Luke 19 - TaiLaing1 နောက်လောင်နော့် စောင့်ယေရှုလ အောင်းမှိန်းယေရိခေါ ဖြတ်ဆီ ကြွကွာကော်ဝိုက်။ 2 ရာမှိန်းဟောန့် ဇက္ခဲဝါလ ကွန်းကော်နိမ်ရောင်းဝိုက်။ မွန်းနာ့ နယ့်ဟေလောင် အောင်းကျေ(ပ်)ကာ ကော်နိမ်ပေးဆီ ပေးကွန်းချမ်းသာဝိုက်။ 3 ဇက္ခဲန စောင့်ယေရှုလ ဖောဝါလ ခဟောန်ကောင်(ဝ်)မေကော့် တိုးမွန်းတေမ်ဆီ ကွန်းလေလပ်ဝိုက်အောင်းစမွန်းညော့ အောင်းစောင့်ယေရှု မနယ့်ဟောန်ဝိုက်။ 4 ကောပ့်နယ့်ညော့ မွန်းန ဟပေါနယ့်ဟောန်အောင်းစောင့်ယေရှု နောင်ခွန်တန်းဟိုင့်အတိုင်း ပိုင်ထခနာ့ဆီ ပိုင်ခွန့်ခနေတိန်ဖနေကော်ဝိုက်။ 5 စောင့်ယေရှုလ ထီန်ကော်ရာဟောန့်လော့် ဟင်ခွန့်တိန့်ဖနေဆီ "ဇက္ခဲ လုန်းမားဟကျန် ဝမ်းနယ့်ကောတဆောင်း(ဝ်)ရာဟုန်းမော"ဆီ ဝါကော်ဝိုက်။ 6 ကောပ်နယ့်ညော့ ဇက္ခဲလ ဆီမေတိန့်မိုက် လုန်းမားဆီ အောင်းစောင့်ယေရှု အိုက်စွုမ်းဆီ ဟပ်ကော်ဝိုက်။ 7 ကွန်းနယ့်ဟောန် အောင်းထိုင့်လေတောင်းလုန်န "မွန်းစောင့်န ရာဟုန်းကွန်းအပြစ်ရောင်းဟောန့် ကွာဆီ တောင်းမွန်းတောင်း တကွာကျဉ်းနွေ့ဟင်းအွန်"ဆီ တန့်ဟင်းဝိုက်။ 8 နောက်လောင်နော့် ဇက္ခဲလ စိန်ဆီ "စောင့်၊ စောင့်၊ ကာအောင်းကောပိုင်တောင်းလုန် အောင်းကွန်းဖန်လေ တောင်နိမ်တမိုင်ဟောင့်(ဝ်)။ နောင်နယ့်ရောင့်(ဝ်) ဆီမေရာကွန်းကော်နိမ်မကော်နိမ်န ပိုဆီအောင်းကျေ(ပ်)ဝိုက်ကာလေကော့် ဆာဆီကောကျေ(ပ်)ဝိုက်မကား ဆီဆပွန့် တဟောင့်(ဝ်)ပေါက်ကော်"ဆီ ဝါပေါက်ကော်ဝိုက်။ 9 မွန်းစောင့်လ အောင်းဇက္ခဲ "စားဆီအစောင်စ မောတောင်းစောင့်ဟုန်းမောလေ အောင်းကယ်နယ့်ခမ်ကော်၊ ဟေဟောင်းဝါလ မောလ စားဆီအမျိုးအာဗြဟံလုန်းမားညော့ဝိုက်။ 10 လူ့သားတော်နာ့ စကယ်အောင်းကွန်းခွန်တန်းဟိုင်လေညော့ ကြွမား"ဆီ ဝါကော်ဝိုက်။ 11 စောင့်ယေရှုလ အောင်းကွန်းထောင်(မ်)အကြောင်းဟိုင့်လေ တောင်းပွန်ပုဒ်နိမ်တောင်း လောင်(ဝ်)ပြားဟွန်းကော်ဝိုက်။ ဟေဟောင်းပေါဝါလော့် မွန်းစောင့်န ထီန်မားခန့်မှိန်းဂျေရုဆလင်ကော်ညော့ ကွန်းလေန သာသနာတော်စောင့်ဖလားန ချရှ်ချန်းတပေါ်မားကော့်ကျေ့ဟန်ဆီ ထန်ဟင်းညော့ဝိုက်။ 12 ကောပ်နယ့်ညော့ မွန်းစောင့်ယေရှုလ "အလောင်းစောင့်ခွန်ဟော်ခမ်းပါးနိမ်လ ရာမှိန်းမွန်းအူန နောင်စောင့်ခွန်ဟော်ခမ်းဆီ ဟပေါနယ်အုပ်ချုပ်န ကွာရာစောင့်ခွန်ဟော်ဖိုင်ဆီ ဟပေါနယ့်ခမ်ဖိတ်ဆိတ် မဲမားကော်ဝိုက်။ နောင်နယ့်ဆီ ခမ်ဖိတ်ဆိတ်ရောင့်(ဝ်)ဆီ ပေါက်မားလော့် မွန်းန အောင်းမှိန်းမွန်း အနေစောင့်ခွန်ဟော်ခမ်းတောင်း တအုပ်ချုပ်ဝိုက်။ 13 နောင်နယ့်ဆီ မေမအောက်ခွေတ် မွန်းန အောင်းခမွန်းဆစ်(ပ်)ကော့်န ဟောင့်ဆီ ရီကော့်စီ ကာဟေလောင်အောင်းတောင်းဆမ်နိမ်းတောင်းညီ ငွန်းတစ်မိနာ့ ဟောင့်(ဝ်)ဆီ "အောင်းငွန်းဟိုင့်လေ ဆွန်း(မ်)ဆီ တော်ကောပေါက်မားပွန့် ခါစီးပွားဟင်းမေ"ဆီ ဆောင်ဝိုက်ကော်ဝိုက်။ 14 တော်နယ့် ကွန်းမှိန်းဟောန့်လေန အောင်းမန်းဆားဟိုင့် စောန်းဟင်းညော့ အောင်းကွန်းစောင့်လောင်(ဝ်)သတင်းလေ ရာမှိန်းဟောန့် ပွယ်ဆီ "အောင်းမင်းသားဟိုင့် ဟောမခဟပေးစောင့်ခွန်ဟော်ခမ်းဟော "ဆီ ဟဝါဟင်းကော်ဝိုက်။ 15 တော်နယ်ကော့် အောင်းမန်းဆားလ နောင်စောင့်ခွန်ဟော်ခမ်းအောင်းမောဝ်ဆီ တန်ဟင်းရောင့်(ဝ်)ကော်လော့် ပေါက်မားရာမှိန်းမွန်းဆီ အောင်းခမွန်းလေ ခနာ့မွန်း ဟောင့်ကော်ဝိုက်။ ငွန်းအောင်းမွန်းဟောင့်(ဝ်)ဝိုက်တောင်း စီးပွားနောင်နူးပွန့်ခွန့်မားဝါလ ခဟုညော့ဝိုက်။ 16 ခမွန်းအောင်းပထမကော့်နိမ်လ "ငွန်းအောင်းမောစောင့်ဟောင့်(ဝ်)ဝိုက်လေတောင်း ကောခ ဟိုဆမွန်းဆစ်(ပ်)နိမ်ပွန့် တော်ပေါနမ် ဟေဝိုက်စောင့်"ဆီ လောင်(ဝ်)ကော်ဝိုက်။ 17 စောင့်ခွန်ဟော်ခမ်းန အောင်းခမွန်း ချီးမွမ်းဆီ "နီး မောအိုက်တော်။ မောလ အောင်းကောဟောင့်(ဝ်)ဝိုက် စောင်နိန်အင်တောင်းကိုးသကော့် နယ့်ယွန်(မ်)ကော်။ အောင်းမှိန်းဆစ်(ပ်)မှိန်းပွန့် မောအုပ်ချုပ်ကော်"ဆီ ဝါကော်ဝိုက်။ 18 အောင်းခဒုတိယကော်နိမ်ကော့် "ငွန်းအောင်းမောစောင့်ဟောင့်(ဝ်)ဝိုက်လေတောင်း ကောခ ဟိုဆမွန်းဟာ့ဆပွန့်တော်ပေါနမ် ဟေဝိုင့်စောင့်"ဆီ လောင်(ဝ်)ကော်လော့် 19 စောင့်ခွန်ဟော်ခမ်းလ "မော မှိန်းဟာ့မှိန်း အုပ်ချုပ်ကော်"ဆီ ဝါကော်ဝိုက်။ 20 အောင်းခတတိယကော်နိမ်လ မားဆီ "ငွန်းမောစောင့် ရာဟိုင့်ရောင်း။ တောင်းဖာ့ကောတောင်း ကောစောက်(ယ်)ဝိုက်။ 21 မောစောင့်န ပေးကွန်းယပ်ဆီ အောင်းမောပိုင်မစော်ကော့် မောစန်အောင်း(ဝ်)၊ ခေါင့်(ဝ်)အောင်းမောပွတ်လေမစော်ပဲနဲ့ကော့် မောစမ်ပတ် နောင်နယ့်ဆီ ပဲ့ကျဉ်းအောင်းပွန်ညော့ အောင်းစမောစောင့် ကောနီးကိုး"ဆီ ဝါကော်ဝိုက်။ 22 နောက်လောင်နော့် မွန်းန အောင်းစခမွန်း "မောလ နောင်ပွန်မစော် လုံးဝအသုံးမကျ ကောပ့်ခွမ်းမောညော့ မောတနယ့်ခမ် အပြစ်။ ခနေပွန် ကောဟေအောင်းမနီးဝါလ မောဟုမစော်လေး၊ ဟွန်ကောမစော်ကော့် ကောအောင်း(ဝ်)၊ ကောမပူမေကော့် ကောပတ်ကျဉ်းနော့်။ ကောန အိုက်ယပ်ဆီ မောပေါဟုပေါဝါလော့် 23 အောင်းငွန်းကော ဟေဟောင်းဆီ မဝိုက်ဝိုက် ခနောဝ်ဘဏ်လ။ ကောပေါပေါက်မား ဘဏ်အောင်းတိုးအင်းကိုးသကော့် ကောတနွိုက်အွန်"ဆီ ဝါကော်ဝိုက်။ 24 နောက်လောင်နော့် စောင့်ခွန်ဟော်ခမ်းနာ့ အောင်းခမွန်းလေ ဟောင့်ဆီ "ငွန်းအောင်းရာမွန်း အောင်း(ဝ်)ကော် အောင်းကွန်း ဟိုဆမွန်းဆစ်(ပ်)နိမ်ဟေပဲ့လ ဟောင့်(ဝ်)ကော်"ဆီ ဝါကော်ဝိုက်။ 25 ကွန်းဟောန့်လေန "စောင့်ခွန်ဟော်ခမ်း၊ ရာမွန်းငွန်းဆစ်(ပ်)မိနာ့ ရောင်းရောင့်(ဝ်)ကော်"ဆီ ဝါဟင်းကော်ဝိုက်။ 26 တော်နယ်ကော့် စောင့်ခွန်ဟော်ခမ်းန "အောင်းမဆူ ကောခဝါလ၊ တူးနိမ်မတူးနိမ်ရောင်းဆီ ကွန်းဟေဝိုက်ဟပေါပွားလ ဆာဆီတဟောင့်(ဝ်)။ တော်နယ်ကော့် စောင်နိန်အင်ရောင်းဆီ အောင်းကွန်းတော်ပေါပွား ကွန်းမဟေပဲ့န အောင်းရောင်းရာမနော် အောင်းစောင်နိန်အင်ကိုးသကော့် အောင်းအောဝ်းတနယ့်ခမ်ဝိုက်။ 27 အစောင်ချရှ်ချန်း အောင်းကောပေးစောင့်ခွန်ဟော်ခမ်း ကွန်းမလိုလေန ဟောင့်မားခနာ့ကော။ ရာခနာ့ကော အောင်းစမနော် အောင်း(ဝ်)သိုင်းကော်"ဆီ ဝါကော်ဝိုက်။ 28 မွန်းစောင့်လ တလားဟောရောင့်(ဝ်) ရာမှိန်းဂျေရုဆလင်ပွန့် ကြွပေါက်ကော်ဝိုက်။ 29 ရာခန့်နွဲသံလွင် ရာမှိန်းဗက်ဖောဂေတောင်း မှိန်းဗေသနိပွန့် ထီန်ကော်လော့် အောင်းတပဲ့မွန်းဆောင်(န်)ကော့် ဟကွာထခနာ့ဆီ ပွယ်ကော်ဝိုက်။ 30 မွန်းစောင့်လ အောင်းတပဲ့မွန်းဆောင်(န်)ကော့် "မဆူ ရာမန့်ခနာ့ဟောန့်လေ မဆူကွာထ။ ရာဟောန့် အောင်းပွန်မနယ့်ချီအွန် မြည်းတိုးနိမ် မဆူတခေါက်(ပ်)။ ဆိုယ်ကျဲယ့်ဆီ စွန်းမားဟင်းရာကော။ 31 ကော်နိမ်မကော်နိမ် "မဆူဟေဟောင်းဆီ ကျဲယ့်ဆိုင်မြည်းနဆီ ပေါထန်(မ်)မား စောင့်ယေရှုလိုညော့ အောင်း(ဝ်)ကွာကော်"ဆီ ဝါကော်"ဆီ ဆောင်ကော်ဝိုက်။ 32 တပဲ့ဆောင်(န်)ကော့်ကော့် ထီန်ခနောဝ်မန့်ကော်လော့် နောင်စောင့်ယေရှုဝါမားညော့ နယ့်ခေါက်(ပ်)ကော်ဝိုက်။ 33 မနော်လေန တကြားမနော်ကျဲယ့်ဆိုင်မြည်းဟိုင့် စောင့်မြည်းန "မဆူဟေဟောင်းဆီ ကျဲယ့်ဆိုင်မြည်းဟင်းန"ဆီ ထန်(မ်)ကော်ဝိုက်။ 34 မနော်လေန "စောင့်ယေရှုလိုညော့"ဆီ လောင်(ဝ်)ပြားကော်ဝိုက်။ 35 တပဲ့လေန အောင်းမြည်းဟိုင့် ရာစောင့်ယေရှုဟောန့် စွန်းကွာကော်ဝိုက်။ ခနေလောင်မြည်း ဖတောင်းဆေဆီ အောင်းမွန်းစောင့် ဟချီခနေဟောန့်ကော်ဝိုက်။ 36 စောင့်ယေရှုန အောင်းမြည်းအင်ဟောန့်ချီဆီ ရာခွန်တန်းကွာဂျေရုဆလင်ဟောန့် ကွန်းဖွန်လေန ရာခနာ့မွန်းစောင့် တောင်းဖာ့ဖလိုဝိန်းလေတောင်း ဆေထဝိုက်ဟင်းဝိုက်။ 37 အောင်းရောင်းရာခန့်ဂျေရုဆလင် ဆီမေနွဲသံလွင် စောင့်ယေရှုလုန်းမားလော့် ကွန်းဖွန်လေကော့် ရာနာ့ခွန်တန်းဟောန့် အတွုက်အောင်းမွန်းစောင့်ဟေမား အောင်းခနီးအမ်းလေညော့ စွုမ်းဟင်းဆီ အောင်းဂုဏ်တော်စောင့်ဖလား ချီးမွမ်းဟင်းကော်ဝိုက်။ 38 မနော်လေန "တောင်းနာမယ်စောင့်ဖလာတောင်း အောင်းကြွမား စောင့်ခွန်ဟော်ခမ်းလ မင်္ဂလာရောင်း။ ရာနိဗ္ဗာန်ဟောန့် နီးနီးငမ်းငမ်း ဟနယ့်အူအိအွန်။ အစွမ်းစောင့်ဖလားလေ ဟလိန်းအီ့အွန်"ဆီ စေဟင်းကော်ဝိုက်။ 39 ခနောဝ်ကွန်းဖွန်ဟိုင့် ဖာရိရှဲမောင်းဖောင်လေန အောင်းမွန်းစောင့် "ဆရာ၊ အောင်းတပဲ့မောလေဝါနောင်နယ့်လ ဟရပ်ကော်"ဆီ ဝါကော်ဝိုက်။ 40 မေနယ့်လော့် စောင့်ယေရှုလ အောင်းစမနော် "အောင်းမဆူကောတဝါ၊ အောင်းမနော်စေလေ ဟောင်ပေါဟရပ်ကော် ကောန့်ဟဉ်ဟိုင့်လေ တစေဟင်းဟွန်းနော့်"ဆီ ဝါကော်ဝိုက်။ 41 နောက်လောင်နော့် မွန်းစောင့်လ ထီန်ခန့်မှိန်းဂျေရုဆလင်ဆီ ဟောန်အောင်းမှိန်းကော်လော့် နမ့်တားတိုကော်ဝိုက်။ 42 စောင့်ယေရှု "ဆီမေစောင့်ဖလားန တန်းအောင်းတနွိုက် ငြိမ်းချမ်းရေးလေ အောင်းကွန်းခေတ်အစောင် ခဟဟု။ တော်နယ်ကော့် အောင်းထိုင့်လေန မဆူအောင်းတဟုပဲ့မစော်" 43 ရန်ဆူမဆူလေန ဟပေါနယ့်တွုက်အောင်းမဆူ ရာဟဉ်းမှိန်းဟောန့် အချီန်အောင်းဝိုင်းဝိုင့်တထီန်မားကော့်။ 44 မနော်လေန အောင်းစမော အောင်းကောန့်ဟဉ်ဟွေနိမ်ကိုးသကော့် အောင်းကျန်ခနေဟွေနိမ် မဟကျန်ဆီ ခနေနောင်နဉ်း ဟပေါလုမ့် တောင်းမောတောင်း အောင်းလအောင်မောလေပါ တဖျတ်စီးဝိုက်။ ဟေဟောင်းဆီဝါလ မောန အချီန်စောင့်ဖလားတမားကယ် မဟုညော့"ဆီ ဝါကော်ဝိုက်။ 45 နောက်လောင်နော့် စောင့်ယေရှုန ခေါင့်(ဝ်)ခနောဝ်ဝမ်းဗိမာန်တော်ကော်လော့် ခနောဝ်ဝမ်းဗိမာန်တော်န အောင်းကွန်းခိုင်ကွန်လေ ဟော့်အောက်ကော်ဝိုက်။ 46 စောင့်ယေရှုလ "ခနောဝ်လိကျမ်းအောင်းတင့်(မ်)ဝိုက်လ ဟုန်းကောန နေရာကွန်းလေဟပေါနယ့်ဝိုင် အောင်းစောင့်ဖလားဝိုက်။ တော်နယ့်ကော့် အစောင်လော့် ရာဗိမာန်တော်လ ပေးနေရာဖလောက်လေ ဟပေါနယ်လောက်တေကော် "ဆီ ဝါကော်ဝိုက်။ 47 မွန်းစောင့်လ ခနောဝ်ဝမ်းဗိမာန်တော် ကူဝမ်းကူဝမ်း တလားလေ ဟောကော်ဝိုက်။ ဟိုဂျူးဘာသာရေးတောင်း ဆရာကျမ်းစမ်လေရယ် အောင်းကျန်ကွန်းအရေးပါ ဂျူးခေါင်းဆောင်လေန အောင်းမွန်းစောင့် စအောင်း(ဝ်)သိုင်းဆီ မနော်ဟေဟင်းမားဝိုက်။ 48 တော်နယ်ကော့် ကွန်းလေန တလားစောင့်ယေရှုလေ အိုက်ခထောင်(မ်)ဟင်းညော့ မနော်လေန အောင်းစောင့်ယေရှု ဟပေါနယ့်အောင်း(ဝ်)သိုင်းဆီ ဟေဟင်းဝိုက်။ တော်နယ်ကော့် တနယ့်အောင်း(ဝ်)သိုင်းနောင်နူးဝါလ ခါတန်းဆီမနွိုက်ဝိုက်။ |
This translation of the TaiLaing Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.