Luke 1 - Thet1 လေးစားနက်ပိုဟေကား သော်ဖိလို၊ ငါရက်ကလောကယာ ဘုရားရှင် လုပ်တက်ဟေကား အမူအရာရက်အင် 2 အစဦးပါနိ မျက်မြင်သက်သေဖြိုက်တက်ကလူးရက်အိမ် အမူတော်ဆောင်ရက် ဟောပြိစ်ဒက်ကအတိုင်း လူးဘောင်းဂို့ရက်နာ ရေးဂိုဆနပ်ပီဒင့်လင်ကဟေ။ 3 မှကြောင်း ငါစာ ဖြစ်ပျက်ဒက်ဂါအကြောင်းဆန်စုတ်အင် ဂရုတစိုက် စုံစမ်းလေ့လာဒက်ကို 4 နနိန်ရက် ဆနိန်ဒက်ဂါ အကြောင်းရက်နာ မှန်ကန်ဂါအကြောင်း ချေးကဇိစ် နနိန်ရက်ကမား အတတ်ကဒေလေ အစီစဉ်တကျ ရေးသားနက်ပေါ်ဂါ ဖြစ်ဟေ။ 5 ယုဒပြည်ယာ ဟေရုဒ်မင်းကြီးအုပ်ချုပ်ကအချိန်ငါa ဇာခရိအမိန်းငါဟေကား ဂျူးပုရောဟိတ်စာ အဘိယငါးဂိုအော်ဟေကားဂျူးပုရောဟိတ်အဖွဲ့ဝင်ဟူးဝါဖြစ်လင်ဟေ။ အမှာဂါအအီးတားဧလိရှဗက်ယဲ့ အာရုန်ငါဂို့အော်ဟေကား ပုရောဟိတ်ကမျိူးရိုးယာဘင်းဆက်သက်ကလူဖြစ်ဟေ။ 6 အိမ်မှာနိမ့်ဟူးနာ ဘုရားရှင်ဂါး ပညတ်တော်ရက်အင် အကာမင်အငါထမ်း လိုက်နာဂို ဘုရားရှင်ကရှေ့တော်ယာ ဖြောင့်မတ်ကလူးရက်ဖြစ်ဟေ။ 7 အဲလစ်ဇဘက်နာ ဘင်းစားမက်ဖြိုက်ကအကြောင့်bမန်ဆာအလှုထမ်း အမာရက်က နိမ့်ဟူးစလုံးယေ့ အဆက်ရက်နာ ပြာယိုးဝန်ကဟေ့။ 8 ယက်တာဂါရပ် ဇာခရိစာ ဗိမ္မာန်တော်ဝါ အလှည့်ကျတာဝန်ယင် ဆောင်ရွက်တုန်းကရပ် 9 ပုရောဟိတ်ရက်ကထုံးစံအရ ဗိမ္မာန်တော်ထဲယာ အမွှေးနံ့ဆာရက်အိမ် ထွန်းဂို့ပူဇော်ကဇိစ် မဲနှိုက်ကို ရွေးချယ်ကရပ် အမင်ရွေးချယ်လင်ကဟေ။ 10 မဒေဖြိုက်ကို ဇာခရိစာ အမွှးတိုင်းငင် ထွန်းဂို့ပူဇော်ကားအချိန်ငါ လူးရက်နာ ဗိမ္မာန်တော်ဝန်းယာ cဆုစိန်ဂိုတုန်းလင်ဂါဟေ။ 11 ကျီးကအိမ် ဘုရားရှင်ဖြောက်နက်ဟေကား နတ်ဒေဝါစာd အမွှေးနံ့ဆာရက်အိမ်ထွန်းဂိုပူဇော်ကရပ် ပလ္လင်ပုတ်ဆလက်ဖက်အာe ဇာခရိအင် ကိုယ်ထင်ဆနပ်ကို စက်တုန်းဂါး 12 ပိုနဲ့က(လ်) အမာစာ တဗျင်းအစက်ဂို့ တုန်လှုပ်လင်ဂါဟေ။" 13 အိမ်မာကရပ် ဟမန်းဒေဝါနာ အမင်ယင် "အစက်ယေ့ ဇာခရိ။ နင်ဂါး ဆုစိန်ဂါးရက်အင်ဘုရားရှင် တတ်ဟေ။ နင်ဂါ အအီးတာအဲလစ်ဇဘက်နာ နင်ဂါးအတွက်အဆာဟူးဝါးကေဗာဂါ။ နင်စာ အမင် ယောဟန်ငါးဂို အမိန်းအီးပိုဂါ။ 14 အမာဂါးကေဟေကအချိန်ယာ နနိန်းရက် တဗျင်ဝမ်းမြောက်က ဒက်လေ လူးအပေါင်းရက်အ(လ်)ဝမ်းမြောက်ပျော်ရွှင်ပေါ်ဂါ။ 15 ယောဟန်နာ ဘုရားရှင်ဂါရှေ့တော်ယာ ကြီးကျယ်မြင့်မြတ်ဟေကလူဖြစ်လင်ကား။ အမှာနာ ဟက်တာယဲ့ ဝိုင်အိမ်အရက်အင် အူလင်ဂါအရိန်ပါ(လ်)။ အမာအကေမိဘင်း ဉာဏ်အလင်းတော်နာ အမာအိမ်မက်တာငါ့လင်ကား။ 16 အမှာနာ များပြားဟေကား အစ္စရေးမျိူးရက်အင်f နောင်တသံဝေဂလူးဇိစ်ဂို အမှာရက်က ဘုရားရှင်ကဟိုက်နီးယာ ပြန်လှည့်ဇိစ်လင်ကား။ 17 ယောဟန်နာ အရိယာသူတော်စင်ဧလိယတလေ အခွင့်အာဏာအိမ် ဘုန်းတန်ခိုးငါကို အရှင်သခင်က ရှေ့တော်ပြေးဖြိုက်လင်ကား။ အမာနာ အနှုးဗားအိမ်အဆာနာရက်က စိတ်နှလုံးရက်အင် ညီညွတ်ဇိစ်ကို လက်ခံခြင်အငါကလူးရက်အင် ဆနိန်အီလင်ကား။ မှအကြောင့် လူရက်နာ ဘုရားရှင် ကြွယောဝန်ကအချိန်ယာ အဆင်သင့်ဖြိုက်တုန်းလင် ကားငါ့ဂို" င့ါလင်ကဟေ။ 18 ကျီးကအိမ် ဇာခရိယေ့ ဟမန်းဒေဝါယင် မှဒက်လေဖြစ်ယိုဝန်ဂါငါဟေကား ငါအဆမီရှေးကယာ။ ငါ့ရက်မောင်နှင်းနိမ့်ဟူးစလုံးနာ တဗျင်းအဆက်ပြာတုန်းနန်း"ငါးဂို ပြန်ငှားလင်ဟေ။ 19 အိမ်မာကရပ် ဟမန်းဒေဝါယေ့ အမင် "ငါနာ ဘုရားရှင်ကရှေ့တော်ယာ ခစားပိုကား ဂါဗြေလ ဖြစ်ဟေ။ အတတ်ကဒေလေ ဝမ်းမြောက်ဖွယ်သတင်းတူးယင် နင်ကမားဗန်(ဖ်)ငါ့ကဇိစ် ဘုရားရှင်နာ ငင်ဖြောက်နက်အန်ဂါဖြစ်ဟေ။ 20 မှအကြောင့် ငါကတူးယင် နင်အကျုံးကအကြောင်းအိမ် မှအဖြိုက်ပျက်ရက် အဖြိုက်ပျက်တက်က အချိန်ထိ နင်နားတူးအပြိန်လှုထမ်း တုန်းလင်ကား။ ငါ့ကတူးနာ အချိန်တန်နဲ့က(လ်) ဖြစ်လင်ကား"ငါ့ကို ငါ့လင်ကဟေ။ 21 ဇာခရိအိမ်ဟမန်းဒေဝါရက်နာ ဗိမ္မာန်တော်အထဲယာ တူးပြိစ်တုန်းကရပ် အပြင်ဖက်အာငါဟေကား လူထုပရိသတ်ရက်စာ ဇာခရိအင်စောင့်ဂို ငှားလင်ကဟေ။ အမှာရက်နာ ဗိမ္မာန်တော်အတောင်ဟုန်းငါ ဇာခရိ အဇာရိကအကြောင်း အချိန်ကြာတုန်းဂါးယားငါ့ကို စိတ်ဝင်စားတုန်းလင်ကဟေ။ 22 ဇာခရိ အပြင်းငင်ပြူးယိုးဝန်ဂါအချိန်ငါ ဗိမ္မာန်တော်အတောင်ဟုန်းငါတုန်းကရပ် ဇာခရိစာ နိမိတ်လက္ခဏာအင် ပိုဒက်ဟေငါ့ကို လူထုပရိသတ်ရက်နာ နားလည်လင်ကဟေ။ အမာစာ ဆွံ့အဂိုး လူးရက်အင် ခြေဟန်လက်ဟန်အိမ် ဆက်လက်ကို အမူအရာရက်ဆနပ်တုန်းလင်ကဟေ။ 23 ကျီးကအိမ် ဇာခရိနာ ဗိမာန်တော်ယာg ဆောင်ရွက်ပိုဂါး အမှုတော်ရက်အင် ဆောင်ရွတ်ကျီးဟေကအခါ အမာဂါကိန်းငါ ပြန်လင်ကဟေ။ 24 အချိန်စိဆာကြားယိုးဝန်ဂါးအချိန်ငါ ဇာခရိကအအီးတား ဧလိရှဗက်နာအပိ ငါယိုဝန်ဂါဟေ။ အိမ်မှတဆာလောင်နာ အချိန်ငါးလ ကြားဇရိုးမှား ကိန်းငါဘင်းအပြင်း အပြူထန်း တုန်းလင်ကဟေ။ 25 မှတာဆာလောင်နာ "အရှင်စာ ငါဇီစ်ကိုယ်ဝန်ဆောင်လှုကား အခွင့်ငင်အီဒက်နန်း၊ အမာကအလိုတော်အားဖြင့် ငါယင် လူးရက်ကအထင်သေးနိမ်ချကဲ့ရဲ့ဟေကမှဘင်း ပပျောက်ဇိစ်ဒက်ဟေ " ငါ့ကို ငါ့လင်ကဟေ။ 26 ဧလိရှဗက်အပိငါဂို့ ခြောက်လနီးပါးကြားဟေကားအချိန်ငါ ဘုရားရှင်စာ h ဟမန်းဒေဝါ ဂါဗြေလယင်i ဂါလိလဲပြည်ယာဂါး၊ နာဇရက်မြို့အာဖြောက်နက်ကို 27 မာရိငါးဂိုအော်ဟေက နင်းဆီဆာတဆာလောင်ဆာဟူးဝါထနဲ့ လင်ဂိုး သတင်းတူးရက်အင် ပြိစ်ဇိစ်လင်ကဟေ။ မာရိစာ ဘုရင်ဒါဝိဒ်က မျိူးရိုးယာဘင်း ဆင်းသက်ဗန်(ဖ်)ကလူးဖြိုက်ဟေကား ယောသပ်အိမ် စေ့စပ်ပီက လူးဖြိုက်ဟေ။ 28 ဟမန်းဒေဝါနာ နူတ်ဆက်ကျီးကရပ် မာရိယင် " ဘုရားရှင်နာ နင်အိမ်မက်တာငါဂိုး အမာက မဟာဂရုနာမေတ္တာတော်ယင် နင်ကအပိုဝါမယ် ဆနပ်လင်ဟေ"ငါ့ကို ငါ့လင်ကဟေ။ 29 ဆိုဆော် မာရိစာ အိမ်မာတူးယင် တတ်ကရပ် တဗျင်းစိတ်ရူပ်ကလင်ကို အမန်းဒေဝါရက်ကတူးစာ အဇာဆိုလိုဟေကအကြောင့်ယင် စဉ်းစားတုန်းလင်ကဟေ။ 30 အိမ်မားကရပ် ဟမန်းဒေဝါနာ မှတာဆာလောင်ယင် "အစက်ယေ့၊ မာရိ။ ဘုရားရှင်နာ နင်ငင် မျက်နာသာအီယင်နန်း။ 31 နင်နာ ကိုယ်ဝန်ငါးဂို အဆာဟူးဝါးကေလင်ကား။ အမှားဂါအမိန်းယင် ယေရှုငါးဂိုအော်ပေါ်ကား။ 32 အမှာနာ ပြောင်ဟေကားလူဟူးဝါ ဖြစ်ယိုးဂို့ အမြင့်မြတ်ဆုံးက ဘုရားရှင်ဂါးအဆာငါးဂို အော်ဟေကား ဟင်းလင်ပေါ်ကား။ အမာက ဘိုးဘေးဖြိုက်ဟေကား ဘုရင်ဒါဝိဒ်တလေ အမာကလူမျိူးရက်အင် အုပ်ချူပ်လှုကအခွင့်ယင် ဘုရားရှင်နာ အမာဇိစ်အီလင်ကား။ 33 အမှာနာ အစ္စရေးလူမျိူး အပေါင်းရက်အင် ဘုရင်အဖြိုက်ထာဝရအုပ်စိုးဂို အမှာဂါးနန်းဆက်အ(လ်) ဟက်တာယဲ့ အစီးလင်ကား အရိ(လ်)ပါ(လ်)"ငါ့ကို င့ါလင်ကဟေ။ 34 အိမ်မကရပ် မာရိနာ " ငါနာ နင်းဆီဟူးဝါးဖြစ်က အတွက်ကြောင်း မှအူဇာနာ အဆာမီဖြိုက်လှုကားယား"ငါ့ကို ဟမန်းဒေဝါယင် ငါ့လင်ကဟေ။ 35 ဟမန်းဒေဝါယေ့ "ဉာဏ်အလင်းတော်နာ နင်ထနဲဆင်းသက်ကို ဘုရားရှင်ကတန်ခိုးတော်ယဲ့ နင်ကာအဖုံးယာ လွမ်းခြုံလင်ကား။ မှအကြောင့် နင်ကအဆာယဲ့ ဘုရားရှင်က မြင့်မြတ်ကအဆာငါ့ကို အော်ကဟင်းလင်ပေါ်ကား။ 36 နင်ဂါးဆွေမျိုးဖြစ်ဟေကား ဧလိရှဗက်နာ အဆက်ပြာကို လူးရက်နာ မန်းဆာအလှုနိုင်းဂါထင်တုန်းကယေ့j အတတ်ကိုယ်ဝန်ဆောင်တုန်းကရပ် ခြောက်လနီးပါး ငါးတုန်းနိူင်း ဖြစ်ဟေ။ 37 "ဘုရားရှင်က အလိစ်လှုကား အူဇာဆူးယေ့အငါပါ(လ်)"ငါ့ကို င့လင်ကဟေ။ 38 အိမ်မာကရပ် မာရိနာ "ငါနာ အရှင်ဘုရားက ကျေးကျွန်အစေခံ ဟူးဝါဖြစ်နက်ဟေ။ နင်ငှားဟေက တူးအတိုင်း ငါကအပေါ်ဝါ ဘုရားရှင်ဂါး အလိုငါဟေကအတိုင်း ဖြစ်နက်ပိုဇီစ်"ငါးဂို့ ငါလင်ကဟေ။ ကျီးကအိမ် ဟမန်းဒေဝါနာ မာရိကမှားဘင်းပြူကလင်ဟေ။ 39 နီးကတောင် မာရိနာ အဆင့်သင့်ပြင်ဂို့ ဇာခရိတုန်းကနေရာ ယုဒမြို့ပြည်ယာ တဂိုးဒေသယာ အမြန်ဆုံးလင်ကဟေ။ 40 အိမ်မာနေရာထုပ်ကရပ် အမှာစာနာ ဇာခရိကကိန်းအတောင်ဟုန်းငင်ဆင်ဂို့ အမှာဂါအအီးတားဖြစ်ကဧလိရှဗက်အင် နှုတ်ဆက်နက်ကဟေ့။ 41 မာရိကားနှုတ်ဆက်ဟေကတူးဝင် ဧလိရှဗက်တတ်ဟေကရအ် အမှာဂါအပိအတောင်ဟုန်းငါဂါးမန်းဆာနာ ရိန်းမို(လ်)တုန်းလင်ကဟေ။ ဧလိရှုဗက်နာ ဘုရားကဉာဏ်အလင်းတော်အိမ် ဝမ်းမြောင်ရွှင်လန်းဂို ဘုရားရှင်ယင် ဂုဏ်ပြုလင်ကဟေ။ 42 ဧလိရှုဗက်နာ မာရိယင် "ဘုရားရှင်နာ တခြားတဆလောင်ရက်တောင်မှာဒင့် နင်ငင်ပိုဂို့ ကောင်းကျိုးချမ်းသာအီပီးဂို့ နင်ဂါကေယိုဝိုင်းဂါမန်ဆာယေ့ ကောင်းကျိုးချမ်းသာလှုလင်ဂါး။ 43 အရှင်ကအနှုးနာ ငါ့ထနဲ့ အဇာရိ(လ်)ကိုဗန်(ဖ်)ကယား အဆာမီကအကြောင်း အတတ်ကအဒေလေ အခွင့်ထုယင် ငါခံစားပေါ်ကယား။ 44 နင်ဂါးနှုတ်ဆက်ဟေကအကြင်တပ်ဟေကရပ် ငါဂါ အပိအတောင်ဟုန်းကမန်ဆာနာ ပျော်ရွှင်ဝမ်းမြောက်ဂို့ ခုန်တုန်းဟေ။ 45 ဘုရားရှင်းဂါးဗျာဒိတ်တူးနာ အမှန်တကယ်ဖြစ်ယိုးဝန်ကငါးဂို့ နင်ယုံကြည်ဟေကအကြောင့်အိမ် နင်စာ အဒင့်မင်္ဂလာငါဟေ"ငါ့ဂို ဟော်ဂိုင့ါလင်ကဟေ။ 46 ကျီးကအိမ် မာရိယဲ့ "ငါစာ ဘုရားရှင်က ဂုဏ်ကျေးဇူးယင် ချီးမွမ်းနက်ဟေ။ 47 ငါကစိတ်ဝိညာဥ်စာ ကယ်တင်ရှင်ဘုရားရှင်ထနဲ့ အားရတဟောင်လှုဂို့ ပျော်လင်ကဟေ။ 48 ငါနာ ကိုယ်တော်က နိမ့်ကျဟေကားအစေခံဖြိုက်ကယဲ့ အတတ်ကအချိန်ငါဘင်းစဂို့ မျိူးဆက်တိုင်းယာက လူးဘောင်းကိုရက်စာ ငင်ယင်ကောင်းချီးမင်္ဂလာအီးဂါးဟင်ပိုဂါးလူး" ငါးဂို့ ငါ့လင်ကား။ 49 တန်ခိုးတော်ပြောင်ဟေကာ ဘုရားရှင်စာ ငါကအဖုံးယာ မြင့်မြတ်အူဇာရက်အင် သက်ရောက်တော် မှုဂို ငါလင်ကဟေ။ 50 ခေတ်ဆက်ဆက်အာက ဘုရားရှင်စာ အမင်ယင် လေးစားကိုးကွယ်ဟေကား လူးရက်အင် မဟာကရုဏာမေတ္တာရက်အင် အမြဲထင်ရှားဂို့ ဆနပ်လင်ကဖြစ်ဟေ။ 51 ဘုရားရှင်နာ မှန်မာန်နာထောင်ဟေက လူအပေါင်းရက်အင် အမာကတန်ခိုးတော်အိမ် လွင့်စင်ဇိစ်လင်ကဟေ။ 52 ဘုရားရှင်နာ အုပ်စိုးဂါးလူးရက်အင် အမှာရက်ကား ပလ္လင်ပေါ်ငါဘင်းဆွဲချဂို နှိမ့်ချဒက်ဟေကား လူးအပေါင်းရက်အင် အရေးပါဟေကား လူးရက်ဖြိုက်ဇိစ်လင်ကဟေ။ 53 ဘုရားရှင်နာ ပုဆာလောင် ငတ်မွတ်တုန်းဟေက လူးရက်အင် မှီးဟေကားအစာအာဟာရအီးဂို့ သူဌေးရောက်အင် လက်လွှတ်ဗလာအိမ်ဖြောက်ဟေ။ 54 ဘုရားရှင်နာ အမာဂါး မဟာကရုဏာမေတ္တာတော်ယင် အမှတ်လှုကအဖြင့် အမူတော်ယင် ဆောင်ရွက်ကလူး အစ္စရေးလူမျိူးရက်အင် ကယ်တင်စောင့်ရှောက် လင်ကဟေ။ 55 "ဘုရားရှင်နာ ငါ့ရက်က အအီးအုပ်ဖြစ်ဟေကား အာဗြဟံဂါးမျိုးရိုးစဥ်ဆက်ရက်က ကတိတော်အတိုင်း အစဥ်ထာဝရစောင့်ရှောက်တော်မူလင်ဟေ။" ငါးဂို့ ဘုရားရှင်ဂါးဂုဏ်တော်အင် ချီးမွမ်းပူဇော်လင်ကဟေ။ 56 ကျီးကအိမ် မာရိနာ ဧလိရှဗက်အိမ်မက်တာ သုံးလခန့် တုန်းကျီးကရပ် အမာက ကိန်းငါပြန်းကလင်ဟေ။ 57 ကျီးကအိမ် ဧလိရှဗက်စာ ကေယိုးငန်ကားအချိန်ထုပ်ဗာ(ဖ်)ကရပ် အဆာတာဆာ ဗြိုင်းဟူးဝါယင် ကေလင်ကဟေ။ 58 ဧလိရှုဗက်ကကိန်းနားက ဆွေမျိုးရက်နာ ဧလိရှဗက်အပေါ်ဝါ ပီးဟေက ဘုရားရှင်းကားမေတ္တာပြောင်ဟေကား တတ်ဂို့နာချေးပီးဂါကြောင့် ငါအိမ်မက်တာ ပျော်ရွှင်ဝမ်းမြောက်ဂိုငါလင်ကဟေ။ 59 မန်းဆာကေကျီးဂို့ရှစ်ရက်မြောက်ဟေကားရယက်အာ မန်ဆာအင်္ဂါကိတ်ဟန်ဂါ မင်္ဂလာဒက်လေဆောင်ရွက်ကဇီစ်ဝတ်တရားရက်အင် ဆောင်ရွက်ကဇီစ် ဗန်(ဖ်)ဟေကလူးရက်နာ မာန်ဆာဂါအမိန်းငင် အဗာ(ဖ်)ဖြိုက်ဟေကား ဇာရိကအမိန်းယင်လာဂိုး ဇာခရိငါ့ကို အမိန်းအီကက်ကဟေ။ 60 ဆိုဆော် မာန်ဆာကားအနူးနာ "အမာက အမိန်းနာ ယောဟန်ဖြစ်ဟေ" ငါးဂို ငှားလင်ကဟေ။ 61 လူးအပေါင်းရက်အ(လ်) မှတာဆာလောင်ယင် "နင်ကမျိုးရိုးထဲယာကား အတတ်ကဒေလေက အမိန်းအငါပါ(လ်)"ငါ့ကို င့လင်ကဟေ။ 62 နီးကဒေါင်း အမှာရက်နာ မန်းဆာဂါးအဗားဖြစ်ဟေကလူး ဇာခရိအင် တာဟူးအိမ်ဆနက်ဂို အဆာမီက အမိန်းယင် အော်ကက်ဟေယားငါ့ကို ကတာလင်ကဟေ။ 63 ဇာခရိနာ သင်းပုန်းတစ်ချက်လာဂို အမှာဂါအမိန်းနာ ယောဟန် ဖြစ်ဟေငါးဂို ရေးလင်ကဟေ။ ပိုဟေကလူအပေါင်းရက်နာ အံ့ဩဂိုငါ့လင်ကဟေ။ 64 ကျီးကအိမ် ချက်ချင်းနာ ဇာခရိယေ့ စတင်ဂို့တူးပြိစ်လှုကိုး ဘုရားရှင်းဂါဂုဏ်တော်ယင် ချီးမွှမ်းလင်ကဟေ။ 65 ကိန်းနားကလူးရက်အိမ် ဆွေမျိုးဆန်းစူရက်နာ မှအဖြစ်အပျက်အင်ပိုဂါးအခါ အစက်ဂို့တုန်လှုပ်လင်ကဟေ။ လူးဆန်းစူရက်နာ အိမ်မှသတင်းငင် ယုဒပြည်တောင်ပေါ်ဒေသယာက နေရာတိုင်းငါ ငှားတုန်းလင်ကဟေ။ 66 အိမ်မားသတင်းတူးရက်အင် တတ်ပေါ်ကားလူးအပေါင်း ရက်အ(လ်) "မှမန်ဆာပြောင်ယောဝန်ကရပ် အဆာမိကလူးဖြိုက်အန်ကယား"ငါ့ကို စိတ်ဝင်တစား တီးတိုးငါ့တုန်းလင်ကဟေ။ ဘုရားရှင်ကတန်ခိုးတော်ယဲ့ မန်ဆာအိမ်မက်တာ ငါတုန်းလင်ကဟေ။ 67 ကျီးကအိမ် ဉာဏ်အလင်းတော်စာ ဇာခရိကမားထုန်ကို အမာနာ 68 "အစ္စရေးလူမျိုး ဆန်စူရက်က အရှင်သခင်ဖြစ်တော်မူဟေကား ဘုရားရှင်ဂါး ဂုဏ်ကျေးဇူးတော်ငင် ငါချီးမွမ်းဟေ။ ဘုရားရှင်နာ အမာကလူမျိူးအပေါင်းရက်အင် ကယ်တင်ကဇီစ် ကြွဗန်(ဖ်)ဟေကဖြစ်ဟေ။ 69 ဘုရားရှင်နာ အပါနာကအစေခံဖြစ်ဟေ ဒါဝိဒ်ဘုရင်ဘင်းဆက်သက်ဗန်ဟေက တန်ခိုးအာဏာပြောင် ဟေကား ကယ်တင်ရှင်နာ ငါရက်ကအတွက် ပေးသနားတော်မူလင်ကဟေ။ 70 မလားအခါကရပ် ဘုရားရှင်စာ မြင့်မြတ်ဟေကား အရိယာသူတော်စင်ရက်အင် ကတိအီးဒက်ကအတိုင်း။ 71 မှတန်ခိုးပြောင်ဟေကား ကယ်တင်ရှင်စာ ငါရက်အင် ရန်သူအပေါင်းရက်အာဘင်း ကယ်တင်ကအပြင် ငါရက်အင် မလိုမုန်းတီးကလူးရက်က ဘေးအန္တရာယ်ယာဘင်း ကင်းလွတ်ဇိစ်လင်က ဖြိုက်ဟေ။ 72 ဘုရားရှင်နာ မဟာဂရုဏာတော်အိမ် ငါရက်ကဘိုးဘေးရက်အင် အီဒက်ကား ကတိတော်ယင် တည်ယိုင်ဂါးဖြစ်ဟေ။ 73 ဘုရားရှင်နာ ငါ့ရက်ကား အအီးအုပ်ဖြစ်ဟေကား အာဗြဟံယင် ကတိအီပီဟေကအတိုင်း။ 74 ငါ့ရက်အင် ဘေးအန္တရာယ်ပြူဟေကလူး ရန်သူရက်က တာဟူးဘင်း ကယ်ဆယ်ဂါးဖြစ်ဂို့ ငါရက်ယေ့ အဆက်ဆိမ်တုန်းက ကာလပတ်လုံး အကြောက်တရား ကင်ဝေးစွာအိမ် ဘုရားရှင်ဂါးအမှုတော်ငင် ထမ်းရွက်ပိုဂါးဖြစ်ဟေ။ 75 အိမ်မာဒေလေအားဖြင့် ငါရက်အ(လ်) အမာကရှေ့တော်မှောက်အာ ဖြောင့်မတ်စင်ကြယ်ကငါဂိုး ကျန်တုန်းကဘဝအဆက်အင် ကုန်ဆုံးလင်ပေါ်ကဖြိုက်ဟေ။"ငါ့ကို ဘုရားရှင်က ဂုဏ်ကျေးဇူးတော်ယင် ချီးမွမ်းလင်ကဟေ။ 76 ကျီးကအိမ် ဇာခရိစာ အမာကအဆာယင် " ငါကားအဆာ၊နင်ငင် အမြင့်မြတ်ဆုံးက ဘုရားရှင်ဂါ အရိယာသူတော်စင်ဒေလေ kအော်ဂို့ချီးမြောက်လင်ကဖြစ်ဂို့ ဘုရားရှင်ဂါလင်းငင် ကြိုတင်ပြင်ဆင် အီးဂါလူး ဖြစ်လင်ကား။ 77 ဘုရားရှင်နာ လူရက်ကအပြစ်ရက်အင် ခွင့်လွတ်အီကျီးကရပ် ကယ်တင်အီကားဟင်ပိုဂါးအကြောင်းငင် နင်စာ လူးရက်အင် ဟောဆနပ်လင်ပေါ်ကား။ 78 ဘုရားရှင်ဂါး မဟာကရုဏာမေတ္တာရက်နာ ကောင်းကင်အဖုံးငါကား စမိတ် ထွန်းလင်းတောက်ပတုန်းကဒေလေ ငါ့ရက်ကအပေါ်ဝါး ထွန်းလင်းဂို့။ 79 ဆိန်းကတရားယင် ရင်ဆိုင်တုန်းဟေကလူရက်အင် အပြစ်ဘင်း ကင်းလွှတ်ဂို့ အေးချမ်းဟေကဘဝယင် လင်းဆနပ်ဂို့ အီးလင်ကား"ငါ့ကို ပြိစ်လင်ကဟေ။ 80 အတတ်ကအခါ ယောဟန်စာ အရွယ်ထုန်းဗာ(ဖ်)ဂိုး အကျင့်သီလအိမ် ပြည့်စုံကလူးဖြိုက် ယောဝန်ကဟေ။ ဘုရားရှင်နာ အမာယင် အစ္စရေးလူမျိူးရက်ကရှေ့ယာ အမူတော်ယင် စတင်ကိုလုပ်ဇိစ်ကက်ကား ရယက်အထုန်မိ အမာစာ မလိမ်းကန္တာရအထဲယာ ကျင်လည်တုန်းလင် ကဟေ။ |
This translation of the Thet Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.