Luke 18 - TaiLaing1 နောက်လောင်နော့် အောင်းတပဲ့လေ စောင်း(ဝ်)မလျှော့ဆီ ကူမေ့တနယ့်ရောန်းဆုဆီ ပွန်ပုဒ်နိမ်လောင်(ဝ်)ပြားကော်ဝိုက်။ 2 "ဟာနိမ်လော့် ရာမှိန်း မှိန်းနိမ်လ တလားသူကြီးကော်နိမ်ရောင်းဝိုက်။ မွန်းန အောင်းစောင့်ဖလားကော့် မနီးကိုး၊ အောင်းကွန်းမန့်လေကော့် မဟေအလေးဝိုက်။ 3 မယ်ဟန့် အောင်းရာမှိန်းဟိုင့်ကော်နိမ်လ ရာတလားသူကြီး "အောင်းစမွန်း တလားနည်းလမ်းတော်ပေါကျ ဆုံးဖြတ်ဟောင့်(ဝ်)အွန်"ဆီ အကျင်(မ်)ကျင်(မ်)ကွာဝါကော်ဝိုက်။ 4 တော်နယ်ကော့် တလားသူကြီးလ အောင်းမယ်ဟန့်ဟောန့်ရောန်းလေ မဟေအလေးမေကော့် နောက်လောင်နော့် တလားသူကြီးလ "ကောလ အောင်းဖလားကော့်မကိုး၊ အောင်းကွန်းဖွန်လေကော့် မဟေအလေး 5 တော်နယ့် မယ်ဟန့်ဟောန့်န အောင်းစကော ကူမေ့နှောက်ယှက်ဆီအူညော့ စွယ်မှတပေးကော့်။ နောင်နယ့်ဟောင်ဝါမှ မွန်းန ရာကော ကူမေ့မားဆီ အောင်းမွန်းမားရောန်းန အစောင့်တရပ်ကော့်"ဆီ ဝါကော်ဝိုက်"ဆီ ဝါကော်ဝိုက်။ 6 နယ့်ရောင့်(ဝ်) စောင့်ယေရှုဝါကော်လ "အောင်းကွန်းစောင်း(ဝ်)မနီး တလားသူကြီးဟိုင့်ဝါလ စမ်းစဉ်းစားနူ"ဆီ ဝါကော်ဝိုက်။ 7 မွန်းစောင့်န "တလားသူကြီးအောင်းမနီးန အောင်းကွန်းအကျင်(မ်)ကျင်(မ်)ရောန်းန ဟောင်ပေါဟေဟောင့်(ဝ်) ရာစောင့်ဖလား ဆုရောန်းဟင်း အောင်းနီးတနွိုက်ဟင်းဝါလ သေချာဝိုက်။ စောင့်ဖလားန မွန်းလိတ်ဝိုက်ဆီ ရာမွန်း ကမ်းခမ်ပါကမ်းဝမ်းပါ ခနေကွန်းရောန်းလေန တကာကွယ်ဟောင့်(ဝ်)မစော်လေး။ အောင်းစမနော် စိတ်တပူဟောင့်(ဝ်)မစော်လေး။ 8 ကောခဝါအောင်းမဆူလ၊ စောင့်ဖလားလ အောင်းစမနော် အလျင်အမြန် တစွယ်ဟောင့်(ဝ်)လ သေချာကျဉ်းနော့်။ တော်နယ် မေ"လူ့သားတော်"ကြွမား ခနေကမ္ဘာဟိုင့်လ ကွန်းမယွန်(မ်)အောင်းမွန်းလေ မကျေးလေမစော် ကျန်အွန်"ဆီ လောင်(ဝ်)ပြားကော်ဝိုက်။ 9 နောင်နယ့်ရောင့်(ဝ်) စောင့်ယေရှုလ အောင်းစောင့်ကောင်(ဝ်)တောင်းကောင်(ဝ်) မြတ်ဆီ စန်ဝါဆီ အောင်းကွန်းစမ်နှိမ်ချအောင်းပွန်လေန နောင်ပုံခတောင့်(ဝ်)ဟိုင့်ပုဒ်နိမ်ညော့ လောင်(ဝ်)ပြားကော်ဝိုက်။ 10 ကွန်းဆောင်(န်)ကော့်လ ဟပေါနယ့်ရောန်းဆု ကွာဗိမာန်တော်ဟင်းကော်ဝိုက်။ အောင်းကော်နိမ်လ ပေးဖာရိရှဲဆီ အောင်းကော်နိမ်လ ပေးစောင့်ကျေ(ပ်)ကာဝိုက်။ 11 ဖာရိရှဲလ စိန်ဆီ "စောင့်ဖလား၊ ကောန နောင်ပွန်ဆီ အောင်းလောဖားမရောင်းစောင့်၊ အောင်းမရိုးမသားကော့်မဟေ။ အောင်းကွန်းဟုန်းဟောကော့် မဖောက်ပြန်ညော့ နောင်ကွန်းကျေ(ပ်)ကာဟိုင့်ဆီ မစော်ညော့ အောင်းစောင့်ဖလား ကျေးဇူးတန်စောင့်။ 12 ကောခလ ရီပတ်ဆောင်(န်)ဝမ်း အောင်းကျဉ်းရှောင်ဆီ ရောန်းဆုစောင့်။ ကာကောခဟေလောင်ကော့် ဟူပွန်မွန်းဆစ်(ပ်)နိမ်လော့်ပွန်နိမ် လှူအောင်းစောင့်ဖလား "ဆီ ရောန်းဆုကော်ဝိုက်။ 13 တော်နယ်ကော့် စောင့်ကျေ(ပ်)ကာလ တောင်းကွန်းအောင်းရောင်း ရာဗိမာန်တော်ဟောန့်တောင်း မကောင့်(ဝ်)မကိုင်း စိန်ဆီအူဆီ အောင်းတောင့်ဖမတွဲပေးကော့်ဝိုက်။ မွန်းန အိုက်နွိုက်နောင်တရောင့်(ဝ်) ဟိုင်နာ့စောင်း(ဝ်)ဆီ "စောင့်၊ အောင်းကော အီ့နူအွန်။ ကောခလ ကွန်းအောင်းဟေ အောင်းမနီးမငမ်းညော့ ခွင့်လွတ်ဟောင့်(ဝ်)အွန်"ဆီ ရောန်းဆုကော်ဝိုက်။ 14 "ကွန်းဟောန့်ဆောင်(န်)ကော့် ထီန်ပေါက်ဟုန်းကော်လော့် အောင်းကွန်းစောင့်ဖလားကျေနပ်လ ဖာရိရှဲမစော်ဆီ ပေးကွန်းကျေငွန်းကော်ဝိုက်။ အောင်းစောင့်ကောင်(ဝ်)တောင်းကောင်(ဝ်) ဟောင်ပေါအထန်ကြီး အောင်းစောင့်ဖလားနှိမ်လ တနယ့်ခမ်၊ အောင်းစောင့်ကောင်(ဝ်)တောင်းကောင်(ဝ်) ဟောင်ပေါနှိမ်မှ အောင်းစောင့်ဖလား ချီးမြောက်တနယ့်ခမ်"ဆီ လောင်(ဝ်)ပြားကော်ဝိုက်။ 15 တော်နယ် ဝမ်းနိမ်လော့် ကွန်းကမ်ဖောင်လ အောင်းလအောင်အင်လေ ဟပေါနွိုက်အောင်းနီးလေ ဟောင့်စူးမားရာခန့်စောင့်ယေရှုကော်ဝိုက်။ တော်နယ့် တပဲ့မွန်းလေဟောန်ကော်လော့် အောင်းမွန်းစောင့် ပီဟနှောက်ယှက်ဆီ အောင်းစမနော် ဆီးကော်ဝိုက်။ 16 နောက်လောင်နော့် မွန်းစောင့်န အောင်းစလအောင်အင်လေ ဟောင့်ဆီ အောင်းတပဲ့လေ "လအောင်အင်လေ ဟမားရာ ရာကော။ အောင်းမနော် ပီဆီးဟင်း။ ဟေဟောင်းပေါဝါလ သာသနာစောင့်ဖလားန တောင်းမနော်တောင်းဆိုင်ညော့ဝိုက်။ 17 အောင်းမဆူ ကောဟောင်နယ့်ဝါအောင်းစော်လေပေါဝါလော့် နောင်လအောင်ဟိုင့်လေဆီ ပေါမဟေနော့် မဆူန ရာခနောဝ်သာသနာစောင့်ဖလား မေနောကော့် အောင်းတနယ့်ခေါင့်(ဝ်)မစော်"ဆီ ဝါကော်ဝိုက်။ 18 ဟာနိမ်လော့် ကွန်းဩဇာအာဏာရောင်းကော်နိမ်လ အောင်းမွန်းစောင့် "စောင့်အောင်းမြတ်ခ အောင်းအဆတ်နိစ္စထာဝရ တော်ပေါနွိုက် ကောတနဲ့ဟေနောင်နူးစောင့်"ဆီ ထန်(မ်)ကော်ဝိုက်။ 19 မေနယ့်လော့် စောင့်ယေရှုလ" အောင်းစကော အောင်းနီးအောင်းမြတ်ဆီ ဟေဟောင်းဆီဝါလ၊ စောင့်ဖလားပါးနိမ်နဲဟော် အောင်းမြတ်တ။ နောက်လောင် ဖောကော့်မရောင်း။ 20 အောင်းပညတ်လေ မောဟုရောင့်(ဝ်)ကော်မစော်လေး။ အောင်းပရပွန်၊ လအောင်ပွန်လေ မနယ့်ပြစ်မား၊ အောင်းအဆတ်ပွန်လေ မနယ့်အောင်း(ဝ်)သိုင်း၊ ခွန်ပွန်လေ မနယ့်လောက်၊ မနယ့်လိဉ်၊ အောင်းပေါ်မယ်လေကော့် တနယ့်ရိုသေဟင်း"ဆီ ဝါကော်ဝိုက်။ 21 ကွန်းဟောန့်န "ကော အောင်းအမိန့်ဟိုင့်လေတောင်းလုန် ဆီမေဆေးဆေးအင်ပွန့် စောင်း(မ်)ဟေမား"ဆီ ဝါကော်ဝိုက်။ 22 အောင်းခွမ်းဟိုင့် စောင့်ယေရှုနယ့်ဟဉ်းကော်လော့် အောင်းစမွန်း "အောင်းမောတနယ့်ဟေ လောင်တူးနိမ်ရောင်းအွန်။ အောင်းမောပိုင်လေတောင်းလုန် ခိုင်ဝေဆီ အောင်းကွန်းဖန်လေ လှူကော်။ နောင်နယ့်ဆီ ဟောင်ပေါဟေလော့် မောန ရာနိဗ္ဗာန်ဟောန့် ဥစ္စာစည်းစိမ်လေ တနွိုက်ဝိုက်။ နောက်လောင်နော့် နောင်တပဲ့ကောဆီ စောင်း(မ်)မားခလောင်ကော"ဆီ ဝါကော်ဝိုက်။ 23 တော်နယ့် ဟိုဘာသာရေးဂျူးလ ပေးကွန်းချမ်းသာညော့ နယ့်ဟဉ်းအောင်းခွမ်းဟိုင့်ကော်လော့် အိုက်စောင်း(ဝ်)ဆေးကော်ဝိုက်။ 24 ကွန်းဟိုင့်နောင်နူပွန့် စောင်း(ဝ်)ဆေးကော်ဝါလ စောင့်ယေရှုဟောန်ကော်လော့် "အောင်းကွန်းချမ်းသာလေ ဟပေါထီန်ခနောဝ်သာသနာစောင့်ဖလားလ အိုက်ယပ်။ 25 ရာဟူးချေမ်လ ကုလားအုတ်တူးနိမ်ဟောင်ပေါခေါင့်(ဝ်)ကိုးတလွယ်အွန် ခနောဝ်သာသနာစောင့်ဖလားလ ကွန်းချမ်းသာလေ ဟပေါနယ့်ခေါင့်(ဝ်) အိုက်ယပ်"ဆီ ဝါကော်ဝိုက်။ 26 ကွန်းဖွန်လေ အောင်းခွမ်းဟောန့် နယ့်ဟဉ်းကော်လော့် "နောင်နယ့်ဝါလော့် ကွန်းနောင်နူးလ အောင်းကယ်တနယ့်ခမ်"ဆီ ထန်(မ်)ပေါက်ကော်ဝိုက်။ 27 စောင့်ယေရှုလ "အောင်းကွန်းလေမဟေပဲ့လေတောင်းလုန် အဟောင်းကော့်ခရောင့်(ဝ်) စောင့်ဖလားဟေပဲ့"ဆီ ဝါကော်ဝိုက်။ 28 မေနယ့်လော့် ပေတရုလ "စောင့်၊ ဟောလေန အောင်းဟောပိုင်လေတောင်းလုန်ဝေဆီ စောင်း(မ်)မားခလောင်မောစောင့်"ဆီ ဝါကော်ဝိုက်။ 29 မွန်းစောင့်လ "အောင်းမဆူကောခဝါလ၊ အတွိုက်သာသနာစောင့်ဖလားညော့ အောင်းဟုန်းမဆူ၊ အောင်းပရမော၊ အောင်းနောင့်စိုင်း နောင့်ဆောင်(ဝ်)မောလေ၊ အောင်းလအောင်မောလေ မောဟောင်ပေါဝေပဲ့ 30 ရာအချီန်အစောင်လ အောင်းနီးအောင်းငမ်းလေ နွိုက်ဆီမကား အချီန်ရာခနာ့လေကော့် အောင်း"အဆတ်နိစ္စထာဝရ"ဟိုင့် တနွိုက်အောင်းတဲ့တဲ့ကော့်ဝိုက်"ဆီ ဝါကော်ဝိုက်။ 31 ရာခွန်တန်းဂျေရုဆလင်ဟိုင့် စောင့်ယေရှုလ အောင်းတပဲ့ဆစ်(ပ်)ဆောင်(န်)ကော့် ဟောင့်ကော်ရောင့်(ဝ်) "အစောင် ဟောလေန ရာခွန်တန်းကွာဂျေရုဆလင်ပေးဝိုက်။ ပရောဖက်လေနာ့် အကြောင်း "လူ့သားတော်"နောင်တင့်(မ်)ဝိုက်ညော့ အောင်းကျန်လေန နောင်နယ့်ဆီ တပေးဝိုက်။ 32 ခေါင်းဆောင်ကွန်းဂျူးလေန အောင်းစမွန်း ဝမ့်ဆီ ခနောဝ်မေးကွန်းဂျူးလေမစော်လ တအပ်ဟင်းဝိုက်။ အောင်းစမွန်းအထန်တဆေးဟင်း။ တမားအောဝ်းမောဝ်းဆီ တနိစတ်ဟင်း။ အောင်းမွန်း တောင်းနမ့်လိုင်းတောင်း အောင်းပေထွီတနယ့်ခမ်။ 33 ကွန်းဟောန့်လေန အောင်းစမွန်း နောက်လောင်နော့် တတင်ဟင်း။ တအောင်း(ဝ်)သိုင်းဟင်း။ တော်နယ်ကော့် ဆမ်ဝမ်းပေါထိန့်ကော်လော့် တခွန်းပေါက်မား "ဆီ ဝါကော်ဝိုက်။ 34 တော်နယ်ကော့် တပဲ့မွန်းစောင့်လေ အောင်းခွမ်းစောင့်ယေရှု မဟုထောင်(မ်)ဟင်း။ အဓိပ္ပါယ်ခွမ်းဟိုင့်လ လောက်ဆိဉ်ဝိုက်ကော်ညော့ အောင်းစောင့်ယေရှုခဝါလ မဟုထောင်(မ်)ဟင်း။ 35 မွန်းစောင့်တောင်းတပဲ့မွန်းလေန ရာခွန်တန်းကွာ မှိန်းယေရိခေါ ရာခန့်မှိန်းထီန်ကော်လော့် ကွန်းဟွေတားမဟောန်ကော်နိမ်လ နှောင်ခန့်ဟဉ်းတန်းဆီ ရောန်းကျဉ်းဝိုက်။ 36 မွန်းန အောင်းဆိန်ကွန်းဖွန် ဖြတ်မားလေ နယ့်ဟဉ်းကော်လော့် ပေးအဟောင်းဟင်းဆီ မွန်းထန်(မ်)ကော်ဝိုက်။ 37 ကွန်းဖွန်မောင်းဖောင်လေန စားဆီမှိန်းနာဇရက် စောင့်ယေရှုဟော် ကြွမားဟင်းဆီ လောင်(ဝ်)ပြားကော်ဝိုက်။ 38 မေနယ့်လော့် မွန်းနာ့ "လုစိုင်းဒါဝိဒ်ယေရှု အောင်းကောအီနူအွန်"ဆီ စေကော်ဝိုက်။ 39 စောင့်ယေရှုတောင်း အောင်းကွာနွေ့ဟင်းလေန အောင်းစမွန်း ရိန်းစမ့်စမ့်ဟအူနူဆီ ဝါကော်ဝိုက်။ တော်နယ် မွန်းန "လုစိုင်းဒါဝိဒ် စောင့်ယေရှု အောင်းကောအီနူဟောင့်(ဝ်)အွန်ခ"ဆီ ကြမ်းကြမ်းဝါကော်ဝိုက်။ 40 ကောပ့်နယ့်ညော့ စောင့်ယေရှုလ ရပ်ဆီ အောင်းကွန်းဟွေတားမဟောန်ဟောန့် ကွာဟောင့်မားနူဆီ ဝါကော်အောင်းကွန်းမောင်းဖောင်ကော်ဝိုက်။ ကွန်းဟွေတားမဟောန်လ ထီန်စူးမားရာစောင့်ယေရှုကော်လော့် 41 စောင့်ယေရှုကော့် "ကော အောင်းစမော တနယ့်ဟေဟောင့်(ဝ်)နောင်နူး"ဆီ ထန်(မ်)ကော်ဝိုက်။ ကွန်းဟောန့်န "စောင့်၊ ကောခ ဟွေတားခဟောန်ပေါက်ဟွန်း"ဆီ ဝါကော်ဝိုက်။ 42 မေနယ့်လော့် မွန်းစောင့်လ "ဟွေတားမော နယ့်ဟောန်ကော့်။ အောင်းမောယွန်(မ်)န ရားဟောင့်(ဝ်)ရောင့်(ဝ်)ကော်အောင်းမော"ဆီ ဝါကော်ဝိုက်။ 43 ချရှ်ချန်းကော့် ဟွေတားမွန်းဟောန်ပေါက်ကော်ဝိုက်။ မွန်းကော့် တောင်းစောင့်ယေရှုတောင်း စောင်း(မ်)ကော်ဆီ ချီးမွမ်းဂုဏ်တော်စောင့်ဖလားလေကော်ဝိုက်။ ကွန်းစောင့်ဟောန်အဖြစ်ပျက်ဟိုင့်လေကော့် ချီးမွမ်းဂုဏ်တော်စောင့်ဖလားဝိုက်။ |
This translation of the TaiLaing Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.