Luke 19 - Thet1 ကျီးကအိမ် ကိုယ်တော်ယေရှုနာ ဂျေရိခေါမြို့ငင် ဖြတ်ဂို ကြွတော်မူလင်ကဟေ။ 2 မှမြို့ငါ ဇက္ခဲငါးဟေကလူးဟူးဝါနာ တုန်းလင်ကဟေ။ အမှာနာ အခွန်ကုန်ဟေဂါးတာဝန်ခံဟူးဝါးဖြစ်ဂိုး တဗျင်းချမ်းသာကြွယ်ဝကလူးဟူးဝါဖြစ်ဟေ။ 3 ဇက္ခဲနာ ကိုယ်တော်ယေရှု အဆာမီဂါးလူးဖြစ်ဟေဂာား ပိုကက်ကို့ ကြိုးစားဂါယေ့ အဟောင်တုန်ဂို လူးရက်အင်အကျော်လှုကို အပိုနန်းဖြစ်တုန်းလင်ဂါဟေ။ 4 မှအကြောင့် အမာနာ ကိုယ်တော်ယင် ကဒိန်းကအတွက် ရှေ့ယာလင်ဂို့ သဖန်းဖင်းဖုန်းငါချေတုန်း လင်ကဟေ။ 5 ကိုယ်တော်နာ အိမ်မာနေရာထုန်ဟေကားအခါ မော့ယူဂို့ "ဇက္ခဲ" ၊ မလားဆိုက်ယိုးဝန်။ ယက် နင်ဂါကိန်းငင် တည်းခိုးဂါး" ငါးဂို့ မိန့်တော်မူလင်ကဟေ။ 6 ဇက္ခဲယေ သဖန်းဖင်းဖုန်းငါဘင်း မလားဆိုက်ယိုးဂို့ ကိုယ်တော်ယေရှုငင် ဝမ်းမြောက်ဝမ်းသာ ကြိုဆိုလင်ကဟေ။ 7 မှအခြင်းအရာငင် ပိုဟေကားလူးရက်နာ " ကိုယ်တော်နာ အပြစ်ဒုစရိုက်သမားရက်က ကိန်းငါလင်ဂို့ အမာအိမ်မက်တာ ဆာဂါး ရိနိန်းမက်" ငါးဂို့ ဝေဖန်တုန်းလင်ကဟေ။ 8 မှနောက်အာ ဇက္ခဲနာ စက်ဂို့ ကိုယ်တော်ငင် "ကိုယ်တော်၊ ကိုယ်တော်၊ငါက ပိုင်ဆိုင်ဟေကအူဇာရက်အင် ဆင်းရဲဆာရက်ဇီစ်တစ်ဝက်ခွဲအီက။ လူးရက်ကမား မတရားစိန်ပီဟေကား အခွန်တင်္ဂါရက်အင်ယေ့ လေးဆပိုကို ပြန်ကိုအက်နိုင်အန်ကား" ငါ့ကို လျှောက်တင်လင်ကဟေ။ 9 ကိုယ်တော်နာ ဇက္ခဲယင် "နင်ယေ့ အာဗြဟံကမျိူးဆက် ဖြစ်ကအတွက် ယက်ပင်းစကို နင်အိမ်နင်ကမိသားစုတစ်စုလုံးငင် ဘုရားရှင်ကယ်တင်ယင်နန်း။ 10 'လူးအဆာယေ ပျောက်ကလင်ဂါလူးရက်အင်ဆုံးဂို ကယ်တင်ကဇိစ် ကြွဗန်ကလူးဖြစ်ဟေ" ငါးဂို မိန့်တော်မူလင်ကဟေ။ 11 ဂျေရုဆလင်မြို့ဝါ နီးကပ်ယောဝန်နန်းဖြစ်ကို ဘုရားရှင်ကသာသနာတော်စာ ချက်ချင်းဖော် ဗာ(ဖ်)ကဟေငါ့ကို ထင်ကို လူထုပရိသတ်ရက်စာ ကိုယ်တော်ငါ့ဆနပ်တုန်းကရက်အင် ဆက်လက်ကို အတေးတုန်းကို ကိုယ်တော်နာ ပုံဥပမာဆူးယင် အယောက်ဟက်တာငါ့ဆနပ်လင်ကဟေ။ 12 "မင်းသား ဟူးဝါးနာ အမာကတိုင်းပြည်ယာ မင်အဖြစ်တက်မြောက်က ဟင်းပိုကအတွက် ဧကရာဇ်ငါဟေက လင်းစံပြောင်တိုင်းပြည်ယာ လင်လင်ကဟေ။ 13 အလင်မီ အမာနာ အငှားဆာဆယ်ယောက်အင် အော်နက်ကို ဟူးဝါဇီယင် တင်္ဂါတစ်မိနာ့ဇိစ်အီကို ၊ ငါအပြန့်ငန်းနိမ့်ကအချိန်ထိ မှတင်္ဂါအိမ် စီးပွားရေး လုပ်အင်း"ငါ့ကို ငါ့ပီဒက်လင်ကဟေ။ 14 တိုင်းပြည်ယာက တစ်ချို့လူးရက်က(လ်) အိမ်မာမင်းသားယင် ဘုရင်အဖြစ်ဇိစ်ကက်ကအတွက် သံတမန်ရက်အင် ဖြောက်နက်ကို "မှလူးငင် ဘုရင်ဖြစ်ကဇိစ် ငါရက် အစိုးပါ(လ်)"ငါ့ကို ဧကရာဇ်ယင် လင်ကိုငါ့ဇိစ်လင်ကဟေ။ 15 ညီးင့ဒင့်ယေ့ အိမ်ရှေ့မင်းသားနာ ဘုရင်အဖြစ် တင်မြှောက်ကဟင်းဒက်ပိုကို အမာကတိုင်းပြည်ယာ ဘုရင်အနန်းတစ်ပါးအနေအိမ် ပြန့်ကိုထုပ်ဗာ(ဖ်)လင်ကဟေ။ အိမ်မနောက်အာ အမာကတင်္ဂါအီပီဒက်ကား အငှားဆာရက် စီးပွားဆုံးကို အမြတ်အဆာတတ်လှုဝင်နန်းယား ချေးကက်ကအတွက် အမာရက်အင် အော်ကဖန်းလင်ကရပ် 16 ပထမအစေခံနာ "အရှင်မင်းမြတ်အီဒက်ဟေက တင်္ဂါတစ်မိနာ့ယင် ငါဆယ်ဆစီးတိုးပွားမှ ဆောင်ရွက်ပီဟေ" ငါးဂို လျှောက်တင်လင်ကဟေ။ 17 ဘုရင်ယေ "ကောင်းလေစွ။ မောင်မင်းနာ ပမာဏစီးဆာအိန်းဒင်းယေ့ သစ္စာစောင့်ထိန်းကို ယုံကြည်ပိုဟေကား အငှားဆာဖြစ်ကအတွက် မြို့ဆယ်မြို့ငင် အပိုင်ဆားဂီ" ငါးဂို အမိန့်အီလင်ကဟေ။ 18 ဒုတိယအငှားဆာက(လ်) "အရှင်မင်းကြီးအီ ဒက်ဟေက တင်္ဂါတစ်မိနာ့ယင် ငါးဆစီးတိုးပွားမှ ဆောင်ရွက်ပီဟေ" ငါးဂို လျှောက်တင်လင်ကရပ် 19 ဘုရင်နာ " နင်က(လ်) မြို့ငါးမြို့ငင် အပိုင်ဆားဂီ" ငါးဂို ငှားလင်ကဟေ။ 20 အယောက်ကအငှားဆာ ဟူးဝါက(လ်) " ငါနာ အရှင်မင်းကြီးအီဒက်ဟေကား တင်္ဂါတစ်မိနာ့ယင် အဝတ်စအိန်းတိပ်ဂို့ သိမ်းပီးနက်ဟေ။ မှနား ယူယင့်။ 21 အရှင်မင်းကြီးနာ အပါနာကအပိုင်ကအူဇာယင် သိမ်းလာက ထောင့်ကို့ အပါနာစုပ်ကို့အပီကား ဟန်ကထောင့်ကလူးဖြစ်ကို ငါအစက်ကအတွက် အတတ်ကဒေလေ လုပ်ပိုကားဖြစ် ဟေ"ငါ့ကို လျှောက်တင်လင်ကဟေ။ 22 အိမ်မအခါ ဘုရင်နာ "ဆိုးဟေကအငှားဆာ၊ နင်ပြိစ်ဟေကအတိုင်း ငါ နင်ငင် အပြစ်စီရင်ငန်ကား။ ငါနာ အပါနာကအပိုင်က အူဇာရက်အင် သိမ်းကို လာထောင့်ဟေ အပါနာကအစုပ်ကယဲ့ ဟန်ကထောင့်ဟေကားလူး ချေးယက်ယက်အာ 23 ငါအီဒက်ကတင်္ဂါး အဇာရိဂို့ ဘဏ်ငန်အထည့်ကယာ။ ဘဏ်ငါအက်ပီဒက်နဲ့က(လ်) ငါပြန့်ငန်ကရပ် အတိုးလှုလင်ကဖြစ်ဟေ " ငါးဂို ငှားလင်ကဟေ။ 24 မှနောက်အာ ဘုရင်နာ အယောက်ကအငှားဆာရက် အော်ဂိုး "အမှာထနဲ့က တင်္ဂါရက်လာဂို့ ဆယ်ဆက်ပွားမှလုပ်လှုက အငှားဆာဇိစ် အီနက်အင်" ငါးဂို အမိန့်အီနက်ရပ် 25 အမာရက်အ(လ်) "အရှင်မင်းကြီး အမာကမား တင်္ဂါဆယ်မိနာ့ငါ့တုန်းနန်း" ငါးဂို လျှောက်တင်ကအတွက် 26 ဘုရင်နာ "နနိန်ရက်အင် ငါငန်းကား။ ဆူးဝါပါဆာငါ့ကို အိမ်မားအူဇာ ပွားမနီး လုပ်လှုကလူးဇိစ် ပိုကိုအီကား။ ညီးင့ဒင့်ယေ့ တိုးပွားမနီး အလုပ်လှုကလူးရက်ထနဲ့က(လ်) အမာထနဲ့ကငါဟေကား အူဇာရက်အင်ဒင့် သိမ်းလာကဟင်းလင်ပိုကား။ 27 အတတ် ငါဘုရင်အဖြစ် အုပ်ချူပ်ဟေကား အစိုးကက်ကရန်သူရက်အင် အော်လားကန်။ အမာရက်အင် ငါကရှေ့ယာ ကတိုက်နက်အင်"ငါ့ကို အမိန့်အီနက်ဟေ"ငါ့ကို ငါလင်ကဟေ။ 28 ကိုယ်တော်နာ ဟောပြောကျီးဟေကအခါ ဂျေရုဆလင်ဝါ ဆက်လင်ကိုကြွလင်ကဟေ။ 29 သံလွင်တာဂိုးနားက ဗက်ဖာဂေထိန်အိမ် ဗေသနိထိန်ငါ ထုန်ဟေကအခါ ရှေ့ပြေးအဖြစ် တပည့်တော်နှစ်ဟူးငင် ကြိုတင်ဂိုးဖြောက်နက်ကဟေ။ 30 ကိုယ်တော်နာ "ရှေ့ကထိန်ငါ လင်ဂီ။ ထိန်တာဟုန်းငါဆင်ကအိမ် ဟူးဝါယေ့ အတိန်(လ်)ဟြာနိမ့်ကား မြည်းငယ်တစ်ကောင်ငင် တန်ပီဟေက ပိုလင်ကား။ အိမ်မားမြည်းယင် ရာဖုဖြုတ်ကိုး ငါကမားအော်လာကန်။ 31 ဟူးဝါနာ "နနိန်ရက် အဇာရိက မြည်းငယ်ယင် ရဖူ(ဖ်)ဖြုတ်တုန်းကယား"ငါ့ကို ကတာတဲ့က(လ်) "အရှင်သခင် စိုးကက်ကို့" ငါ့နက်အင်" ငါ့ကို ငါ့လင်ကဟေ။ 32 အိမ်မှနိန်းဟူးယေ့ ထိန်တာဟုန်းငါထုန်းဟေကခါ ကိုယ်တော် ငှားပီဟေက အတိုင်း မြည်းငယ်ယင်ပိုလင်ကဟေ။ 33 အမှာရက်နာ မြည်းငယ်ယင်ရာဖူဖြုတ်တုန်းကရပ် အမာကပိုင်ရှင်နာ "နနိန်ရက် အဇာလိစ်တုန်းကယာ" ငါးဂို ကတာကို့ 34 အမှာရက်အ(လ်) "အရှင်လိုအပ် တုန်းဟေ" ငါးဂို့ ဖြေလင်ကဟေ။ 35 ကျီးကအိမ် အမာရက်နာ မြည်းငယ်ယင် ကိုယ်တော်ကမား အော်လားကန်ကို အကာဆင့်ငါ အဝတ်ခင်းအီကို ကိုယ်တော်ယင် အိမ်မားအဖုံးငါ တင်အီကို တိန်(လ်) ဇိစ်လင်ကဟေ။ 36 အိမ်မှမြည်းငယ်ယင်တိန်(လ်)ဂိုး ဂျေရုဆလင်ငါ လင်ဟေကလင်းငါ လူထုပရိ သတ်ဘောင်းကိုရက်စာ ကိုယ်တော်ကရှေ့ယာ အမှာရက်ကားအဝတ်အိန်း အကြင်းပီလင်ကဟေ။ 37 သံလွင်တဂိုးဖုံးငါဘင်းဆိုက်ကရပ် လူထုပရိသတ်ပြောင်စာ ကိုယ်တော်ယေရူ လုပ်တက်ဟေက အံ့ဩဖွယ်ရာစုတ်ရက်အင် ပျှော်ရွှင်ကို ဘုရားရှင်ကဂုဏ်တော်ငင် ချီးမွမ်းလင်ကဟေ။ 38 "ဘုရားရှင်က အမိန်းအိန်း ကြွဗန်(ဖ်)ဟေက ရှင်ဘုရင်နာမင်္ဂလာငါဟေ။ နိဗ္ဗာန်ရွှေမြို့တော်၌ ငြိမ်းချမ်းကို ဘုရားရှင်က ဘုန်းတန်ခိုးတော် ထွန်းလင်းပါစေ" ငါးဂို ဟော်ဂို ကြွေးကြော်လင်ကဟေ။ 39 အိမ်မအခါ လူအုပ်ထဲယာ ဘင်း ဖာရိရှဲအချို့ရက်စာ ကိုယ်တော်ငင် "ဆရာ၊ ဆရာကတပည့်တော်ရက် တတ်ကဒေလေ ဟော်တုန်း ဟေက ဆုံးမအီယန်" ငါးဂို လျှောက်တင်လင်ကဟေ။ 40 ကိုယ်တော်ယေ "နနိန်ရက်အင် ငါငန်းဂါ၊ အကယ်၍ လူးရက်အင် အဟော်ကဇိစ်ငါနက်နဲ့က(လ်) တာလုံရက်နာ ရိကိုဟော်လင်ကား" ငါးဂို ငါလင်ကဟေ။ 41 မှနောက်အာ ကိုယ်တော်ယေရှုနာ ဂျေရုဆလင်မြို့အနားဆာ ထုတ်ဗာ(ဖ်)ဂါအခါ မြို့ယင်ပိုဟေကရပ် အမာအိန်းကတိန်ဂို့။ 42 "အဇာအရာက(လ်) ငြိမ်းချမ်းရေးလာကန်းဟေငါဟေကား နင်ကမြို့သူမြို့သားရက် အချေးကတဗျင်ဆိုးဝါးဟေ။ ညီးင့ဒင့်ယေ့ အတတ်က(လ်) မှအူဇားရက်အင် နနိန်ရက်အင်ကရှေ့ယာဒင့် အဆေးပီကဟင်းငန်ပိုနန်း။ 43 နနိန်ရက်က ရန်သူရက်နာ နနိန်ရက်အင် တိုက်ခိုက်ကဇိစ်ကတွက် မြို့ရိုးပတ်လည်ယာ ဝိုင်းရန်ပီးယင်နန်း။ 44 မှမြို့တစ်မြို့လုံးနာ အဆောက်အဦး စုတ်ရက်အင် ဖျက်စီးကို မြို့ဝါကလူးရက်အင်ယေ့ ကတိုက်ကအချိန် ထုပ်ဗာ(ဖ်)လင်ကဟေ။ အဇာရိကို အငါ့နဲ့က(လ်) နနိန်ရက်နာ ဘုရားရှင်နာ ကယ်တင်ကဇိစ်ကြွဗန်(ဖ်)က အချေးကအတွက်ဖြစ်ဟေ"ငါ့ကို ငါ့လင်ကဟေ။ 45 ကျီးကအိမ် ကိုယ်တော်ယေရှုနာ ဗိမာန်တော်ထဲယာ ထုပ်လင်ကအခါ ဗိမာန်တော် အတာဟုန်းငင် ဈေးအချေတုန်းက ဈေးသည်ရက်အင် မောင်းထုတ်နက်ကဟေ။ 46 "ငါကကိန်းစာ ဝတ်ပြုဆုစိန်ကနေရာမယ်ဖြစ်ပိုကား"ငါ့ကို ကျမ်းစာရေးပီကယေ့ အတတ် နနိန်ရက်နာ ဗိမာန်တော်ယာ သူခိုးဓားပြရက် ခိုအောင်းဟေကနေရာဖြစ်မနီးလုပ်တုန်းဟေ"ငါ့ကို ငါလင်ကဟေ။ 47 ကျီးကအိမ် ကိုယ်တော်နာ ဗိမာန်တော်ယာ ယက်တာဂါရား တရားတော်ရက်အင် ဟောဆနပ်လင်ကဟေ။ ဂျူးပရော ဟိတ်အကြီးအကဲရက်၊ ကျမ်းတတ်ဆရာရက်အိမ် ဂျူးလူမျိူးအကြီးအကဲရက်စာ ကိုယ်တော်ငင် ကတိုတ် ဂါဇိစ် ကြိုးစားတုန်းလင်ကဟေ။ 48 လူထုပရိသတ်ရက်စာ ကိုယ်တော်ယေရှုက တရားတော်ရက်အင် အတေးကဇီစ် ဆန္ဒပြင်းပြတုန်းကို အနားဆာ တုန်းတုန်ကအကြောင့် အမာရက်စာ ကိုယ်တော်ငင် လုပ်ကြံ ကတိုတ်ကဇီစ် နည်းလမ်းငင်ကြံစည်ဂို အလူပါ(လ်)ဖြစ်တုန်းလင်ကဟေ။ |
This translation of the Thet Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.