Luke 23 - TaiLaing1 နောက်လောင်နော့် ကွန်းလေန စူးဟင်းဆီ အောင်းမွန်းစောင့် တော်စောင့်ခွန်ဟော်ငွန်းရောမပိလတ်ပွန့် ဟောင့်ကွာကော်ဝိုက်။ 2 "ကွန်းဟိုင့်လ အောင်းဧကရာဇ် ကာလေဟပေါမဟောင့်(ဝ်) မွန်းဆီးဆီ အောင်းစောင့်ကောင်(ဝ်)တောင်းကောင်(ဝ်)ကော့် ပေးစောင့်ခွန်ဟော်ခမ်း စောင့်ကယ်မေရှိယဆီ ဝါဆီ အောင်းကွန်းလေ ဟပေါထီန်ခွန်တန်းဖစ် အောင်းဟေန ဟောခေါက်(ပ်)မား"ဆီ ခနာ့ပိလတ် စွပ်စွဲအောင်းမွန်းစောင့်ဟင်းဝိုက်။ 3 ပိလတ်န အောင်းစောင့်ယေရှု "မောလ စောင့်ခွန်ဟော်ခမ်းဂျူးလေဝါလ စော်လေး"ဆီ ထန်(မ်)ကော်လော့် မွန်းစောင့်န "နောင်မောထန်လ စော်ကျဉ်းနော့်"ဆီ ဝါပေါက်ကော်ဝိုက်။ 4 ပိလတ်ကော့် လှည့်ပေါက်ပါ့ပုရောဟိတ်အောင်းရောင်(ဝ်)လေတောင်း တောင်းပါ့ဖွန်ကွန်းလေဆီ "ရာမွန်းအပြစ်မရောင်းဝါလ ကောဟောန်"ဆီ ဝါကော်ဝိုက်။ 5 တော်နယ်ကော့် မနော်တောင်းလုန်န "ကွန်းဟိုင့်လ ဆီမေဂါလိလဲစဆီ တော်မှိန်းယုဒတောင်းလုန် အောင်းကွန်းလေ တော်ပေါရှုပ်ဟင်း မွန်းစောင့်ဟေမားဆီ အစောင်ကော့် ထီန်မားရာဟိုက်ကော်"ဆီ ဝါအောင်တဲ့တဲ့ကော်ဝိုက်။ 6 အောင်းမနော်ဝါနောင်နယ့်လ ပိလတ်နယ့်ဟဉ်းကော်လော့် "ကွန်းဟိုင့်လ ကွန်းမှိန်းဂါလိလဲလေး"ဆီ ထန်(မ်)ကော်ဝိုက်။ 7 နောက်လောင်နော့် မွန်းစောင့်န အောင်းဟေရုဒ်အုပ်စိုး ပေးကွန်းဂါလိလဲဝါလ ဟုကော်လော့် မေအချီန်ဟောန့်န ဟေရုဒ်ကော့် ထီန်ရာမှိန်းဂျေရုဆလင်ညော့ အောင်းမွန်းစောင့် ဆုန်ကော်ရာဟေရုဒ်ကော်ဝိုက်။ 8 မွန်းန အကြောင်းစောင့်ယေရှု ဟုဝိုင့်ရောင့်(ဝ်)ကော်လော့် အောင်းမွန်းစောင့်ဟေ အောင်းခနီးအမ်းလေ မွန်းခဟောန်ဝိုက်။ စောင့်ခွန်ဟော်ငွန်းဟေရုဒ်န ခဟောန်အောင်းစောင့်ယေရှုလ ဟူမားကော်ညော့ နယ့်ဟောန်အောင်းစောင့်ယေရှုကော်လော့် အိုက်စွုမ်းကော်ဝိုက်။ မွန်းန အောင်းစောင့်ယေရှုဟေ အောင်းခနီးအမ်းတူနိမ် ဟပေါနယ့်ဟောန် ထဆီအူဝိုက်။ 9 စောင့်ခွန်ဟော်ငွန်းဟေရုဒ်လ အောင်းစောင့်ယေရှု မေးခွန်းလေကျေးလေမစော်ထန်(မ်)မေကော့် စောင့်ယေရှုလ အဟောင်းကော့် မဖြေပေါက်ဝိုက်။ 10 နောက်လောင်နော့် ဘာသာရေးခေါင်းဆောင်လေတောင်း မောရှေကျမ်းစမ်လေနာ့စိန်ဆီ အောင်းစောင့်ယေရှု အိုက်စွပ်စွဲဟင်းကော်ဝိုက်။ 11 ဟေရုဒ်တောင်း ရဲမက်မွန်းလေန အောင်းမွန်းစောင့် တော်ပေါနီးအိုင်း ဝါဟင်း၊ မားအောဝ်းမောဝ်းဟင်းကော်ဝိုက်။ မနော်လ အောင်းမွန်းစောင့် နောင်စောင့်ခွန်ဟော်ခမ်းညော့ ဆေဖာ့အောင်းခေါန်နောက် ဖွန်နိမ် နွန်ဟောင့်(ဝ်)ဆီ ဆုန်ပေါက်ကော်ရာစောင့်ခွန်ဟော်ငွန်းပိလတ်ကော်ဝိုက်။ 12 မေစောင့်လော့် ဟေရုဒ်တောင်းပိလတ်န မတဲတော်ဟင်းမေကော့် မေဝမ်းဟောန့်လ ပေးတကော့်ဟင်းပေါက်ကော်ဝိုက်။ 13 စောင့်ခွန်ဟော်ငွန်းပိလတ်န အောင်းဂျူးအမျိုးသားခေါင်းဆောင်လေ၊ အောင်းဟိုဘာသာရေးခေါင်းဆောင်လေတောင်း အောင်းကွန်းဖွန်လေ ဟစူးဆီ 14 "ကွန်းဟိုင့်လ အောင်းကွန်းမန့်လေ တော်ပေါခေါင်း ဟေညော့ မဆူဟောင့်ဟင်းမား ရာကော။ တော်နယ် ရာခန့ာမဆူ အောင်းမွန်း ကောစစ်ရောင့်(ဝ်)ကော်။ နောင်မဆူဝါဆီ အောင်းဟေအပြစ်ကိုးမနယ့်ဟောန်။ 15 ဟေရုဒ်ကော့် အောင်းမွန်း အပြစ်ခါမဟောန်ညော့ အပြစ်အဟောင်းကော့်မဟောင့်(ဝ်)ဆီ ဆုန်ပေါက်မားရာကောကော်။ ကွန်းဟိုင့်န အပြစ်တော်အောင်းသိုင်းပွန့် အောင်းဟေဝိုက်မရောင်း။ 16 ကောပ့်နယ့်ညော့ ကော အောင်းစမွန်း တောင်းခေါင့်ဝိုင်တောင်းတင်ဆီ တပွယ်ကော်"ဆီ ဝါကော်ဝိုက်။ 17 ပိလတ်တ ကောနယ့်ဝါနောင်နယ့်လ အချီန်ပွဲပဿခါလ အောင်းကွန်းအူခနောဝ်ထာင် ကော်နိမ်တနယ့်ပွယ်ဝါလ ထွုံးစံရောင်းညော့ဝိုက်။ 18 တော်နယ်ကော့် ကွန်းဖွန်လေနာ့ "အောင်းကွန်းဟိုင့် အောင်း(ဝ်)သိုင်းဆီ အောင်းဗာရဗ္ဗ ပွယ်ပေါက်ကော်"ဆီ ဟာနိမ်တောင်း ဝါဟင်းဝိုက်။ 19 အစောင် ဗာရဗ္ဗလ ခနောဝ်မှိန်း အောင်းအောင်း(ဝ်)သိုင်းကွန်းတောင်း အောင်းကွန်းလေတော်ပေါရှုပ် ပေးကွန်းဟေဝိုက်ညော့ ခနောဝ်ထောင်ဟောန့် နယ့်ခမ်ပြစ်ဒဏ်လေဝိုက်။ 20 ပိလတ်န အောင်းစောင့်ယေရှု ခပွယ်ညော့ အောင်းကွန်းဖွန်လေတောင်း အောင်းဟိုဘာသာရေးလေ နောက်လောင်ဟာနိမ်ဝါဟွန်းကော်ဝိုက်။ 21 တော်နယ် မနော်လေန "အောင်းစမွန်း တန်ခနေလက်ဝါးကပ်တိုင်ကော်ဆီ အောင်း(ဝ်)သိုင်းကော် "နဲဟော် ဆက်ဆီစေဟင်းကော်ဝိုက်။ 22 မေနယ့်လော့် ပိလတ်န "မွန်းန အပြစ်ဟောင်းလုန် ဟေဝိုက်။ အောင်းမွန်း အပြစ်အောင်းအောင်း(ဝ်)သိုင်းပွန့် တော်ပေါနဲ့ဟောင့်(ဝ်) အောင်းဟေဝိုက် ကောမဟောန်။ ကောပ်နယ့်ညော့ အောင်းမွန်း ဟောင့်(ဝ်)အပြစ်ဒဏ်ဆီ တပွယ်ကော်"ဆီ ဆမ်ဟာမြောက်ဝါကော်ဝိုက်။ 23 တော်နယ်ကော့် ကွန်းဖွန်လေကော့် အောင်းစောင့်ယေရှု အောင်းခပာအောင်း(ဝ်)သိုင်းနဲဟော် ကြမ်းကြမ်းစေဟင်းကော်ဝိုက်။ 24 နောက်ဆုံးနော့် နောင်ကွန်းလေဝါညော့ ကွန်းအောင်းတပေးစောင့်ခွန်ဟော်ခမ်းပိလတ်ကော့် နယ့်ဟေစောင်း(မ်)ကော်ဆီ 25 မွန်းနာ့ အောင်းကွန်းဖွန်းလေခဟပွယ် အောင်းကွန်းအပြစ်ရောင်း အောင်းစဗာရဗ္ဗ ပွယ်ပေါက်ကော်ဝိုက်။ ဗာရဗ္ဗန ပေးကွန်းဟေအပြစ်ဝိုက်ဆီ ကောပ့်ပုန်ကန်အောင်းမှိန်းတောင်း ကောပ့်အောင်း(ဝ်)သိုင်းကွန်းညော့ ချားထောင်ဝိုက်ဝိုက်။ နောက်လောင်နော့် ပိလတ်ကော့် အောင်းမွန်းစောင့် နောင်ဖွန်ကွန်းလေခဟပေးညော့ ဟပေါနယ့်ဟေ တာဝန်အပ်ဟောင့်(ဝ်) အောင်းမနော်ကော်ဝိုက်။ 26 စစ်သားလေန တကြားမနော်ဟောင့်ကော်အောင်းမွန်းစောင့်လော့် အောင်းကွာမှိန်းဂျေရုဆလင် ဆီမေစယ်ကုရေနေဟောန့် အောင်းရှိမုန်ပေါက်မား ဟောန်ကော်လော့် အောင်းစမွန်းဝမ့်ဆီ ခလောင်စောင့်ယေရှု အောင်းလက်ဝါးကပ်တိုင် ဟပ်ဆီဟစောင်း(မ်)ကော်ဝိုက်။ 27 ကွန်းတောင်းလုန်တောင်း ကောပ့်အောင်းစမွန်းစောင့်တောင်း ကော့်ယဉ်းအောင်းဟိုင်နာ့စောင်း(ဝ်)ဆီဟိုင့်လေကော့် ခလောင်မွန်းစောင့် စောင်း(မ်)ဟင်းကော်ဝိုက်။ 28 စောင့်ယေရှုလ လှည့်ပေါက်ပါ့မနော်ဆီ "ကော့်ယဉ်းဂျေရုဆလင်လေ၊ အတွုက်ကော ပီဟိုင့်ဟင်း။ အောင်းမဆူတောင်း အောင်းလအောင်မဆူနဲဟော် ဟိုင့်ဟော။ 29 "ကော့်ယဉ်းအောင်းမောန်လေ၊ ကော့်ယဉ်းအောင်းတောင့်မရောင်(ဝ်)ကော်တောင်း ကော့်ယဉ်းအောင်းစော်မအွယ်ကောင်(ဝ်)န ကမ်နီး"ဆီ ဝမ်းကွန်းလေဝါ တထီန်မား။ 30 မေနယ့်လော့် ကွန်းလေန "အောင်းနွဲလေ ခနေမနော်ပြိုမားနူ၊ အောင်းနွဲလေ အောင်းဟော လပ်ဝိုက်နူ"ဆီ တဝါဟင်းဝိုက်။ 31 နောင်တိန့်မိုက်ချိုလေဆီ အောင်းအပြစ်မရောင်း ကောကိုးသကော့် နောင်နယ့်ဆီအောင်းဆိုးပေါပေးန နောင်တိန့်မိုက်ဟိုင့်လေဆီ အပြစ်ဟောင်ပေါရောင်း မဆူလေန တပေးနောင်နူး"ဆီ ဝါကော်ဝိုက်။ 32 အောင်းကွန်းဟေအပြစ်ဝိုက်အောင်းတန်းတီဆောင်(န်)ကော့်ကော့် တောင်းစောင့်ယေရှုတောင်း တအောင်း(ဝ်)သိုင်းနွေ့ဟင်းဆီ ဟောင့်မားနွေ့ဟင်းကော်ဝိုက်။ 33 ရာနွဲနာမယ်ခလောက်ဟိုဟောန့် ထီန်ကော်လော့် အောင်းစောင့်ယေရှုန ကပ်စပ်ရာလက်ဝါးကပ်တိုင်ဆီ တောင်းလေမိုင်နားတောင်း တင်ဝိုက်ကော်ဝိုက်။ တောင်းပါ့ဟဉ်း(မ်)စောင့်ယေရှု အောင်းစစောင့်ကွန်းအပြစ်ရောင်းဆောင်(န်)ကော့် ပါ့ကန့်ခွာကော်နိမ်၊ ပါကမ့်ဆိုင့်ကော်နိမ် ကပ်စပ်ရာလက်ဝါးကပ်တိုင်ဆီ တောင်းလေမိုင်နားတောင်း တင်ဝိုက်ကော်ဝိုက်။ 34 မေနယ့်လော့် မွန်းစောင့်န "စောင့်ဖလားလ၊ ကွန်းဟိုင့်လေန အောင်းမနော်ဟေ မနော်မဟုညော့ အောင်းမနော် ခွင့်လွတ်ဟောင့်(ဝ်)အွန်ခ"ဆီ ရောန်းဆုကော်ဝိုက်။ စစ်သားအောင်းပေါင့်(ဝ်)လေကော့် အောင်းဆေလုန်စောင့်ယေရှု လောင်းဟင်းဆီ မိုင်ဟင်းဆီ အောင်း(ဝ်)ဟင်းကော်ဝိုက်။ 35 မေကွန်းလေစိန်ဆီတွဲညော့ ဂျူးခေါင်းဆောင်လေကော့် "ကွန်းဟိုင့်န အောင်းပွန်လေကယ်ဆီ မွန်းန ပေါပေးအောင်းစောင့်ဖလားလိတ်ဝိုက် စောင့်ကယ်မေရှိယပေါလော့် အောင်းမွန်းတောင်းမွန်းတကယ် "ဆီ ဝါဟင်းကော်ဝိုက်။ 36 ရဲမက်လေန အောင်းမွန်းစောင့် အောင်း(ဝ်)မောဝ်ဟင်းဆီ တူဝိုင်ဆို့မ်ဟင်းကော်ဝိုက်။ 37 "မောလ စောင့်ခွန်ဟော်ခမ်းဂျူးဟောင်ပေါစော် အောင်းမောတောင်းမော ကယ်ကော်"ဆီ ဝါဟင်းကော်ဝိုက်။ 38 စောင့်ခွန်ဟော်ခမ်းဂျူးဆီ ဆိုင်းဘုတ်အောင်းတင့်(မ်)ဝိုက်လ ချိဝိုက်ရာခနေဟို ရာပိုင်းလက်ဝါးကပ်တိုင်ကော်ဝိုက်။ 39 ကွန်းအပြစ်ရောင်း အောင်းခန့်စောင့်ယေရှုကော်နိမ်လ "မောလ စောင့်ကယ်မေရှိယပေါလော့် အောင်းစောင့်ကော်တောင်းကော် ကယ်ကော်နူ။ အောင်းဟောပါ ကယ်နူ"ဆီ ဝါကော်ဝိုက်။ 40 နောက်လောင် ကွန်းအပြစ်ရောင်းကော့်နိမ်န အောင်းစမွန်း "မော နောင်ကွန်းဟိုင့်ဆီ ပေါနယ့်ခမ် အပြစ်နောင်နယ့်လ အောင်းစောင့်ဖလား မကိုးဆီလေး"ဆီ ထန်(မ်)ကော်ဝိုက်။ 41 "ဟောဆောင်(န်)ကော့်န ဟေအပြစ်မားညော့ နယ်ခမ်အပြစ်န ထိုက်တန်။ တော်နယ် မွန်းစောင့်လ အပြစ်အဟောင်းကော့်မဟေဆီ နယ့်ခမ်အပြစ်"ဆီ အောင်းလကော့်မွန်း ဝါပေါက်ကော်ဝိုက်။ 42 နောက်လောင် မွန်းန ဆက်ဆီ "စောင့်ယရှု၊ မော အချီန်ပေးစောင့်ခွန်ဟော်ခမ်းဆီ ဟောင်ပေါနယ့်အုပ်စိုးလော့် အောင်းကော တနယ့်ကယ်အွန်ဝါလ ပီလဉ်း(မ်)အွန်"ဆီ ဝါကော်ဝိုက်။ 43 စောင့်ယေရှုလ "အောင်းစမော ကောတနယ့်ဝါအောင်းစော်ပေါလော့်၊ ဝမ်းနယ့် တောင်းကောတောင်း ဘုံပရဒိသု မောတထီန်"ဆီ ဝါကော်ဝိုက်။ 44 ဆီမေအချီန်ကမ်းဝမ်းဆစ်(ပ်)ဆောင်(န်)မောင်းန တော်ဝမ်းစိုင့်ဆမ်မောင်းပွန့် တောင့်ဖတောင်းလုန် နမ်းမိမိဆီ ပေးမားကော်ဝိုက်။ 45 တောင့်ဖကော့် ချိဖထပ်ဝိုက်ကော်ညော့ ဖမနဲက်ကော့်ဝိုက်။ မောန့်ကောင့်ဖာအောင်းရာဗိမာန်တော်ကော့် ဆောင်(န်)ပဉ်စိုက်ကော်ဝိုက်။ 46 မေနယ့်လော့် "ခနောဝ်မေးစောင့်ဖလား အောင်းခေါင်ကော အပ်ကောခ"ဆီ ဆိန်စောင့်ယေရှုလ ကြမ်းကြမ်းပွန့်နော့် အောက်မားကော်ဝိုက်။ ဆိန့်ဟိုင့်လေ ချရှ်ချန်း ရပ်ကော်လော့် မွန်းစောင့်ယေရှုကော့် အဆတ်အောက်ကော်ဝိုက်။ 47 ဖုကောန်းဆစ်ရောမလ အောင်းပေးမားဟိုင့်လေ ဟောန်ကော်ညော့ အောင်းဂုဏ်တော်စောင့်ဖလား ချီးမွမ်းကော်ဝိုက်။ စောင့်ယေရှုလ "ကွန်းဟိုင့်လ သူတော်ကောင်းကျဉ်းနော့်"ဆီ ဝါကော်ဝိုက်။ 48 ကွန်းဖွန်းလေကော့် ဟပေါနယ့်ဟောန် အောင်းတန်ခနေလက်ဝါးကပ်တိုင်န ဟပေါနယ့်တွဲ မားစူးဟင်းကော်ဝိုက်။ နောက်လောင်နော့် မနော်လေန နယ့်ဟောန်အောင်းစောင့်ယေရှုပေးနောင်နယ့်ကော်လော့် နာ့စောင်း(ဝ်)နောင်တတိုက်ကော် နယ့်ခံစားဆီ ပေါက်ဟုန်းဖော်ဟုန်းမွန်းကော်ဝိုက်။ 49 တကော့်စောင့်ယေရှုတောင်းလုန်တောင်း ပီနောင့်မွန်းလေ၊ ဆီမေဂါလိလဲအောင်းစောင်း(မ်)မား ကော့်ယဉ်းလေန ဆီမေအောင်းကိုင်းတီနိမ်ဟောန့် စိန်ဆီတွဲဟင်းကော်ဝိုက်။ 50 မေနယ့်လော့် မှိန်းယုဒ ဆီမေအရိမဿဲ ယောသပ်လ ပေးကွန်းနီး၊ ကွန်းငမ်းဆီ ရာမွတ်ဘာသာရေးဂျူးဟောန့် မွန်းပါဝိုက်။ 51 မွန်းန အောင်းဂျူးခေါင်းဆောင်ဟေလေ သဘောမတူဝိုက်။ ပေါရောင့်(ဝ်) ရာကမ္ဘာဟိုင့် သာသနာဖလားဟပေါထီန်မား ကွန်းလိုကော့်စော်ဝိုက်။ မေဟအောင်း(ဝ်)သိုင်းအောင်းစောင့်ယေရှုကော့် သဘောမတူမားဝိုက်။ 52 ယောသပ်လ အောင်းအလောင်းစောင့်ယေရှု ဟပေါနယ့်ဖောင် ရာပိလတ်ဟောန့် ကွာရောန်းခွင့်ကော်ဝိုက်။ ပိလတ်ကော့် ခွင့်ဟောင့်(ဝ်)ကော်ဝိုက်။ 53 ကောပ်နယ့်ညော့ မွန်းန အောင်းအလောင်းစောင့်ယေရှုလ ဆီမေလက်ဝါးကပ်တိုင် ချားတိုခတောင့်(ဝ်)ဆီ ဖအောင်းနီးလေတောင်း စာကော်ဝိုက်။ နောက်လောင်နော့် အောင်းကောင့်ဟဉ်လုန်ဟွေနိမ်လ အောင်းဖောက်ဝိုက် အောင်းဖောကော့် အောင်းမနယ့်ဝိုက်အွန် ရာခနောဝ်ဂူအောင်းမော်ညော့ အောင်းကွန်းသိုင်းဟိုင့် ဆောင်(ဝ်)ခေါင့်(ဝ်)ကော်ဝိုက်။ 54 ဝမ်းဟောန့်လ ပေးဝမ်းသောကြာဆီ တောင်းဝမ်းဥပုတောင်းကော့် ကောင့်(ဝ်)ဟင်းဝိုက်။ 55 ဆီမေဂါလိလဲန တောင်းစောင့်ယေရှုတောင်း ကော့်ယဉ်းအောင်းစောင်း(မ်)မားနွေ့ဟင်းလေန စောင်း(မ်)ဆီတွဲညော့ အောင်းဆောင်(ဝ်)ခနောဝ်ဂူအောင်းစောင့်ယေရှုရယ်၊ အောင်းကွန်းသိုင်းဟိုင့် ဝိုက်နောင်နူးဝါလ နယ့်ဟောန်ကော်ဝိုက်။ 56 နယ့်ရောင့်(ဝ်) မနော်လေန ပေါက်ဟုန်းဟင်းဆီ အောင်းစောင့်ယေရှု စပူဇော် နမ့်မောန်းဟောမ်တောင်း အမွှေးတိုင်လေတောင်း မဲရောင့်(ဝ်)ကော်ဝိုက်။ တော်နယ် မနော်လေန နောင်မောရှေပြားမားပညတ်ကျမ်းညော့ ဝမ်းဥပုပေါလော့် ဆောင်း(ဝ်)ဟင်းဝိုက်။ |
This translation of the TaiLaing Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.