Luke 22 - TaiLaing1 နောက်လောင်နော့် ပသခါပွဲဆီအောင်းစေ အချီန်ပွဲခေါင့်(ဝ်)မွန်းတဆေးမပါ ကောင့်(ဝ်)မားကော်ဝိုက်။ 2 ပုရောဟိတ်အောင်းရောင်(ဝ်)လေတောင်း ဆရာကျမ်းစမ်လေန အောင်းကွန်းဖွန်လေ နီးကိုးညော့ အောင်းစောင့်ယေရှု တနယ့်ဟေနောင်နူးဝါလ ခါအကြောင်းအဟောင်းဆီ တနယ့်အောင်း(ဝ်)သိုင်းဝါလ ခါတန်းဟင်းဝိုက်။ 3 နောက်လောင်နော့် ရာခနောဝ်တပဲ့ ဆစ်(ပ်)ဆောင်(န်)ကော့်ဟိုင့်န ရာခနောဝ်စောင်း(ဝ်)ယုဒရှကာရုတ် မာရ်နတ်ပူးကော်ဝိုက်။ 4 ယုဒရှကာရုတ်လ ပုရောဟိတ်အောင်းရောင်(ဝ်)လေတောင်း အောင်းကွန်းအရာရှိဗိမာန်တော်ဟောန့် ကောင့်(ဝ်)စူးဆီ အောင်းစောင့်ယေရှု ခနောဝ်မေးမနော် တနယ့်အပ်နောင်နူးဝါလ တောင်းမနော်တောင်း တိုင်ပန်ဟင်းကော်ဝိုက်။ 5 ပုရောဟိတ်လေတောင်း ဆရာကျမ်းစမ်လေန စွုမ်းဆီ အောင်းယုဒ ငွန်းလေ တဟောင့်(ဝ်)ဆီ သဘောတူဟင်းကော်ဝိုက်။ 6 ယုဒကော့် သဘောတူကော်ဝိုက်။ မွန်းနာ့ မေကွန်းဖွန်လေမရောင်း စဝမ့်အောင်းဆရာမွန်း ထာ့အချီန်နီးကော်ဝိုက်။ 7 နောက်လောင်နော့် အောင်းပယ်ရာ့ အောင်း(ဝ်)သိုင်းဆီ အချီန်ဟေပွဲပသခါ ထီန်မားကော်ဝိုက်။ 8 ကောပ့်နယ့်ညော့ စောင့်ယေရှုလ အောင်းပေတရုတောင်းအောင်းယောဟန် "ပသခါပွဲစနယ့်ကျဉ်းနွေ့ဟင်းဆီ ကွာမဲဟင်း"ဆီ စောင့်(ဝ်)ကော်ဝိုက်။ 9 တော်နယ် မနော်လေန "ရာနေရာထော တဟာ့မဲလ"ဆီ ထန်(မ်)ကော်ဝိုက်။ 10 စောင့်ယေရှုလ အောင်းစမနော် "ခေါင့်(ဝ်)ကော်ခနောဝ်မှိန်း၊ ခနောဝ်မှိန်းလ အောင်းကွန်းကော်နိမ် ဟပ်မော့်နမ့်မားလ မဆူတဟောန်။ ခလောင်ကွန်းဟောန့် စောင်း(မ်)ဆီ ဟုန်းအောင်းမွန်းခေါင့်(ဝ်)လ ခေါင့်(ဝ်)စောင်း(မ်)ကော်။" 11 နယ့်ရောင့်(ဝ်) အောင်းစောင့်ဟုန်းမနော် "ဆရာဟောလ တောင်းတပဲ့မွန်းလေတောင်း စဟေပသခါပွဲ တနယ့်မဲရာထောဆီ ဟထန်(မ်)မားအောင်းစမော"ဆီ ဝါဟင်းကော်။ 12 "စောင့်ဟုန်းလ အောင်းစမဆူ ဟောင့်ခွန်ခနေဟုန်းဆီ ဟောင့်ခြိုက်အောင်းကွမ့်ဟောင့်နိမ် တပြားဟောင့်(ဝ်)ကော်ကျဉ်း။ ရာအခန်းဟိုင့်လ မဲဟင်းကော်"ဆီ ဆောင်ကော်ဝိုက်။ 13 နောက်လောင်နော့် ပေတရုတောင်းယောဟန်လ နောင်မွန်းစောင့်ဝါမားညော့ ဟောန်ကော်လော့် အောင်းပသခါပွဲလ နီးနီးငမ်းငမ်းအင် မဲဟင်းကော်ဝိုက်။ 14 မေပွဲပသခါ ထီန်မားကော်လော့် စောင့်ယေရှုလ တောင်းတပဲ့မွန်းလေတောင်း ရာစားပွဲ နှောင်ဟင်းကော်ဝိုက်။ 15 နောက်လောင်နော့် မွန်းစောင့်န အောင်းစမနော် "မေကောမသိုင်းခွေတ် ရာပွဲဟိုင့် တောင်းမဆူတောင်း ခကျဉ်းနွေ့၊ ခဆို့နွေ့ဟင်းအွန်" 16 အောင်းမဆူ ကောခဝါလ၊ စောင့်ဖလားန ဆီမေပသခါပွဲစဆီ တော်အချီန်အောင်းဆွတ်ပွန့် နေရာတိုင်း၊ အောင်းကွန်းတောင်းလုန် အချီန်တအုပ်စိုး မထီန်ခွေတ် နောက်လောင် အောင်းပသခါပွဲ တကျဉ်းကော့်မစော်"ဆီ ဝါကော်ဝိုက်။ 17 နောက်လောင်နော့် မွန်းစောင့်လ တောင်းမေးပါ့နိမ်တောင်း အောင်းကလောက်စပျစ်ဝိုင်ကမ်းဆီ အောင်းဂုဏ်တော် ချီးမွမ်းကော်ဝိုက်။ နယ့်ရောင့်(ဝ်) အောင်းတပဲ့မွန်းလေ ကလောက်နိမ်ဟောင့်(ဝ်)ဆီ "ကလောက်ဝိုင်ဟိုင့်လေ အောင်း(ဝ်)ဆီ အချန်းချန်း မိုင်ဟင်းဆီ ဆို့ဟင်းကော်။ 18 အောင်းမဆူကောခဝါလ၊ ကောလ တော်သာသနာစောင့်ဖလား မပေါ်ပွန့် အောင်းစပျစ်ဝိုင်ဟိုင့် မေနော်ကော့် မဆို့နော့်"ဆီ ကတိဟောင့်(ဝ်)ဝိုက်ကော်ဝိုက်။ 19 နယ့်ရောင့်(ဝ်) မွန်းစောင့်လ အောင်းခေါင့်(ဝ်)မွန်းအောင်း(ဝ်)ဆီ အောင်းဂုဏ်တော်စောင့်ဖလား ချီးမွမ်းရောင့်(ဝ်) အောင်းတပဲ့မွန်းလေ ဟောင့်(ဝ်)ကော်ဝိုက်။ "ခေါင့်(ဝ်)မွန်းဟိုင့်လ အောင်းဟောင့်(ဝ်)စမဆူလ ပေးတိုးကောဝိုက်။ အောင်းကော တော်ပေါမလဉ်း(မ်) အောင်းခေါင့်(ဝ်)မွန်းဟိုင့်ကျဉ်းကော်"ဆီ ဝါကော်ဝိုက်။ 20 နောင်နယ့်ဆီ ကျဉ်းရောင့်(ဝ်)လော့် စောင့်ယေရှုလ အောင်းကလောက်ဝိုင်လုန်ကမ်းဆီ "နမ့်စပျစ်ဝိုင်ဟိုင့်လ ပေးလေ့ကော။ လေ့ဟိုင့်လ အောင်းစမဆူ ကောဟောင့်(ဝ်)။ လေ့ဟိုင့်လ ပေးကတိစောင့်ဖလားအောင်းမောဝ်ဝိုက်။ 21 တော်နယ်ကော့် ကွန်းသစ္စာတဖေါက်အောင်းကောကော့် တောင်းကောတောင်း ရာစပွဲဟိုင့် ကျဉ်းနွေ့ဟင်းဝိုက်။ 22 လူ့သားတော်န နောင်အလိုစောင့်ဖလားတပေးမေကော့် အောင်း"လူ့သားတော်" အောင်းစကွန်းသစ္စာဖောက်လေန အိုက်ဆိုး"ဆီ ဝါကော်ဝိုက်။ 23 နောက်လောင်နော့် တပဲ့လေကော့် "ရာဟော အောင်းအမျိုးနောင်နယ့်လ ဖောတဟေကျေ"ဆီ အချန်းချန်း ထန်(မ်)တော်ဟင်းကော်ဝိုက်။ 24 နောက်လောင်နော့် တပဲ့လေကော့် ခနောဝ်မနော် ဖောလ ပေးကွန်းအောင်းချဉ်းမြတ်ဝါလ အချန်းချန်း ထိန်တော်ဟင်းဝိုက်။ 25 ကောပ့်နယ့်ညော့ စောင့်ယေရှုလ စောင့်ခွန်ဟော်ခမ်းမှိန်းတန်းတီလေန အောင်းကွန်းမန့်ကွန်းမှိန်းလေ အမိန့်တောင်းအုပ်ချုပ်ဝိုက်။ အာဏာရှင်လေကော့် အောင်းမနော်တောင်းမနော် ကွန်းဟေဟောင့်(ဝ်)အကျိုးပွန်ဆီ ဟစေဆီ အောင်းစမနော် ခေါင်းဆောင်အောင်းနီးလေဆီ ခဟစေဝိုက်။ 26 တော်နယ်ကော့် "မဆူလေ နောင်နယ့်ပီဟေဟင်း၊ ရာခနောဝ်မဆူ အောင်းကွန်းအရေးပါလ ကွန်းချဉ်းဆေးတနယ့်ပေးဆီ ခေါင်းဆောင်ကော့် နောင်ခပွန်ညော့ နှိမ်ဆီတနယ့်အူဝိုက်။ 27 ကွန်းနောင်ရာပန့်ခေါင့်(ဝ်)တောင်း ကွန်းမဲဟောင့်(ဝ်)ပန့်ခေါင့်(ဝ်)န ဖောချဉ်းမြတ်။ ကွန်းနောင် ရာပန့်ခေါင့်(ဝ်)လေး နယ့်ပေါမစော် ကွန်းမဲဟောင့်(ဝ်)ပန့်ခေါင့်(ဝ်)လေး။ ကောလ နောင်ခကော့်နိမ်ညော့ အောင်းစမဆူ နောင်ကွန်းမဲဟောင့်(ဝ်) ပန့်ခေါင့်(ဝ်)ညော့။ 28 မဆူလေန အောင်းကော မေနောကော့် မဝေမား။ အောင်းစုံစမ်းအောင်းနှောက်ယှက်လေ ဟောင်ပေါနယ့်ကြုံကော့် မဆူလေန တောင်းကောတောင်း အူနွေ့ဟင်းမား။ 29 ပေါ်ကောလ အောင်းသာသနာမွန်း နောင်ဟောင့်(ဝ်)မားအောင်းကောညော့ သာသနာတော်ကောကော့် အောင်းမဆူ ကောဟောင့်(ဝ်)ဝိုက်ကော်။ 30 ကောပ့်နယ့်ညော့ မဆူလေန ရာသာသနာတော်စားပွဲဟောန့် နှောင်ဆီ တနယ့်ကျဉ်းဟင်း။ ပေါရောင့်(ဝ်) မဆူလေန နှောင်ခနေပလန်ဆီ အောင်းကွန်းအစ္စရေးဆစ်(ပ်)ဆောင်(န်)မျိုး တနယ့်အုပ်ချုပ်ဟင်း။ 31 နောင်လောင်နော့် စောင့်ယေရှုလ အောင်းရှိမုန်ပေတရု "ရှိမုန် အောင်းကောဝါလထောင်(မ်)။ ကွန်းဟေနားလ အောင်းမက်ခေါင့်(ဝ်)တောင်းအောင်းပေမွန်း နောင်ခွဲဝေကော်ညော့ မာရ်နတ်ကော့် အောင်းမဆူ ရီကော့်စီ ဟပေါနယ့်စမ်း ရောန်းအခွင့်တုန်းကော့်။ 32 ရှိမုန်၊ အောင်းမောယွန်(မ်)လေ ဟပေါမနယ့်ဆွုမ်း အောင်းစမော ကောတရောန်းဆုဟောင့်(ဝ်)။ ရာကော မောဟောင်ပေါပေါက်မား အောင်းပေးနောင့်စိုင်းမော အောင်းစမနော်လေကော့် အောင်းယွန်(မ်)လေဟပေါနမ် ဟေကော်"ဆီ ဝါကော်ဝိုက်။ 33 မေနယ့်လော့် ပေတရုကော့် "တောင်းစောင့်ယေရှုတောင်းပေါလော့် ခနောဝ်ထောင်ကော့်ခရောင့်(ဝ်)၊ သကွာမန့်အောင်းသိုင်းကော့်ခရောင့်(ဝ်) ဟပေါနယ့်စောင်း(မ်) အဆင့်သင့်ကော့်"ဆီ အောင်းစောင့်ယေရှု ဝါပေါက်ကော်ဝိုက်။ 34 မေနယ့်လော့် မွန်းစောင့်န "ပေတရု၊ အောင်းမော ကောတဝါ။ မောလ ဝမ်းနယ့်ကန်းနော် ကိုင်မခေါန်ခွေတ်လ အောင်းကော မဟုဆီ ဆမ်ဟာတော်ပေါထိန့်နော့် တနယ့်ဝါ"ဆီ ဝါကော်ဝိုက်။ 35 နောက်လောင်နော့် စောင့်ယေရှုန အောင်းတပဲ့မွန်းလေ "ကောလ အောင်းမဆူ အိငွန်း၊ အိကွာခရီးတောင်း ချက်(မ်)တဉ်းလေကိုးသကော့် မဟာ့အောင်း(ဝ်)ဆီ မေပွယ်ကော်လ မဆူတူးနိမ်မတူးနိမ် အောင်းယပ်ရောင်းမားကောင်(ဝ်)လေး"ဆီ စောင့်ယေရှုလ ထန်(မ်)ကော်ဝိုက်။ တပဲ့လေကော့် "မရောင်းမား"ဆီ ဖြေပေါက်ဟင်းကော်ဝိုက်။ 36 တော်နယ် အစောင် အိငွန်းဟောင်ပေါရောင်း အောင်း(ဝ်)ကော်။ ထုန်(ဝ်)ကော့်အောင်း(ဝ်)ဟင်းမား။ ရာမဆူ ဖပေါမရောင်း ဆေဖမဆူလေခိုင်ဆီ ဆေဖကော်။ 37 ကောခဝါအောင်းမဆူလ၊ မွန်းန ရာဇဝတ်သားဆီ အောင်းသတ်မှတ်တနယ့်ခမ်"ဆီ ခနောဝ်ကျမ်းန အောင်းအကြောင်းကော နောင်ပြားဝိုက်ညော့ တတေး(မ်)မား"ဆီ ဝါကော်ဝိုက်။ 38 မေနယ့်လော့် တပဲ့လေန "စောင့်၊ တွဲနူ။ ရာဟော ဖဆောင်(န်)လန်ရောင်း"ဆီ တပဲ့လေန ဝါပေါက်ကော်လော့် စောင့်ယေရှုကော့် "ပေါပဲ့ကော့်"ဆီ ဝါကော်ဝိုက်။ 39 နောက်လောင်နော့် မွန်းစောင့်ကော့် နောင်မွန်းဟေကောင်(ဝ်)ကောင်(ဝ်)အတိုင်း တော်ခနေနွဲသံလွင်ဟောန့်ပွန့် ကြွကွာကော်ဝိုက်။ တပဲ့မွန်းစောင့်ကော့် ခလောင်မွန်းစောင့် စောင်း(မ်)ကွာဟင်းကော်ဝိုက်။ 40 ထီန်ရာဟောန့်ကော်လော့် စောင့်ယေရှုလ အောင်းတပဲ့မွန်းလေ "အောင်းလိဉ်ဟပေါမနယ့်ခမ် ရာစောင့်ဖလား ရောန်းဆုဆီအူဟင်း"ဆီ ဆောင်ဝိုက်ကော်ဝိုက်။ 41 တောင်းနေရာတပဲ့လေရောန်းဆုတောင်း နေရာစောင်အင်ကိုင်း ထီန်ကော်လော့် တောင့်(ဝ်)ခေါင်(ဝ်)ဆီ 42 "ပေါ အလိုပေါရောင်းအောင်းကော ကော မဟူခွေတ် တောင်းဒုက္ခတောင်း တနယ့်ခမ် ဆီမေဟောန့် အောင်းကောကယ်ဟောင့်(ဝ်)အွန်။ တော်နယ့် နောင်အလိုကောဆီ ပီဟပေး။ နောင်စောင့်ဖလားလိုညော့ ဟပေးစောင့်"ဆီ ရောန်းဆုကော်ဝိုက်။ 43 မေနယ့်လော့် ဆီမေ နေရာနိဗ္ဗာန်န ဖီပါးနိမ် ထီန်မားဆီ အောင်းစောင့်ယေရှု မားစွယ်ဟောင့်(ဝ်)ကော်ဝိုက်။ 44 စောင့်ယေရှုကော့် ဝေဒနာလုန် နယ့်ခံစားဆီ နောဝ်းစောင်း(ဝ်)နောဝ်းခေါပါ ရောန်းဆုကော်ဝိုက်။ ကောပ့်နယ့်ညော့ ဆီမေမွန်းစောင့် အောင်းတိုမား ဟေလေန နောင်လေ့ညော့ ချားတိုခနေနောင်နဉ်းကော်ဝိုက်။ 45 မွန်းစောင့်လ နောင်နယ့်ဆီ ရောန်းဆုရောင့်(ဝ်) ကြွကော်ရာတပဲ့မွန်းကော်ဝိုက်။ တပဲ့မွန်းစောင့်လေကော့် မွယ်ဟင်းကော်ညော့ နွမ်းနောက်ဟင်းကော်ဝါလ ဟောန်ကော်လော့် 46 မွန်းစောင့်လ အောင်းတပဲ့လေ "ဟေဟောင်းဆီ နွမ်းနောက်ဟင်းကော်လ လုဟင်း မဆူအောင်းစမ်းဟပေါမနယ့်ခမ် ရောန်းဆုဟင်း"ဆီ ဆောင်မော်ဟွန်းကော်ဝိုက်။ 47 စောင့်ယေရှု မေဟောတလားညော့ ကွန်းဖွန်လေ မားစူးရာမွန်းစောင့်ကော်ဝိုက်။ အောင်းကွန်းဖွန်ဟောန့်လေန ခနောဝ်တပဲ့စောင့်ယေရှုဆစ်(ပ်)ဆောင်(န်)ကော့်န အောင်းပေးယုဒလ ဟောင့်မားဝိုက်။ မွန်းန အောင်းစောင့်ယေရှု ဟပေါနယ့်နွုမ်း ကွာစူးကော်ဝိုက်။ 48 မွန်းစောင့်န အောင်းမွန်း "မောန အောင်းလူ့သားတော် တောင်းအောင်းနွုမ်းတောင်း အပ်ခနောဝ်ကွန်းမနီးလေကော်လေး"ဆီ ထန်(မ်)ကော်ဝိုက်။ 49 တပဲ့စောင့်ယေရှုကော်နိမ်လ ဟောန်အောင်းထိုင့်ကော်လော့် "စောင့်၊ ဟော အောင်းစမနော် တောင်းဖလေတောင်း တနယ့်မောက်ပေါက်ကော်လေး"ဆီ ထန်(မ်)ကော်ဝိုက်။ 50 နောက်လောင်နော့် တပဲ့ကော်နိမ်လ အောင်းတပဲ့ဟိုဂျူးဘာသာရေးကော်နိမ် တောင်းဖတောင်း မောက်ကော်လော့် စပ်ပဉ်ဟူပါ့ကန့်ခွာကော်ဆီ ပဉ်ဟူခတ်ကော်ဝိုက်။ 51 မွန်းစောင့်ကော့် "ပေါ့ ပီဟေ"ဆီ ဝါရောင့်(ဝ်) အောင်းပဉ်ဟူခတ်ဟောန့် ကမ်းဆီ ကပ်ပေါက်ကော်ဝိုက်။ 52 နောက်လောင်နော့် စောင့်ယေရှုလ အောင်းကွန်းမားဝမ့်လေ အောင်းဘာသာရေးဂိုဏ်းချုပ်လေ၊ စောင့်ပေါက်(ဝ်)ဗိမာန်တော်လေတောင်း ဟိုဂျူးလေ(လူမျိုးရေးခေါင်းဆောင်တွေ) "ဟေဟောင်းဆီ အောင်းကော နောင်ကွန်းမနီးဆီ တောင်းဖ၊ တောင်းမိုက်တောင်း နယ့်မားဝမ့်လ" 53 ကူဝမ်းကူဝမ်း မေကောရောင်းရာခနောဝ်ဝမ်းဗိမာန်တော်ဟောန့်လ မဆူလေ ဟေဟောင်းမဝမ့်လ။ တော်နယ် အချီန်ဟိုင့်န ပေးအချီန်မဆူညော့ မာရ်နတ်ကော့် ပေးအချီန်အောင်းမွန်းတနယ့်ဟေအောင်းမနီး"ဆီ ဝါကော်ဝိုက်။ 54 နောက်လောင်နော့် မနော်လေန အောင်းစစောင့်ယေရှု ဝမ့်ဆီ ရာဟုန်းပုရောဟိတ်အောင်းချဉ်းရောင့်(ဝ်)ဟောန့် ဟောင့်ကွာကော်ဝိုက်။ ပေတရုလ ဆီမေခလောင် ဟမ့်ကိုင်းကိုင်းအင် လောက်တေဆီ စောင်း(မ်)ကော်ဝိုက်။ 55 ခနောဝ်ဝမ်းဟုန်းန ခနောဝ်ကွန်းမောင်းဖောင်လေ အောင်(မ်)ဖိုင်းလ ပေတရုပါ ခေါင့်(ဝ်)ဆီ နှောင်ကော်ဝိုက်။ 56 နောက်လောင်နော့် အောင်းပေတရု ခကော့်ယဉ်းကော်နိမ်လ တွဲနီးနီးငမ်းငမ်းဆီ "ကွန်းဟိုင့်လ တောင်းစောင့်ယေရှုတောင်း အောင်းအူနွေ့ဟင်းဆဲ"ဆီ ဝါကော်ဝိုက်။ 57 မေနယ့်လော့် ပေတရုလ "ကော့်ယဉ်းဟိုင့်ဝါလ ကောမဟုစောက်"ဆီ ဝါပေါက်ကော်ဝိုက်။ 58 အချီန်စောင်နိန်ဟူမားကော်လော့် ကွန်းကော်နိမ်လ အောင်းပေတရု ဟောန်ကော်လော့် "မောလ တောင်းစောင့်ယေရှုတောင်း မွတ်နိမ်ဟော်မစော်လေး"ဆီ ဝါကော်ဝိုက်။ မေနယ့်လော့် ပေတရုကော့် "မစော် ကော ကွန်းခနောဝ်မွတ်ဟောန့် မစော်"ဆီ ဝါကော်ဝိုက်။ 59 နောက်လောင် မောင်းနိမ်ဟူကော်လော့် ကွန်းတန်းတီကော်နိမ်လ "မွန်းန ပေးကွန်းဂါလိလဲညော့ တောင်းစောင့်ယေရှုတောင်း မွတ်နိမ်နဲဟောဝါလ နီးနီးငမ်းငမ်းကောဝါပဲ့"ဆီ ဝါကော်ဝိုက်။ 60 မေနယ့်လော့် ပေတရုလ "အောင်းမောဝါလေကော့် တိုးနိမ်ကော့် ကောမဟု"ဆီ ဝါပေါက်ကော်ဝိုက်။ မေပေတရုဝါနောင်နယ့်ညော့ ချရှ်ချန်း ကိုင်ခေါန်မားကော်ဝိုက်။ 61 စောင့်ယေရှုကော့် တွဲပေါက်အောင်းပေတရုကော်ဝိုက်။ မေနယ့်လော့် ပေတရုကော့် အောင်းစောင့်ယေရှုဆောင်မား "ဝမ်းနယ့် ကိုင်မခေါန်ခွေတ်လော့် အောင်းကော မောမဟုဆီ ဆမ်ဟာတော်ပေါထိန့် တနယ့်ဝါ" ခွမ်းဟိုင့်လ မွန်းမှတ်ပေါက်ကော်ဝိုက်။ 62 နယ့်ရောင့်(ဝ်) ပေတရုလ အောက်ခနောက်ဆီ အိုက်ဟိုင့်ကော်ဝိုက်။ 63 ကွန်းစောင့်ပေါင့်(ဝ်)အောင်းစောင့်ယေရှုလေန အောင်းမွန်းစောင့် မားအောဝ်းမောဝ်းဆီ မောင်းဟင်းကော်ဝိုက်။ 64 အောင်းဟွေတားမွန်းစောင့် ဟပေါမနယ့်ဟောန် တောင်းဖာ့တောင်းပတ်ဆီ "အောင်းမော ဖောတင်လ လောင်(ဝ်)နူ"ဆီ ဝါဆီ 65 အောင်းမွန်းစောင့် အမျိုးမျိုးကော့် နိစပ်ဆီ တန့်ခွမ်းအောင်းမနီးဟင်းကော်ဝိုက်။ 66 နောက်လောင်ဝမ်းနိမ်ဖလိမ်းကော်လော့် ပုရောဟိတ်အောင်းရောင်(ဝ်) လေတောင်း ဆရာကျမ်းစမ်လေ၊ ဂျူးအမျိုးသားခေါင်းဆောင်လေန ခနာ့ဘာသာရေးအဖွဲ့ချုပ်ဟောန့် အောင်းစောင့်ယေရှု စစ်ဆေးဟင်းဝိုက်။ မနော်လေနာ့ အောင်းစောင့်ယေရှု 67 "မောလ စောင့်ကယ်မေရှိယစော်လေး၊ လောင်(ဝ်)နူအောင်းဟော"ဆီ ဝါကော်ဝိုက်။ မွန်းစောင့်လ "စော်ဆီ ကော်ဟောင်ပေါဝါ မဆူ အောင်းကော တယွန်(မ်)မစော်။" 68 အောင်းမဆူ ကောပေါထန်(မ်)ကော့် မဆူတဖြေမစော်။ 69 တော်နယ်ကော့် မဟူကော့် ကောစောင့်လ အောင်းအစွမ်းလေ၊ ဂုဏ်တော်လေတေး(မ်) ရာကန့်ခွာမေးစောင့်ဖလားညော့ တနယ့်နှောင်ကော့်"ဆီ ဝါကော်ဝိုက်။ 70 မေနယ့်လော့် ကွန်းဟောန့်လေတောင်းလုန်န "နဲ့ပေါဝါလော့် မောလ လုစိုင်းစောင့်ဖလားလေး"ဆီ ဆက်ဆီထန်(မ်)ကော်လော့် မွန်းစောင့်ကော့် "ကောလ နောင်မဆူဝါကျဉ်းနော့်ပေး"ဆီ ဝါပေါက်ကော်ဝိုက်။ 71 မေနယ့်လော့် ကွန်းဟောန့်ကော့် "ကောကိုယ်တိုင် ဆီမေပတ်မွန်း အောင်းခွမ်းဟိုင့် နယ်ဟဉ်းကော်ညော့ အောင်းစမွန်း ဆန့်ကျင်ဆီ အောင်းစတန့်အောင်းစဝါ သက်သေအဟောင်းကော့် မလိုကော့်"ဆီ ဝါကော်ဝိုက်။ |
This translation of the TaiLaing Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.