန်းကား ဘုရားရှင်ဂါသာသနာတော် အဖော်ကားအချိန်ထိ စပျစ်ဝိုင်ငင် ငါအူဝံကရိန်နန်း" ငါးဂို့ ငါ့လင်ကဟေ။ 19 ပေါင်မုန့်ငင်လာဂို့ ဘုရားရှင်ကဂုဏ်တော်ယင် ချီးမွမ်းဂို့ တဗန်း(ဖ်)ငင်အဆိုက်ကို တပည့်တော်ရက်အင် အီကို့ "မှတဗန်း(ဖ်)နာ နနိန်ရက်ကအတွက် ငါအီဟေကား ငါကခန္ဓာကိုယ်ဖြစ်ဟေ။ ငင်သတိလှုကအနေအိမ် ဆာဂီး"ငါ့ကို ငါ့လင်ကဟေ။ 20 မှနည်းတူစွာ ဆာကျီးဂါရပ် ကိုယ်တော်နာ ဝိုင်ခွက်ငင် အကိုးပီဂို "မှစပျစ်ဝိုင်နာ ဘုရားရှင်က ပဋိညာဉ်အနန်းတည်ကဇိစ် နနိန်ရက်ကအတွက် ငါကော်အီဟေကား ငါကဆယ်ယင် ပုံဆောင်ဟေ။ 21 ညီးင့ဒင့်ယေ့ ငင်ယင် ရန်သူရက်ကတာဟူးယာ အက်အန်ကလူးနာ အတတ်ငါအိမ်မက်တာ ဆာတုန်း ဟေ။ 22 'လူ့သားတော်' နာ ဘုရားရှင်အလိုတော်ငါဟေကအတိုင်း လင်ပိုကားဖြစ်ကယေ့။ လူ့သားတော် ငင် သစ္စာဖောက်ကား အိမ်မလူးက(လ်) အမင်္ဂလာငါဟေကလူးမယ်ဖြစ်ဟေ" ငါ့ကို ငါ့လင်ကဟေ။ 23 အိမ်မှအခါ တပည့်တော်ရက်နာ အပါနာရက်ကအတွက် အယူနာ အိမ်မဒေလေလိစ်ကား ကြံစည်တုန်းဟေယားငါ့ကို အချင်းချင်းကတာတုန်းလင်ကဟေ။ 24 ကျီးကအိမ် တပည့်တော်ရက်နာ အပါနာရက်ကအထဲယာ အယူနာ အကြီးမြတ်ဆုံး ပုဂ္ဂိုလ်ဖြစ်ဟေယား" ငါးဂို မှတ်လာပိုကား အချင်းချင်းအငြင်းပွားတုန်းကို 25 ကိုယ်တော်နာ တိုင်းတစ်ပါးသားရှင်ဘုရင်ရက်နာ အမာရက်ကပြည်သူလူထုအပေါ် အာဏာရှင်ဆန်ဆန် အုပ်ချုပ်က ထောင့်ကယေ့ အမှာရက်ကားအမှာရက် အများအကျိူးဆောင်ကလူးငါ့ကို လူးရက်အင် အော်ဇိစ်ကို အမာရက်နာ မီဟေကခေါင်းဆောင်ရက်ငါ့ကို ထင်ဇိစ်ကက်ဟေ။ 26 ညီးင့ဒင့်ယေ့ နနိန်ရက်က(လ်) အိမ်မလူးရက်ဒေလေ အဖြစ်သင့်ပါ(လ်)။ နနိန်ရက်ကအထဲယာက အရေးပါအရာရောက်ဆုံးလူးနာ အရေးအပါကလူးဖြစ်သင့်ငင်နန်း ခေါင်းဆောင်ရက်အ(လ်) အငှားဆာရက်ဒေလေ နှိမ့်ချကို တုန်းသင့်ဟေ။ 27 စားပွဲခုံငါ ဆာကဇိစ် တုန်းတုန်းဟေကားလူးရက်အိမ် အစားသောက်ရက်အင် ပြင်ဆင်အီပိုကားလူးနာ အယူက(လ်) ပိုကိုကြီးမြတ်ဟေယား။ စားပွဲယာတုန်းတုန်းကလူးနာ ပိုကိုပြောင် ဟေအရိလဲ။ ညီးင့ဒင့်ယေ့ ငါနာ နနိန်ရက်ကအကြားယာ အစားအသောက်အင် ပြင်ဆင်အီပိုကား လူးမယ်ဖြစ်ဟေ။ 28 နနိန်ရက်နာ သွေးဆောင်ဖြားယောင်းဟေကရက်အင် ငါဟင်းပိုကားအချိန်ငါ ငါအိမ်မက်တာ ရပ်တည်ဒက်ကလူးရက်မယ်ဖြစ်ဟေ။ 29 ငါကအဗား(ဖ်)နာ ငင်ယင် အုပ်စိုးပိုင်ခွင့်ယင် အီကဒေလေ ငါယေ့ နနိန်ရက်အင် အုပ်စိုးပိုင်ခွင့်အီကအတွက် 30 နနိန်ရက်နာ ငါကနိုင်ငံတော်ထဲယာက ငါကစားပွဲယာ ဆာပိုကားအခွင့်အိမ် ငါကပုလ္လင်ပေါ်ဝါးတုန်းဂို့ အစ္စရေးမျိုးနွယ်စု ဆယ့်နှစ်စုရက်အင် အုပ်ချုပ်စိုးစံလင်ပိုကား။ 31 "ရှိမုန်၊ ရှိမုန် ၊အတေးယင့်၊ လယ်ဆမားနာ အင်တူ(ဖ်)အိမ် အလက်အင် ခွဲခြားကဒေလေ မာရ်နတ်ယေ့ နနိန်ရက်အင်ဟူးဝါချင်းစီငင် စမ်းသပ်ခွဲခြားကဇိစ် အခွင့်အခါစိန်လင်ကား။ 32 ညီးင့ဒင့်ယေ့ နင်ကယုံကြည်မူခိုင်မြဲတုန်းကဇိစ် ငါဆုစိန်အီယန်ဟေ။ နင်အသိတရားပြန်ကိုလှုကရပ် နင်ကနည်းဆီဖုံနားဖြစ်ဟေကား အယောက်ကတပည့်တော်ရက်အင်ယေ့ ယုံကြည်မူခိုင်မြဲဇိစ်ကအတွက် ကူညီကိုလိစ်အီယင်"ငါ့ကို ငါ့လင်ကဟေ။ 33 မှအခါ ပေတရုနာ "ကိုယ်တော်၊ ငါနာ ကိုယ်တော်အိန်း မက်တာ၊ ထောင်ငါမယ်ဖြစ်ဖြစ်၊ ဆိန်းကမယ်ဖြစ်ဖြစ် ယို့ကဇိစ် အဆင့်သင့်ငါဟေ" ငါးဂို့ လျှောက်တင်ကို 34 ကိုယ်တော်ယေရှုနာ "ပေတရု ၊နင်ငင် ငါငန်းဂါး။ ယက်နာ အူအကိ(လ်)မိ နင်နာ ငင်အချေးပါ(လ်) ငါးဂို့ ဆုံးကြိမ်တိုင်တိုင် ငြင်းပါ(လ်)လင်ကား" ငါးဂို့ ငါ့လင်ကဟေ။ 35 မှနောက်အာ ကိုယ်တော်နာ တပည့်တော်ရက်အင် "ငါနာ နနိန်ရက်အင် တင်္ဂါး၊ ခရီးဆောင်တိန်း အိမ် ဖိနပ်ရက်အင် လာဂါးအဖန်းထမ်း ဖြောက်နက်ကအချိန်နာ နနိန်ရက်ကမား တစ်စုံတစ်ရာ ချို့တဲ့ဂါး ငါဟေလဲ" ငါးဂို့ ကတာလင်ကို တပည့်တော်ရက်နာ"အငါဒက်ပါ(လ်)"ငါ့ကို လျှောက်တင်လင်ကဟေ။ 36 အိမ်မအခါ ကိုယ်တော်နာ "အတတ်က(လ်) တင်္ဂါးတိန်းငါနဲ့လင်ဂီ။ ခရီးဆောင်တိန်းအင်လာဂီး။ နနိန်ရက်ကမား ကတင်အငါနဲ့ အဝတ်ပါဇူရက်အင် အချေဂို့ ကတင်ငင် မရိန်ယင်း။ 37 နနိန်ရက်အင် ငါငန်းကား။ 'အမာနာ ရာဇဝတ်သားအဖြစ် သတ်မှတ်က ဟင်းပိုဂါး' ငါးဂို ကျမ်းစာနား ငါဂါအကြောင်းငင် ဖော်ဆနစ်ပီဟေကားအတိုင်း ပြည့်စုံဗာ(ဖ်)ကဟေဖြစ်ဟေ" ငါးဂို့ ငါ့လင်ကဟေ။ 38 မှအခါ တပည့်တော် ရက်နာ "ကိုယ်တော်၊ယူဝင်း။ ငါရက်ကမား ကတင်နိန့်လက်ငါနက်ဟေ" ငါးဂို့ လျှောက်တင်ဟေကအခါ ကိုယ်တော်နာ "လုံလောက်အင်နန်း" ငါးဂို့ ငါ့လင်ကဟေ။ 39 မှနောက်အာ ကိုယ်တော်နာ လိစ်ဟေကအတိုင်း သံလွင်တဂို့ဖုံငါ ကြွလင်ဂါဟေ။ တပည့်တော်ရက်အ(လ်) အမှာဂါအလိုဝါ ယိုးလင်ဂါဟေ။ 40 အိမ်မနေရာထုန်ဟေကားအခါ ကိုယ်တော် နာ တပည့်တော်ရက်အင် "ဖြားယောင်းသွေးဆောင်ကအဟင်းပိုမား ဘုရားရှင်ကမား ဆုစိန်ယင့်" ငါးဂို့ ငါ့လင်ကဟေ။ 41 မှနောက်အာ ကိုယ်တော်နာ အမာရက်ကမဘင်း ခဲတစ်ပစ်စာခန့် စီးဆာလင်းစံဟေက နေရာယာ လင်ကို့ ဒူးထောက်ဂို့ 42 "အို အဗား(ဖ်)ဘုရား၊ အဗား(ဖ်)ဘုရား အလိုတော်ငါနဲ ငါထနဲ့ဖြစ် ပျက်က အတတ်ကဒေလေ ဆိုးရွားကအူဇာရက် အဖြစ်အန်နက်နိမ့်ယေ့။ ညီးင့ဒင့်ယေ့ အဗာ(ဖ်)ဘုရားရှင် အလိုတော်အတိုင်းမေဖြစ်ဇိစ်ငန်။ ငါက အလိုအတိုင်းအဖြစ်အန်နက်နိမ့်ယေ့" ငါးဂို့ ဆုစိန်လင်ကဟေ။ 43 အိမ်မအခါ နိဗ္ဗာန်ရွှေမြို့တော်ငါဘင်း ဟမာန်ဒေဝါတစ်ပါး ထုန်ဗား(ဖ်)ဂို့ ကိုယ်တော်ငင် တာဟောင် အီလင်ကဟေ။ 44 ကိုယ်တော်နာ တဗျင်းဝေဒနာခံစားပိုကို အာရုံစူးစိုက်ကို ဆုစိန်ဟေကရပ် ကိုယ်တော် ကမားဘင်း စီးကိုဟြတ်ဟေကား ချေးသီးပေါက်တစ်ပေါက်နာ ဆယ်ရက်ဒေလေ ကဇက်ဖုံးငါ ဟြတ်လင်ကဟေ။ 45 ကိုယ်တော်နာ အိမ်မဒေလေဆုစိန်ကျီးဟေကရပ် တပည့်တော်ရက်ကမား ပြန့်ငန်ကရပ် တပည့်တော်ရက်စာ ဝမ်းနည်းမောပန်းကို အိပ်ပျော်တုန်းက ပိုလင်ကရပ် 46 ကိုယ်တော်နာ တပည့်တော်ရက်အင် "အဇာရိကအိပ်တုန်းကယား၊ ရိပ်ကို့ လူးရက်ကဖြားယောင်းသွေးဆောင်မူထဲယာ အဟြတ်ကဇိစ် ဆုစိန်ယင်ဂီး" ငါးဂို့ မိန့်တော်မူလင်ကဟေ။ 47 ကိုယ်တော်ယေရှုနာ မှတလည်တူးပြိစ်တုန်းစမ်း သာဝကတစ်ဆယ့်နှစ်ဦးထဲယာက ဟူးဝါဖြစ်ဟေကား ယုဒစာ လူအုပ်ပြောင်တစ်အုပ်အင် ဦးဆောင်ကို ကိုယ်တော်ကမား အော်လားကန်ကို အမာစာ ကိုယ်တော်ယင် အတိ(လ်)ကို ချဉ်းကပ်လင်ကဟေ။ 48 ကိုယ်တော်နာ အမင် "နင်နာ လူ့သား တော်ယင် အတိ(လ်)ကိုသစ္စာဖောက်ဟေကလဲ" ငါးဂို့ ကတာလင်ကဟေ။ 49 တပည့်တော်ဟူးဝါနာ မှအပြုအမှုငင်ပိုဟေကားအခါ၊ "ကိုယ်တော် ငါ့ရက် အမှာရက်အင် ကတင်အိမ်ဗန်(ဖ်)နက်ကလဲ" ငါးဂို့ ကတာလင်ဟေ။ 50 ကျီးကအိမ် ဂျူးပုရောဟိတ်ပြောင်လူးဟူးဝါက နောက်လိုက်ဟူးဝါယင် ကတင်အိမ် ဗန်(ဖ်)နက်ကရပ် ပုတ်ဆာလက်ဖက်အာက အာကနားတိုးကို ဓူ(ဖ်)ကလင်ကဟေ။ 51 ကိုယ်တော်နာ "မှဒက်အိမ်တန့်ငင့်ဒက်" ငါးဂို့ ငါ့ကျီးကရပ် အိမ်မဓူ(ဖ်)ကလင်ကား အငှားဆာကအာကနားယင် တာဟူးအိမ်တိုးကို မူလအတိုင်းဖြစ်စိမ်လင်ကဟေ။ 52 ကျီးကအိမ် ကိုယ်တော်နာ အမင် ရိန်ကဇိစ် ဗန်(ဖ်)ဟေကား ဂျူးပုရောဟိတ်အကြီးအကဲရက်၊ ဗိမာန်တော်အစောင့်တပ်သားရက်အိမ် ဂျူးလူမျိူး ခေါင်းဆောင်ရက်အင် "နနိန်ရက်နာ ဓာတ်မြားရက်အင်ရိန်ကဒေလေ အဇာရိကား တုတ်၊ ကတင်ရက်အင် အကိုးဂို့ ဗန်(ဖ်)ဟေကယား။ 53 ငါယက်တာဂါရား ဗိမာန်တော်ဝါ ငါတုန်းဟေကားအချိန်ငါ နနိန်ရက် အဇာရိကအကြောင့် ငင် အရိန်ကယား။ ညီးင့ဒင့်ယေ့ မှအချိန်နာ နနိန်ရက်ကအချိန်ဖြစ်ကို မာရ်နတ်ယေ့ အမာကယုတ်ညံ့ဟေက အမူအရာရက်အင် လိစ်တုန်းဟေကားအချိန်ဖြစ်ဟေ" ငါ့ကို ငါ့လင်ကဟေ။ 54 ကျီးကအိမ် အမာရက်စာ ကိုယ်တော်ငင် ရိန်ဂို့ အကြီးဆုံးပုရောဟိတ်ကကိန်းငါ အော်လားလင် ကရပ်၊ ပေတရုနာ လင်းစန်ပြောင်ငါဘင်း နောက်ယောင်ခံဂို ယိုးလင်ဂါဟေ။ 55 ကိန်းဝင်းအတာဟုန်းငါ လူးအချို့နာ ဝိုင်းတုန်းဂို့ ဗန်းကုတ်တုန်းစမ်း ပေတရုနာ အမှာရက်ကအနား တုန်းလင်ကဟေ။ 56 အငှားဆာတာဆာလောင်ဟူးဝါနာ ပေတရုတုန်းတုန်းဟေက ပိုဟေကအခါ အမင် လက်ညှိုးထိုး ဆနပ်ကို့ "မှလူးနာ ယေရူကအပေါင်းပါဖြစ်ဟေ"ငါ့ကို ငါ့လင်ကဟေ။ 57 မှအခါ ပေတရုနာ "တဆာလောင်၊ ငါ အိမ်မလူးငင်အချေးပါ(လ်)" ငါးဂို့ ငြင်းလင်ကဟေ။ 58 အချိန်စီဆာကြားယိုးငန်ဂါး အချိန်ငါ လူးဟူးဝါနာ ပေတရုငင်ပိုဟေကရပ် "နင်နာ အမာရက်ကအဖွဲ့ထဲယာက ဟူးဝါဖြစ်ဟေ"ငါ့ကို ပေတရုနာ "ငါနာ အမာရက်ကအဖွဲ့ထဲယာက အရိမ်ပါ(လ်)" ငါးဂို့ ငြင်းလင်ကဟေ။ 59 အယိုကာ ဟက်တာ တစ်နာရီဇိစ်ကြားဟေကရပ် အယောက်ကလူးဟူးဝါနာ "မှလူးနာ ဂါလိလဲပြည်ယာကဖြစ်ဂို့ ကိုယ်တော်အိန်းမက်တာ ငါ့ဒက်ဟေကား သေချာဟေ" ငါးဂို့ ခိုင်ခိုင်မာမာ ငါ့လင်ကဟေ။ 60 သို့ရာတွင် ပေတရုနာ "နင် အဇာငါ့တုန်းဟေကား ငါအချေးပါ(လ်)"ငါ့ကို ငြင်းလင်ပီကဟေ။ အိမ်မဒေလေ ပြိစ်တုန်း စမ်းဒင့် အူက(လ်)လင်ကဟေ။ 61 အိမ်မအခါ ကိုယ်တော်နာ ပေတရုယင် လှည့်ကိုယူလင်ကဟေ။ ပေတရုစာ ကိုယ်တော်ငါ့ဒက်ဟေကား" ယက် အူအက(လ်)မိ နင်နာ ငင်အချေးပါ(လ်)ငါ့ကို သုံးကြိမ်တိုင် တိုင် ငြင်းပယ်လင်ကား"ငါ့ဟေကတူးနာ အမှတ်လှုကို 62 အပြင်းငါပြုကို ဝမ်းနည်းကို ဟြက်လင် ကဟေ။ 63 ကိုယ်တော်ယေရှုငင် စောင့်ယူးတုန်းဟေကားလူးရက်နာ ကိုယ်တော်ယင် လှောင်ပြောင်ဂို့ ပေါက်လင်ကဟေ။ 64 ကိုယ်တော်ကအမိတ်တူယင် အဝတ်အိန်းပတ်စည်းဂို့ "နင်ငင် အယူးနက်အန်က ယား ငါ့ဟေကား ဟောယူငင့် " ငါးဂို့ 65 နည်းအမျိုးမျိုးရက်အိမ် ကိုယ်တော်ငင် ညှင်းပန်းနှိပ်စက်ကိုး စော်ကားပြိစ်လင်ကဟေ။ 66 ဟင်းချီကအခါ ဂျူးပုရောဟိတ်အကြီးအကဲရက်၊ ကျမ်းတတ်ဆရားရက်အိမ် ဂျူးလူမျိုး ခေါင်းဆောင်ရက်နာ တရားလွတ်တော်ယာ ကိုယ်တော်ယင် စစ်ဆေးကတာလင်ကဟေ။ အမာရက်နာ ကိုယ်တော်ယင် 67 "နင်နာ ကယ်တင်ရှင်မေရှိယ ရီဟေ၊ အရီကားဖြေယင့်" ငါးဂို့ ငါ့လင်ကဟေ။ အိမ်မ အခါ ကိုယ်တော်ယေရှုနာ " နနိန်ရက်အင် ငါငါ့ဆနပ်အ(လ်) နနိန်ရက် အကျုံပါ(လ်)" 68 နနိန်ရက်အင် ငါ ကတာနဲ့က(လ်)ယေ့ နနိန်ရက်ပြန်ကိုအဖြေပါ(လ်)။ 69 ညီးင့ဒင့်ယေ့ အတတ်ကအချိန်ငါဘင်းစဂို့ လူ့သားတော်နာ တန်ခိုးတော်အနန္တ၊ ဂုဏ်တော်အနန္တအိန်း ပြည့်စုံဟေကား အဗာ(ဖ်)ဘုရားရှင်ဂါး ပုတ်ဆလက်ဖက်အာ တုန်းကို အုပ်ချုပ်စိုးစံပိုကားဖြစ်ဟေ" ငါးဂို့ ငှားလင်ဂါဟေ။ 70 မှအခါ အမာရက် နာ "မဒေလေငါ့နဲ့ နင်နာ ဘုရားရှင်ကအဆာလဲ" ငါးဂို့ ကတာဂို့ ကိုယ်တော်နာ "နနိန်ရက်က ငါ့ဟေက အတိုင်းဖြစ်ဟေ" ငါးဂို့ ပြန့်ကိုဖြေလင်ကဟေ။ 71 အမာရက်အ(လ်) "အမာအတတ်ကဒေလေ ငါ့ဟေကား ငါရက်ကိုယ်တိုင်တတ်အင်ပိုနန်းဖြစ်ကို အယောက်ကသက်သေ အစိုးနန်း"ငါ့ကို ငါ့တုန်းလင်ကဟေ။ |
This translation of the Thet Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.