Luke 24 - TaiLaing1 ဝမ်းတနင်္ဂနွေ ကမ်းနောဝ်စောင့်(ဝ်)စောင့်(ဝ်) ကော့်ယဉ်းလေန နမ့်အောင်းဟောမ်လေအောင်း(ဝ်)ဆီ ကွာစူးရာခန့်ဂူစောင့်ယေရှုကော်ဝိုက်။ 2 မနော်ထီန်ကော်ရာခန့်နာ့ဆိုတူးလော့် ကောင့်ဟဉ်လုန်အောင်းပိဝိုက်န ကော်နိမ်မကော်နိမ် ဖယ်ဝေဝိုက်ကော်ဝါလ ဆီမေအောင်းကိုင်း နယ့်ခေါက်(ပ်)ဟင်းကော်ဝိုက်။ 3 ခေါင့်(ဝ်)ခနောဝ်ဂူဟင်းကော်လော့် အောင်းတိုးစောင့်ယေရှု မဟောန်ဟင်းနော့်ဝိုက်။ 4 မနော်လေန ပေးနောင်နူးကော်ဝါလ တကြားစဉ်းစားမနွိုက်အွန်ညော့ ဆေခေါင်(ဝ်)ဖခေါင်(ဝ်)နွန်ဆီ တောင်းတိုးတိုးအောင်းအရောင်အောက် ကွန်းဆောင်(န်)ကော့်လ ချရှ်ချန်းပေါ်မားဆီ မားစိန်ဝိုက်ခန့်မနော်ကော်ဝိုက်။ 5 မွတ်ကော့်ယဉ်းလေကော့် တွန်ဟင်းကော်ဆီ ခနေနောင်နဉ်း နှောင်တောင့်(ဝ်)ခေါင်(ဝ်)ဟင်းကော်ဝိုက်။ တော်နယ် ကွန်းဟောန့်ဆောင်(န်)ကော့်လ "ရာဝိုင့်အောင်းကွန်းသိုင်းလ ဟေဟောင်းဆီ မားခါအောင်းကွန်းအဆတ်ရောင်းလ။ 6 စောင့်ယေရှု ရာဟိုင့်မရောင်းကော့်။ မွန်းလ ဆီမေသိုင်းရောင့်(ဝ်) ခွန်းပေါက်မားကော်၊ မေရာမှိန်းဂါလိလဲ အောင်းမွန်းဝါမားအောင်းမဆူလေ ယဉ်းဖမ်ဟင်း။ 7 အောင်းလူ့သားတော် ခနောဝ်မေးကွန်းဟေအောင်းမနီးလေ တအပ်ဟင်းကော်ဝိုက်။ မနော်လေ အောင်းလူ့သားတော် ရာလက်ဝါးကပ်တိုင်တန်ဆီ တအောဝ်းသိုင်းဟင်းနော့်။ တော်နယ် မွန်းလ ဆမ်ဝမ်းဟောင်ပေါထိန့် တခွန်းပေါက်မားဆီ ဝါမားမစော်လေး"ဆီ လောင်(ဝ်)ပြားကော်ဝိုက်။ 8 မေနယ်လော့် ကော့်ယဉ်းဟောန့်လေန အောင်းစောင့်ယေရှုဝါမားလေ မှတ်ပေါက်ကော်ဝိုက်။ 9 ကော့်ယဉ်းဟောန့်လေန စဆီဂူဟောန့် ပေါက်ဟင်းမားဆီ အောင်းတပဲ့စောင့်ယေရှု ဆစ်(ပ်)အေကော့်တောင်း အောင်းကွန်းတန်းတီလေတောင်းလုန် အောင်းအကြောင်းဟောန့်လေတောင်းလုန် လောင်(ဝ်)ပြားကော်ဝိုက်။ 10 အောင်းအကြောင်းဟောန့် ကွန်းလောင်(ဝ်)ပြားအောင်းတပဲ့လေန ကွန်းမှိန်းမာဂဒလမာရိ၊ ယောဟန္န၊ မယ်ယာကုပ်မာရိတောင်း အောင်းကျန်ကော့်ယဉ်းလေဝိုက်။ 11 သာဝကစောင့်ယေရှုလေကော့် ခွမ်းအောင်းကော့်ယဉ်းဟောန့်လေဝါလ အဓိပ္ပါယ်မရောင်းဆီ မနော်ထန်ဟင်းညော့ မယွန်(မ်)ဟင်းဝိုက်။ 12 တော်နယ် ပေတရုလ ရာချန်းချိန်းဟောန့် ပိုင်ကွာကော်ဆီ ကုံမ့်တွဲကော်ဝိုက်။ တိုးကွန်းမရောင်းကော့်ဆီ ဖအောင်းပတ်ဝိုက်အောင်းကွန်းသိုင်းနဲဟော် ရောင်းဟောဝါလ နယ့်ဟောန်ကော်ညော့ အမ်းဆီ ပေါက်ဟုန်းမားကော်ဝိုက်။ 13 မေဝမ်းဟိုင့်ညော့ ခနောဝ်တပဲ့စောင့်ယေရှုန ဆောင်(န်)ကော့်လ တောင်းဂျေရုဆလင်တောင်း စေမိုင်ကိုင်း တော်မန့်ဧမောက်ပွန့် ကွာဟင်းကော်ဝိုက်။ 14 မနော်လေန အကြောင်းအောင်းစောင့်ယေရှု ပေးမာနောင်နယ့်လ တန့်ဆီ ကွာဟင်းကော်ဝိုက်။ 15 မေမနော် ကော်နိမ်တောင်းကော်နိမ် တန့်ဟင်းဆီ ပိုင်းကော်ညော့ စောင့်ယေရှုလ ကောင့်(ဝ်)စူးမားဆီ တောင်းမနော်တောင်း ပိုင်းဆီ ကြွမားကော်ဝိုက်။ 16 စောင့်ဖလားန အောင်းစမနော် ဟပေါမမှတ် လပ်ဝိုက်ညော့ တပဲ့လေန အောင်းစောင့်ယေရှု ဟောန်မေကော့် မမှတ်ဟင်းဝိုက်။ 17 စောင့်ယေရှုလ "မဆူပိုင်းဆီ တန့်အကြောင်းအဟောင်းဟင်း"ဆီ ထန်(မ်)ကော်အောင်းမနော်လော့် မနော်လေန နာ့မနီးဆီ ရပ်ဟင်းကော်ဝိုက်။ 18 ခနောဝ်မနော် အောင်းစေကလောဖလ အောင်းမွန်းစောင့် "မေပွန့်မား ဝမ်းစောင်နိန်လ ရာမှိန်းဂျေရုဆလင်ဟိုင့် ပေးအဟောင်းမားဝါလ အောင်းမဟုလ မောကောနိမ်နဲဟော်လေး"ဆီ ဝါကော်ဝိုက်။ 19 မွန်းစောင့်န "ပေးအဟောင်းမား"ဆီ ထန်(မ်)ကော်လော့် ကွန်းဟောန့်န "ကွန်းမှိန်းနာဇရက် အဖြစ်ပျက်စောင့်ယေရှု။ မွန်းန အောင်းခနီးအမ်းလေ ဟေမားဆီ အောင်းခနီးစွုမ်း မင်္ဂလာသတင်းလေ အောင်းဟောမား ပေးပရောဖက်ပါးနိမ်ဝိုက်။ အောင်းမွန်းဟော အောင်းမွန်းဟေမားလေန အစွမ်းအိုက်ရောင်(ဝ်)ဆီ ကွန်းလေန ထန်ဟင်းဝိုက်။ 20 တော်နယ်ကော့် ပုရောဟိတ်အောင်းရောင်(ဝ်)လေတောင်း ဂျူးခေါင်းဆောင်လေန အောင်းမွန်းစောင့် ဝမ့်ရောင့်(ဝ်) ရာခနောဝ်မေးရောမအာဏာပိုင်လေ အပ်ဆီ ရာလက်ဝါးကပ်တိုင်ဟောန့် တောင်းလေမိုက်နားတောင်းတင်ဆီ အောင်း(ဝ်)သိုင်းဟင်းမားဝိုက်။ 21 စောင့်ဟောန့်န အောင်းအမျိုးအစ္စရေးလေတောင်းလုန် စောင့်အောင်းတလိတ်ဟောင့်(ဝ်)ဆီ ဟောထန်မား။ တော်နယ် အဖြစ်ပျက်ဟိုင့်လေန မေပွန့်မား ဆမ်ဝမ်းန ပေးမားရောင့်(ဝ်)ကော်ဝိုက်။ 22 တော်နယ်ကော့် ခနောဝ်ဖွန်ဟော ကော့်ယဉ်းမောင်းဖောင်လေန ခွမ်းအောင်း ဟောခနီးအမ်းလေ လောင်(ဝ်)ပြားမား။ မနော်လေန ကန်းနောဝ်စောင့်(ဝ်)စောင့်(ဝ်) ကွာရာဂူစောင့်ယေရှုဟင်းလော့် 23 မနော်လေန အောင်းတိုးစောင့်ယေရှု မဟောန်မားဝိုက်။ နယ့်ရောင့်(ဝ်) ဖီလေန အကြောင်းစောင့်ယေရှု အဆတ်ခွန်းပေါက်မားကော်ဝါလ မနော်ပေါက်မားဆီ မားလောင်(ဝ်)ပေါက် အောင်းဟော။ 24 နောက်လောင်နော့် ခနောဝ်ကွန်းဟော မောင်းဖောင်လေကော့် မေကွာတွဲလော့် ရာချန်းချိန်းဟောန့်ကော့် နောင်ကော့်ယဉ်းဟောန့်လေဝါညော့ မနော်လေကော့် အောင်းအလောင်းစောင့်ယေရှု မဟောန်ဟင်း"ဆီ ဝါပေါက်ကော်ဝိုက်။ 25 ပေါရောင့်(ဝ်)နော့် စောင့်ယေရှုလ အောင်းတပဲ့မွန်းဆောင်(န်)ကော့် "မဆူဟေဟောင်းဆီ မဟုထောင်(မ်)ဟင်းန။ အောင်းပရောဖက်လေဝါလေန ဟပေါယွန်(မ်) ဟေဟောင်းဆီ နန်းဟင်းန။ 26 စောင့်ကယ်မေရှိယလ မေတန်ခိုးမွန်းလေမနွိုက်ခွေတ် ဒုက္ခလေ တနယ့်ခံစားဝါလ မဆူမဟုဟင်းလေး"ဆီ ဝါကော်ဝိုက်။ 27 နောက်လောင်နော့် စောင့်ယေရှုန အောင်းမောရှေလေတောင်း ပရောဖက်လေတင့်(မ်)ဝိုက် အကြောင်းစောင့်မေရှိယလေ ချန်းပြားအောင်းစမနော်ကော်ဝိုက်။ 28 မနော်ဆောင်(န်)ကော့် ထီန်ရာခန့်မန့်ကော်လော့် မွန်းစောင့်လ နောင်သကွာရာအောင်းကိုင်းကော့်လိုလိုဆီ နယ့်ဟောန်ညော့ 29 မနော်ဆောင်(န်)ကော့်န အောင်းစောင့်ယေရှု "ဝမ်းတိုဆီဖခမ်ကော့် တောင်းဟောတောင်း ဆောင်း(ဝ်)နွေ့ဟင်းကော်"ဆီ ဟောင့်ဟင်းကော်ဝိုက်။ ကောပ်နဲ့ညော့ စောင့်ယေရှုကော့် တောင်းမနော်တောင်း တဆောင်း(ဝ်)ဆီ ခေါင့်(ဝ်)ကော်ခနောဝ်ဟုန်းကော်ဝိုက်။ 30 တောင်းမနော်တောင်း တကျဉ်းနွေ့ဟင်းဆီ နောင်ကော်လော့် မွန်းစောင့်လ အောင်းခေါင့်(ဝ်)မွန်းကမ်းဆီ အောင်းဂုဏ်တော်စောင့်ဖလား ချီးမွမ်းကော်ဝိုက်။ အောင်းခေါင့်(ဝ်)မွန်းဟိုင့် ထောင်(န်)ဆီ ဟောင့်(ဝ်)အောင်းမနော်ကော်ဝိုက်။ 31 မေနယ့်လော့် အောင်းစမနော် တော်ပေါဟောန် ပွတ်ပေါက်ဟွန်းကော်ညော့ မနော်လေန အောင်းမွန်းစောင့် မှတ်ဟင်းကော်ဝိုက်။ နယ့်ရောင့်(ဝ်) မွန်းစောင့်လ ဆီမေမနော်ဟောန်န ဟိုင်ကွာကော်ဝိုက်။ 32 မနော်လေကော့် "ရာခွန်တန်း စောင့်ယေရှု အောင်းဟော မေမွန်းစောင့်ချန်းပြားအကြောင်းလိကျမ်းလေနာ့ ခနောဝ်စောင်း(ဝ်)ဟော အောင်းမွန်း နောင်ဟုစောက်လိုလိုဆီ နယ့်ခံစား မစော်လေး"ဆီ အချန်းချန်းဝါဟင်းကော်ဝိုက်။ 33 နောက်လောင်နော့် မနော်ဆောင်(န်)ကော့်လ ချရှ်ချန်း ပေါက်ဂျေရုဆလင်ဟင်းကော်ဝိုက်။ တပဲ့ဆစ်(ပ်)အေကော့်လ တောင်းကွန်းမောင်းဖောင်လေတောင်း စူးဟင်းဆီအူလ နယ့်ဟောန်ကော်ဝိုက်။ 34 မွတ်ကွန်းလေန အောင်းစကွန်းစောင့်ပေါက်မားဆောင်(န်)ကော့် "စောင့်ယေရှု ဆီမေသိုင်းလ ခွန်းပေါက်မားကော်ဆီ အောင်းစပေတရု(ရှိမုန်) ဟပေါခေါက်(ပ်)၊ ဟပေါဟောန် ခွင့်ဟောင့်(ဝ်)ဝိုက်ရောင့်(ဝ်)ကော်"ဆီ လောင်(ဝ်)ပြားဟင်းကော်ဝိုက်။ 35 ဆီမေမန့်ဧမောက်န တပဲ့ဆောင်(န်)ကော့်န ရာခွန်တန်း အောင်းမနော်ခေါက်(ပ်)မားတောင်း အောင်းခေါင့်(ဝ်)မွန်းထောန်ကော်မ အကြောင်းပေးစောင့်ယေရှုဝါလ မနော်နယ့်ဟုလေန လောင်(ဝ်)ပြားပေါက်ဟွန်းကော်ဝိုက်။ 36 နောင်နယ့်ဆီ တပဲ့မွန်းလေ မေဝါအကြောင်းဟိုင့်ညော့ မွန်းစောင့်လ ရာသိုင်းကန်းမနော် မားပြားတိုးဆီ အောင်းမနော် "စောင့်ဖလားန အောင်းစမဆူ အောင်းငြိမ်းချမ်းလေ ဟောင့်(ဝ်)မားကော်"ဆီ ဝါကော်ဝိုက်။ 37 တော်နယ်ကော့် တပဲ့လေကော့် နယ့်ဟောန်တူးခြောက်ကော်ဆီ ထန်ဟင်းညော့ တွန်ဟင်းကော်ဝိုက်။ 38 တော်နယ် မွန်းစောင့်လ "မဆူလ ဟေဟောင်းဆီ နီးကိုးဟင်းန၊ ဟေဟောင်း မယွန်(မ်)ဆီ သံသယခေါင့်(ဝ်)ဟင်းန။ 39 အောင်းတဉ်းကောမေးကောလေ စမ်းတွဲနူ၊ အောင်းကော စမ်းထိနူ၊ ရာတူးခြောက်လေန တိုးလေမရောင်း၊ ရာကောလ နောင်မဆူနယ့်ဟောန်ညော့ တိုးလေရောင်း"ဆီ ဝါကော်ဝိုက်။ 40 နောင်နယ့်ဝါဆီ အောင်းတဉ်းမွန်း မေးမွန်းလေ ပြားဟောင့်(ဝ်)ကော်ဝိုက်။ 41 တပဲ့လေကော့် စွုမ်းဟင်းဆီ အမ်းဟင်းမေကော့် မွန်းစောင့်ခွန်းပေါက်မားဝါလ နောင်မယွန်(မ်)ပဲ့ညော့ အမ်းဟင်းကော်ဝိုက်။ စောင့်ယေရှုလ အောင်းမနော် "ခေါင်ကျဉ်းတိုးနိမ်မတိုးနိမ် မရောင်းလေး"ဆီ ထန်(မ်)ကော်ဝိုက်။ 42 မေနယ့်လော့် မနော်လေန အောင်းမွန်းစောင့် ပါးပီလေ ဟောင့်(ဝ်)ကော်လော့် 43 မွန်းစောင့်ကော့် ခနာ့မနော် အောင်း(ဝ်)ဆီ ကျဉ်းပြားကော်ဝိုက်။ 44 နောက်လောင်နော့် စောင့်ယေရှုလ "ပညတ်မောရှေတောင်း ဖွန်လိပရောဖက်လေ၊ ရာကျမ်းဆာလံလေန အကြောင်းကောအောင်းပြားဝိုင့်လေန တပေးမားအောင်းတဲ့တဲ့ကော့်ဆီ အောင်းစမဆူ အကြောင်းအောင်းကောဝါမားလေန ပေးအဖြစ်ပျက်အစောင်လေ"ဆီ ဝါကော်ဝိုက်။ 45 နယ့်ရောင့်(ဝ်) အောင်းလိကျမ်းအောင်းတင့်(မ်)ဝိုက် အကြောင်းမွန်းန အောင်းတပဲ့မွန်းလေ တော်ပေါဟုစောက် ဆောန်ဟောင့်(ဝ်)ကော်ဝိုက်။ 46 နောက်လောင်နော့် အောင်းစမနော် "ရာလိကျမ်းဟိုင့် စောင့်ကယ်မေရှိယလ နယ့်ခမ်ဒုက္ခရောင့်(ဝ်) ဆမ်ဝမ်းဟောင်ပေါထိန့်ကော် ဆီမေအောင်းသိုင်းလ တခွန်းပေါက်မားဝိုက်။ 47 နောက်လောင်နော့် စောင့်ယေရှုန အောင်းကွန်းမနီးလေ နောင်တတော်ပေါနွိုက်တောင်း အပြစ်မနော် တော်ပေါနယ့်ခွင့်လွတ် ဆီမေမှိန်းဂျေရုဆလင်န စဆီ အောင်းကွန်းလေတောင်းလုန် တဟောပြား"ဆီ ပြားဝိုက်ဝိုက်။ 48 ကောပ်နယ့်ညော့ မဆူလေန ပေးကွန်းစောင့်ဟောန် အောင်းအဖြစ်အပျက်ဟိုင့်လေ။ 49 ကောလ နောင်ပေါ်ကောဟောင့်(ဝ်)ကတိဝိုက်ညော့ ခနေမဆူ ဉာဏ်အလင်းတော်လေ တဟထီန်မား။ ကောပ်နယ့်ညော့ မဆူလ ဆီမေနေရာနိဗ္ဗာန် တော်ဟောင့်(ဝ်)အစွမ်းလေပွန့် ရာမှိန်းနိဂျေရုဆလင်ဟိုင့် အူထဟင်း"ဆီ ဝါကော်ဝိုက်။ 50 နောက်လောင်နော့် မွန်းစောင့်လ အောင်းတပဲ့မွန်းလေ ဟောင့်ဆီ တော်မန့်ဗေသနိပွန့် ကြွကွာကော်ဝိုက်။ ထီန်ကော်ရာနေရာဟောန့်လော့် အောင်းစတပဲ့မွန်းလေတောင်းလုန် မွန်းစောင့်န မေးမြှောက်ဆီ ရောန်းဆုဟောင့်(ဝ်)ကော်ဝိုက်။ 51 နောင်နယ့်ဟေရောင့်(ဝ်)လော့် စောင့်ယေရှုလ ကြွပေါက်ရာနိဗ္ဗာန်ကော်ဝိုက်။ 52 တပဲ့မွန်းစောင့်လေန အောင်းမွန်းစောင့် တောင့်(ဝ်)ခေါင်(ဝ်)အိုပို့ဆီ ဝိုင်ရောင့်(ဝ်) စွုမ်းဟင်းဆီ ပေါက်မှိန်းဂျေရုဆလင်ကော်ဝိုက်။ 53 မနော်လေန ထီန်ပေါက်မှိန်းဂျေရုဆလင်ကော်လော့် ရာဝမ်း(ဝ်)ဗိမာန်တော်ဟောန့် ကူမေ့ အကြောင်းဂုဏ်တော်စောင့်ဖလားလေ ချီးမွမ်းဆီ အူဟင်းကော်ဝိုက်။ |
This translation of the TaiLaing Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.