Luke 20 - TaiLaing1 ဝမ်းနိမ်လော့် မွန်းစောင့်ယေရှုလ အောင်းဖွန်ကွန်းလေ ရာခနောဝ်ဝမ်းဗိမာန်တော်ဟောန့် သတင်းအောင်းနီးလေတောင်းတလားတော်လေ ဟောဝိုက်။ ပုရောဟိတ်အောင်းရော်လေ၊ ဆရာကျမ်းစမ်လေတောင်း ဂျူးခေါင်းဆောင်လေန ထီန်ဟင်းမားဆီ 2 အောင်းမွန်းစောင့် "ခနောဝ်ဗိမာန်တော်ဟိုင့် အောင်းတလားဒေသနာလေတောင်း မင်္ဂလာသတင်းလေ ဟပေါနယ့်ဖြန့် အခွင့်အာဏာထောတောင်း မောဟေန။ နယ့်ပေါမစော် အောင်းအခွင့်အာဏာဟိုင့် ဖောဟောင့်(ဝ်)မားအောင်းမော"ဆီ ထန်(မ်)ဟင်းကော်ဝိုက်။ 3 မေနယ့်လော့် မွန်းစောင့်န "အောင်းမဆူ မေးခွန်းတူးနိမ် ကောတထန်(မ်)" မဆူဖြေဟင်းမေ။ 4 အောင်းရေနှစ်မင်္ဂလာဆရာယောဟန်န ဟပေါနယ့်ဟေ ရေနှစ်မင်္ဂလာအခွင့်လ ဖောဟောင့်(ဝ်)ဝိုက်။ စောင့်ဖလားဟောင့်(ဝ်)အခွင့်ဝိုက်ညော့လေး။ နယ့်ပေါမစော် ကွန်းကော်နိမ်မကော်နိမ်လ ဟောင့်(ဝ်)ခွင့်ဝိုင့်လေး"ဆီ ထန်(မ်)ပေါက်ကော်ဝိုက်။ 5 မေနယ့်လော့် မနော်လေနာ့ အချန်းချန်း တိုင်ပန်ဟင်းဆီ "စောင့်ဖလားဟောင့်(ဝ်)ဝိုက်ဆီ ဟောဟောင်ဖြေလော့် မွန်းန အောင်းစဟော "နောင်နယ့်ပေါဝါလော့် မဆူန အောင်းစယောဟန် ဟေဟောင်းဆီမယွန်(မ်)ဟင်းန"ဆီ တဝါပေါက်မား။ 6 တော်နယ်ကော့် "ကွန်းကော်နိမ်မကော်နိမ် ဟောင့်(ဝ်)ဝိုက်ဆီ ဟောင်ပေါဝါလော့် ကွန်းဖွန်ဟိုင့်လ အောင်းစဟော တောင်းကောင့်ဟဉ်းတောင်းဟူဆီ ဟောတနယ့်သိုင်းကော့်။ ဟေဟောင်းဆီပေါဝါလ မနော်လ အောင်းစယောဟန် ပရောဖက်ပါးနိမ်ဆီ ယွန်(မ်)ညော့ဝိုက်"ဆီ ဝါကော်ဝိုက်။ 7 ကောပ့်နယ့်ညော့ မနော်လေန "အောင်းစယောဟန် အခွင့်ဟဟေရေနှစ်မင်္ဂလာဟိုင့်လ ဖောဟောင့်(ဝ်)မားဝါလ ဟောမဟု"ဆီ ဖြေပေါက်ကော်ဝိုက်။ 8 မေနယ့်လော့် မွန်းစောင့်ကော့် "အောင်းစကော နောင်နယ့်ဆီ ဟပေါနယ့်ဟေ အခွင့်ဟိုင့် ဖောဟောင့်(ဝ်)ဝိုက်ဝါလ အောင်းမဆူ ကောတလာင်(ဝ်)မစော်"ဆီ ဝါပေါက်ကော်ဝိုက်။ 9 နောက်လောင်နော့် စောင့်ယေရှုကော့် အောင်းကွန်းဖွန် ပွန်ပုဒ်နိမ်လောင်(ဝ်)ပြားကော်ဝိုက်။ "ကွန်းကော်နိမ်လ ဆွုန်စပျစ်ဆွုန်နိမ် ပူဝိုက်ဆီ အောင်းဆွုန်ဟိုင့် ချားအောင်းငှာဝိုက်ဆီ ရာမှိန်းတန်းတီ အချီန်တော်ပေါဟူ အောက်ခရီးကော်ဝိုက်။ 10 မေမတ်စပျစ်လေမတ်မားလ အောင်းခမွန်းကော်နိမ်ပွယ်ဆီ အောင်းဝေပွန်စောင့်မွန်း ဟကွာအောင်း(ဝ်)ကော်ဝိုက်။ အောင်းခမွန်းဟိုင့် ကွန်းကျဉ်းငှာလေန တူးနိမ်ကော့်မဟောင့်(ဝ်)ဆီ တင်ဆီ ဟော့်အောက်မားကော်ဝိုက်။ 11 စောင့်ဆွုန်ကော့် နောက်လောင်အောင်းခကော်နိမ် ပွယ်ဟွန်းကော်ဝိုက်။ မေနယ့်လော့် ကွန်းအောင်းကျဉ်းငှာဆွုန်လေန အောင်းကွန်းဟိုင့် တင်ဟင်းမောင်းဟင်းဟွန်းကော်ဝိုက်။ မနော်လေန အောင်းစကွန်းဟောန့် ဟပေါစေ ဟပေါနီးအိုင်းဆီ အဟောင်းကော့်မဟောင့်(ဝ်)ဆီ ဟော့်အောက်ဟွန်းကော်ဝိုက်။ 12 နောက်လောင်ဟာနိမ် စောင့်ဆွုန်န အောင်းခတတိယကော့်နိမ် ပွယ်ဟွန်းကော်လော့် နောင်မေစောင့်ကျဉ်းနော့် တင်ဆီ ပွယ်ပေါက်ဟွန်းကော်ဝိုက်။ 13 မေနယ့်လော့် စောင့်မွန်းန "ကောတနယ့်ဟေဟောင်းဝါလ ကောဟုကော် အောင်းလုစိုင်းကော တပွယ်ကော်။ မနော်လ အောင်းလုစိုင်းကောပေါဝါလော့် တလေစားဟင်း"ဆီ အောင်းမွန်းတောင်းမွန်း ဝါရောင့်(ဝ်) အောင်းလုစိုင်းမွန်း ပွယ်ကော်ဝိုက်။ 14 တော်နယ်ကော့် ကွန်းကျဉ်းငှားလေန ဟောန်အောင်းလုစိုင်းမွန်းကော်လော့် "ကွန်းဟိုင့်န ဝမ်းနိမ်လော့် တပေးကွန်းတနွိုက်အမွေ။ အောင်းမွန်းတနွိုက်အမွေလေန ဟပေါပေးပစ္စည်းဟော အောင်းမွန်း အောင်း(ဝ်)သိုင်းဟင်းစို့"ဆီ အချန်းချန်း တိုင်ပန်ဟင်းကော်ဝိုက်။ 15 စရန်းငှာလေကော့် အောင်းလုစိုင်းစောင့်ဆွုန်စပျစ်ဟောန့် ဆွဲအောက်ခနောက်ဆွုန်ဆီ အောင်း(ဝ်)သိုင်းဟင်းကော်ဝိုက်။ မေနယ့်လော့် စောင့်ဆွုန်နာ့ အောင်းကွန်းစရန်းငှားလေ တဟေနောင်နူး။ 16 "စောင့်ဆွုန်လ မားဆီ အောင်းကွန်းစောင့်ကျဉ်းငှား တမားအောင်း(ဝ်)သိုင်း။ ပေါရောင့်(ဝ်) အောင်းဆွုန်ဟိုင့် တဟောင့်(ဝ်)အောင်းစကော်နိမ်ကော်"ဆီ လောင်(ဝ်)ပြားကော်ဝိုက်။ ကွန်းလေနယ့်ဟဉ်းကော်လော့် "အမျိုးကိစ္စနောင်နယ့် မေနော်ကော့် ပီဟပေးမားအီအွန်"ဆီ ဝါဟင်းဝိုက်။ 17 တော်နယ် စောင့်ယေရှုလ အောင်းမနော်တွဲဆီ "ခနောဝ်ကျမ်းဟိုင့် ကွန်းတောင့်အုပ်တိုက်လေ မခနွိုက်ဆီ အောင်းဟွတ်ဝေဝိုက် ကောင့်ဟဉ်ဟိုင့်လေန ပေးအောင်းကောင့်ဟဉ်အရေးရော်မားကော်"ဝါလ ခဝါအဓိပ္ပါယ်အဟောင်း။ 18 ကွန်းချားတိုခနေကောင့်ဟဉ်ဟိုင့်လ တပေးမဉ်မဉ်မွယ်မွယ်ကော်ဝိုက်။ ကောင့်ဟဉ်ဟိုင့်ကော့် ပေါချားတိုခနေကွန်း ကော်နိမ်မကော်နိမ်ကော်လော့် ကွန်းဟောန့်န တပေးမဉ်မဉ်မွယ်မွယ်ကော်ဝိုက်"ဆီ ဝါကော်ဝိုက်။ 19 ခနောဝ်ကွန်စောင့်ထောင်(မ်)ခွမ်းစောင့်ယေရှုန ဟိုဘာသာရေးလေ ဆရာအောင်းကျမ်းစမ်လေန စောင့်ယေရှုန ခဝါအောင်းစမနော်ညော့ လောင်(ဝ်)ပြားအကြောင်းအောင်းပွန်ဟိုင့်ဝါလ ဟုဟင်းကော်ဝိုက်။ ကောပ့်နယ့်ညော့ မနော်လေန အောင်းစောင့်ယေရှု ခဆွဲတလားဟင်းမေကော့် မနော်လေန နယ့်ကိုးအောင်းဖွန်ကွန်းဝိုက်။ 20 ကောပ်နယ့်ညော့ မနော်လေန အောင်းစောင့်ယေရှု တွဲနွေ့ဆီ ရာခွမ်းမွန်းစောင့် ခါအောင်းဖစ်ဆီ အောင်းစမွန်းစောင့် ခနောဝ်မေးစောင့်ခွန်ဟော်ငွန်း ဟပေါနယ့်အပ်ပဲ့ အောင်းသူလျှိုလေ ပွယ်ကွာကော်ဝိုက်။ 21 ကွန်းသူလျှိုလေန အောင်းစောင့်ယေရှု "စောင့်၊ စောင့်ယေရှုန အောင်းစော်လေ ဆောန်ဟောင့်(ဝ်)ဆီ ဖောကော့်အောင်းဆာဝါလ မရောင်းဆီ နောင်ခွန်တန်းစောင့်ဖလားလ တောင်းတလားသမ္မာလေတောင်း တော်ပေါညီ ဆောန်ဟောင့်(ဝ်)ဝါလ ဟောဟုစောင့်။ 22 ဟောလေန "အောင်းစစောင့်အင်ပါယာလ တနယ့်ဟောင့်(ဝ်)ကာလေန တောင်းတလားတော်တောင်း ညီလေး နယ့်ပေါမစော် မညီလေး"ဆီ ဝါဟင်းကော်ဝိုက်။ 23 မွန်းစောင့်လ အောင်းအကြမ်မနော် ဟုညော့ 24 အောင်းစကွန်းဟိုင့်လေ "ချပ်ငွန်းရောမလ ပြားနူအောင်းကော"ဆီ ဝါကော်ဝိုက်။ "ခနေချပ်ငွန်းဟိုင့်လ ပုံဖောတောင်းနာမယ်ဖော ပြားဝိုက်"ဆီ ထန်(မ်)ကော်ဝိုက်။ ကွန်းဟိုင့်လေကော့် "ပုံစောင့်အင်ပါယာတောင်း နာမယ်စောင့်အင်ပါယာဆီဇာ"ဆီ လောင်ပြားပေါက်ဟင်းကော်ဝိုက်။ 25 နယ့်ရောင့်(ဝ်) မွန်းစောင့်လ "ပစ္စည်းလေန တောင်းဆီဇာတောင်းဟောင်ပေါဆိုင်ကော့် ဟောင့်(ဝ်)ပေါက်အောင်းဆီဇာကော်၊ တောင်းစောင့်ဖလားတောင်းပေါဆိုင်ကော့် ဟောင့်(ဝ်)ပေါက်ကော်အောင်းစောင့်ဖလား"ဆီ ဝါပြားကော်ဝိုက်။ 26 ကွန်းဟိုင့်လေန ခနာ့ကွန်းဖွန် ခါအောင်းဖစ်မနွိုက်ညော့ ဝမ့်အောင်းစောင့်ယေရှုဆီ မနွိုက်ဝိုက်။ မနော်လေန နယ့်ဟဉ်း အောင်းစောင့်ယေရှုဝါလေကော်လော့် အမ်းဟင်းဆီ ရိန်းဟင်းကော်ဝိုက်။ 27 ဇဒ္ဒုကဲလေန ကွန်းလေသိုင်းဆီ ခွန်းပေါက်မားဝါလ မနော်လေ မယွန်(မ်)ဟင်းဝိုက်။ ကောပ့်နဲ့ညော့ ဇဒ္ဒုကဲမောင်းဖောင်လေန ရာမွန်းစောင့်ဟောန့် ကောင်(ဝ်)စူးဆီ 28 "စောင့်၊ ရာကျမ်းမောရှေလ ကွန်းပရရောင်းကော်နိမ်လ လအောင်မနွိုက်ဆီ ပေါသိုင်းကော် မယ်ဟန့်အောင်းကျန်ဝိုက်လ နယ့်အောင်း(ဝ်) အောင်းနောင့်စိုင်းမွန်း။ အောင်းလုစိုင်းမနော်လိမ့်အောင်းတိုင်းန လုစိုင်းပီစိုင်းဟော အောင်းသိုင်းကော်ဆီ နယ့်စေ"ဆီ တင့်(မ်)ဝိုက်။ 29 မေဟာနိမ်နာ့ ပီနောင့်ခနောဝ်စေကော့်ဟိုင့်လ အောင်းချဉ်းရောင်(ဝ်)လ ပရနွိုက်မေကော့် လအောင်မနွိုက်ဆီ သိုင်းကော်ဝိုက်။ 30 လုစိုင်းဒုတိယအောင်းချဉ်းရောင်(ဝ်) (ဒုတိယအကြီးဆုံးသား)လ အောင်း(ဝ်)အောင်းကော့်ယဉ်းဟိုင့်မေကော့် လအောင်မနွိုက်ဆီ သိုင်းဟွန်းကော်ဝိုက်။ 31 လုစိုင်းအောင်းတတိယ(တတိယအကြီးဆုံးသား)ကော့် နောင်ပီစိုင်းမွန်းညော့ ပေးကော်ဝိုက်။ နောင်နယ့်ညော့ မနော်ပီနောင့်တောင်းစေကော့် တောင်းမယ်ဟန့်တောင်းနွိုက်ဟင်းရောင့်(ဝ်) လအောင်မနွိုက်ဆီ သိုင်းဟင်းကော်ဝိုက်။ 32 နောက်ဆုံးလော့် ကော့်ယဉ်းဟောန့်ကော့် သိုင်းကော်ဝိုက်။ 33 နောင်နယ့်ပေါဝါလော့် ကော့်ယဉ်းဟိုင့်လ တောင်းပီနောင့်စေကော့်တောင်း အောင်း(ဝ်)ဟင်းမားညော့ စောင့်ဖလားလ အောင်းစမနော်လေ ဆီမေသိုင်းလ ဟောင်ပေါဟခွန်းပေါက်မားလော့် ကော့်ယဉ်းဟိုင့်လ တပေးပရာ့ဖော"ဆီ ဇဒ္ဒုကဲလ ထန်(မ်)ကော်ဝိုက်။ 34 မေနယ့်လော့် မွန်းစောင့်န "ရာခနေကမ္ဘာဟိုင့်နဲဟော် အောင်းလတ်ထတ်လေရောင်းန။ 35 တော်နယ်ကော့် ရာဘဝခနာ့ သိုင်းဆီ ကွန်းအောင်းခွန်းပေါက်တောင်း ထိုက်တန်န နောင်အောင်းလတ်ထတ်လေမရောင်းညော့ အောင်းသိုင်းကော့် မရာင်းကော့်။ 36 မနော်လေန အောင်းမသိုင်းပဲ့ နောင်ဖီစောင့်ဖလားလေညော့ တပေး။ မနော်လေန ဆီမေအောင်းသိုင်း ကွန်းနယ့်ခမ်အောင်းခွန်းပေါက်မားလေညော့ ပေးလအောင်စောင့်ဖလားဟင်း။ 37 အကြောင်းဖိုင်းမိုက်ရွန်း(မ်)လ မောရှေန "ပေးစောင့်ဖလား အာဗြဟံဟော်၊ ပေးစောင့်ဖလား ဣဇက်တောင်းယာကုပ်ဟော်"ဆီ တော်ပေါချန်း လောင်(ဝ်)ပြားကော်ဝိုက်။ ကောပ့်နဲ့ညော့ ကွန်းသိုင်းလေ နယ့်ခွန်းပေါက်မားဝါလ ပြားဝိုက်ဝိုက်။ 38 နောင်အောင်းလောင်(ဝ်)ပြားဟိုင့်လ စောင့်ဖလားန စောင့်ဖလား ကွန်းသိုင်းလေမစော်၊ ပေးစောင့်ဖလား ကွန်းအဆတ်ရောင်းလေ။ အောင်းခဝါလ ကွန်းလေန နောင်စောင့်ဖလား အလိုရောင်းညော့ နယ့်အူ"ဆီ ဝါကော်ဝိုက်။ 39 မေနယ့်လော့် ကွန်းကျမ်းစမ်မောင်းဖောင်လ "အဖြေမောစောင့်လ အိုင်းနီး"ဆီ ဝါဟင်းကော်ဝိုက်။ 40 ဆီမေနယ့်လော့် ဖောကော့် အောင်းမွန်းစောင့် မထန်(မ်)ပေးဟင်းကော့်ဝိုက်။ 41 နောက်လောင်နော့် မွန်းစောင့်ယေရှုန အောင်းကွန်းလေ "အောင်းစောင့်ဖလားပွယ်မား စောင့်ကယ်မေရှိယလ ပေးအမျိုးကွန်းစောင့်ခွန်ဟော်ခမ်းဒါဝိဒ်လေးဝါလ အောင်းမော ကောသလောင်(ဝ်)ပြား။" 42 ရာကျမ်းဆာလံန စောင့်ခွန်ဟော်ခမ်းဒါဝိဒ်လ အောင်းမွန်းတောင်းမွန်း "စောင့်ဖလားန အောင်းစောင့်ကော 43 အောင်းရန်ဆူမောလေ ခတောင့်တဉ်းမော နောင်ခုံတန်ချပ်တဉ်းညော့ တော်ကောဝိုင့်ဝိုက်ပွန့် တောင်းပကန့်ခွာကော နောင်မေ"ဆီ ဝါမားဝိုက်။ 44 စောင့်ခွန်ဟော်ခမ်းဒါဝိဒ်န အောင်းစောင့်ကယ်မေရှိယလ စောင့်ကောဆီ ဝါမားညော့ စောင့်ကယ်မေရှိယလ ဆီမေစောင့်ခွန်ဟော်ခမ်းဒါဝိဒ်လုန်းမား မစော်ပဲ့။ အောင်းမဆူ ကောဟောင်တနယ့်ဝါပေါဝါလော့် မွန်းန ဆာဆီဒါဝိဒ် တပေးကွန်းမြတ်မစော်လေး"ဆီ ဝါကော်ဝိုက်။ 45 စောင့်ယေရှုလ တကြားကွန်းလေထောင်(မ်)ဟိုင့်လ အောင်းတပဲ့မွန်းလေ 46 "အောင်းဆရာကျမ်းစမ်နဲဟော် တနယ့်ဟေအလေးဆီ တနယ့်ရှောင်ဟင်း။ မနော်ပေါအောက်နာ့ခွန်တန်းပေါလော့် ဆေလုန်လနွန်ဆီ အောင်းနယ့်အောက်ခနောက်လ မနော်ကြိုက်ဟင်းဝိုက်။ ပေါထီန်နောဝ်းဈေး ကွန်းလေဟေအလေးအောင်းမနော်ဆီ အောင်းဟပ်(မ်)အောင်းဟောင့်လ မနော်လို။ ရာစလပ်လေကော့် ခအူရာခနာ့။ ရာပွဲရာလမ်းလေကော့် ခနှောင်ရာစပွဲအောင်းနီးလေဝိုက်။ 47 အောင်းဟုန်းမယ်ဟန့်လေ အတင်းဟဉ်(မ်)ဟင်းဆီ ဟောင်ပေါရောန်းဆုကော့် တော်ပေါဟူ စမ်ဟန်ဆောင်ဟင်းဝိုက်။ စောင့်ဖလားန အောင်းကွန်းဟိုင့်လေ တဟောင့်(ဝ်)အပြစ်လုန်ဝိုက်"ဆီ ဝါကော်ဝိုက်။ |
This translation of the TaiLaing Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.