Luke 17 - TaiLaing1 စောင့်ယေရှုလ အောင်းတပဲ့မွန်းလေ "အောင်းကွန်းလေ ဟပေါဟေအောင်းမနီးလေဆီ ကွန်းဆော်တောင်း အကြောင်းမွန်းဆော်လေန တပေးမားအောင်းတဲ့တဲ့ဝိုက်။ တော်နယ်ကော့် စောင့်ဖလားန အောင်းဟပေးအကြောင်းဟိုင့်လေန အောင်းဖောကော့်ခရောင့်(ဝ်) တဟောင့်(ဝ်)အပြစ်ဝိုက်။ 2 ဆာဆီတဟဟေအောင်းမနီး အောင်းပွန်လ အောင်းခေါမော ဆိုင်တောင်းမောတ်ဆီ တောင်းကောင့်ဟဉ်တောင်းကောပ့်ဆီ ထော်ခေါင့်(ဝ်)ခနောဝ်သမုဒ္ဒရာကော်ကိုးသကော့် ချဉ်းတနီးအွန်။ 3 ကောပ့်နယ့်ညော့ မဆူအောင်းမဆူခဟေလေ ဆတိဝိုက်ဆီဟေဟင်း။ တော်နယ် ပီစိုင်း၊ နောင့်စိုင်းမော ဟောင်ပေါဟေအပြစ်ပေါဝါလော့် အောင်းစမွန်း ဆုံးမဟောင့်(ဝ်)ကော်။ မွန်းပေါနွိုက်နောင်တကော် အောင်းအပြစ်မွန်းလေ ခွင့်လွတ်ဟောင့်(ဝ်)ကော်။ 4 ကွန်းဟောန့်န ခနေမော ဝမ်းနိမ်တောင်း အပြစ်စေဟာဟေရောင့်(ဝ်)ဆီ နွိုက်နောင်တကော်ဆီ ဟောင်ပေါဝါလော့် အောင်းမွန်း ဆက်ဆီ တနယ့်ခွင့်လွတ်"ဆီ ဝါကော်ဝိုက်။ 5 တပဲ့လေကော့် "အောင်းဟောတောင်းဟော တော်ပေါယွန်(မ်) စွယ်ဟောင့်(ဝ်)အွန်"ဆီ ဝါကော်ဝိုက်။ 6 ကောပ့်နောင်နယ့်ညော့ မွန်းစောင့်လ "ကွန်းယွန်(မ်) နောင်မက်ရောင်ကော့် အောင်းယွန်(မ်)ဟောင်ပေါရောင်းလော့် အောင်းတိန့်ရောင်ဟိုင့် ဆီမေဟတ်မွန်း ဆွဲအောက်ဆီ ခနောဝ်းပင်လယ် ဟအောက်"ဆီ ဟောင်ပေါဟောင့်(ဝ်)အမိန့်ကော်လော့် မွန်းန အောင်းအမိန့်မော နယ့်နာခမ်ဝိုက်။ 7 မောလ အောင်းခမောလေ ဆီမေတုန်နား နဲ့ပေါမစော် ရာလိမ့်ပယ်ရာ့ ပေါပေါက်မား အောင်းစမနော် ခနောဝ်ဟုန်း ခေါင့်(ဝ်)အွန်၊ ခေါင်ကျဉ်းခေါင်ဝါလေ ကျဉ်းအွန်၊ ဆို့အွန်ဆီ တဝါမစော်လေး။ 8 မစော်။ မောအောင်းတဝါ နောင်မနယ့်မစော်။ အောင်းစကော ခေါင်ကျဉ်းခေါင်ဝါလေ မဲထ။ ဟောင်ပေါရောင့်(ဝ်) ကောတကျဉ်း အောင်းတိုင်း။ ကောပေါကျဉ်းရောင့်(ဝ်)မှ မောတနယ့်ကျဉ်းဆီ တဝါ။ 9 ခမောလေကော့် အောင်းခနီးခဟေလေ မနော်ဟေညော့ အောင်းစမနော် ကျေးဇူးစနီးတမ်မလို။ ခလေကော့် ခနေစောင့် ဟေဟောင့်(ဝ်)မေကော့် တောင်းပါ့ခလေကော့် ပေးလောင်မနော်ညော့ အောင်းစစောင့်မနော် ကျေးဇူးအောင်းတတန် မစော်။ 10 မဆူကော့် နောင်နယ့်ကျဉ်းနော့် အောင်းစောင့်(ဝ်)ဝိုက်အောင်းမဆူလ ဟောင်ပေါဟေရောင့်(ဝ်) "ဟောလ ခအောင်းတော်လေမစော်။ အောင်းဟော တနယ့်ဟေလေ ဟောဟေမား"ဆီ ဝါဟင်းမေ"ဆီ ဝါကော်ဝိုက်။ 11 စောင့်ယေရှုန ရာခွန်တန်းကွာဂျေရုဆလင်ဟောန့် အောင်းမှိန်းဂါလိလဲတောင်း အောင်းမှိန်းရှမာရိ ခမ့်ဆီ ကွာကော်ဝိုက်။ 12 စောင့်ယေရှုကွာမန့်မန့်နိမ်လော့် ကွန်းပေးအနာလုန်ဟူကော့်မွန်းဆစ်(ပ်)နိမ်လ မာစူးဟင်းဆီ ရာခနာ့စောင့်ယေရှု မကောင့်မကိုင်းအင် စိန်ဆီ 13 တောင်းဆိန်အောင်းကြမ်းတောင်း "စောင့်၊ ယေရှု အောင်းစဟော အီနူဆီ ဟဟိုင်အီ့အွန်"ဆီ ဝါကော်ဝိုက်။ 14 မွန်းစောင့်လ ဟောန်အောင်းမနော်ကော်လော့် "ကွာရာပုရောဟိတ်လေဆီ အောင်းစောင့်ကော်(ဝ်)တောင်းကော်(ဝ်) ပြားဟင်းကော်"ဆီ ဝါကော်ဝိုက်။ 15 ခနောဝ်မနော်န ကော်နိမ်လ အနာရောဂါဟိုင်ကော်ဝါလ ဟုကော်လော့် အောင်းဂုဏ်တော်စောင့်ဖလား ကြမ်းကြမ်းချီးမွန်းဆီ လှည့်ပေါက်မား ပါ့မွန်းစောင့်ကော်ဝိုက်။ 16 နောက်လောင်နော့် မွန်းန ရာတောင့်(ဝ်)တဉ်းစောင့်ယေရှု ဝိုင်ဆီ အောင်းကျေးဇူးတော် ချီးမွမ်းကော်ဝိုက်။ ကွန်းဟောန့်န ပေးအမျိုးကွန်းရှမာရိဝိုက်။ 17 နောက်လောင်နော့် စောင့်ယေရှုန "ကွန်းအနာရောဂါဟိုင့်န ဟူကော့်မွန်းဆစ်(ပ်)နိမ် မစော်လေး။ အောင်းကျန်ကွန်းကောင့်(ဝ်)ကော့်ပဲ ရာထော။ 18 အောင်းဂုဏ်တော်စောင့်ဖလား ဟပေါနယ့်ချီးမွမ်း ကွန်းမှိန်းရှမာရိနဲဟော်လေး အောင်းကျန် ကွန်းလေမရောင်းကော့်လေး"ဆီ ထန်(မ်)ကော်ဝိုက်။ 19 နောက်လောင်နော့် မွန်းစောင့်န အောင်းစမွန်း "မော လုဆီကွာကော်၊ ကောပ့်မောယွန်(မ်)အောင်းကောညော့ စောင့်ဖလားန အောင်းမော အနာရောဂါလေ ဟဟိုင်မားကော်"ဆီ ဝါကော်ဝိုက်။ 20 ဝမ်းနိမ်လော့် ဖာရိရှဲကမ်ဖောင်န အောင်းစောင့်ယေရှု "သာသနာတော်စောင့်ဖလား မေနောသထီန်မား"ဆီ ထန်(မ်)ကော်လော့် စောင့်ယေရှုကော့် "သာသနာစောင့်ဖလားဝါလ တောင်းဟွေတားမဆူတောင်း အောင်းဟောန်ပဲ့မစော်။ 21 တောင်းအကြောင်းဟိုင့်တောင်း အောင်းဆိုင်န စနီးဝါအကြောင်းမရောင်း။ သာသနာတော်လ ရာဟိုင့်၊ ရာဟောန့်ဆီ မဝါပဲ့။ ဟေဟောင်းဝါလ သာသနာတော်စောင့်ဖလားန ခနောဝ်စောင်း(ဝ်)မောရောင်း"ဆီ ဝါကော်ဝိုက်။ 22 နောက်လောင်နော့် စောင့်ယေရှုဝါအောင်းတပဲ့လေန အောင်းနယ့်ထလူ့သားတော်လ အချီန်ချီန်နိမ်တထီန်မား။ တော်နယ်ကော့် မဆူအောင်းတဟောန်ပဲ့မစော်။ 23 ကွန်းလေန မွန်းန ရာဟိုင့်လူ့သားတော်ရောင်း (နယ့်ပေါမစော်) ရာဟောန့် လူ့သားတော်ရောင်းဆီ ဟောင်ပေါဝါ အောက်ခနောက်ဆီမဆူပီခါဟင်း။ 24 ဝမ်းလူ့သားတော် ကြွပေါက်မားလ တောင့်ဖတောင်းလုန်န နောင်ဖမက်ညော့ပေးဆီ တောင့်ဖန ဆီမေတောင်းဖတ်ပဲ့ တော်တောင်းဖတ်ပေါင့်ပွန့် တလိန်းဝိုက်။ 25 တော်နယ်ကော့် မွန်းန အောင်းဒုက္ခဆင်းရဲလေ တနယ့်ခမ်အောင်းတိုင်းဆီ အောင်းအမျိုးကွန်းဟိုင့်လေဝေ တနယ့်ခမ်ဝိုက်။ 26 မေခေတ်နောဧနနောင်ပေးမားအဖြစ်ပျက်လေညော့ လူ့သားတော်ဟောင်ပေါကြွမားကော့် နောင်နယ့်ကျဉ်းနော့် တပေးဝိုက်။ 27 မေခေတ်နောဧန ကွန်းလေန ကူဝမ်းကူဝမ်း ကျဉ်းဟင်းဆီ ကော့်ယဉ်းတောင်းကော့်စိုင်းလေကော့် ဟေမင်္ဂလာပွဲဟင်းဝိုက်။ နောက်လောင်နော့် ဖုန်တိုဆီနမ့်ထုမ့်ကော်လော့် မနော်တောင်းလုန်န ပျတ်ဆီန့်ကော်ဝိုက်။ 28 နောင်နယ့်ညော့ မေလတ်ထတ်လောတနကွန်းလေ ပုဟင်း၊ ခိုင်ဟင်း၊ ဆေ့ဟင်း၊ ကျဉ်းဟင်းဆီ အူနွေ့ဟင်းဝိုက်။ 29 တော်နယ်ကော့် ဆီမေ မှိန်းသောဒုံလ လောတအောက်ကော်လော့် ဆီမေနေဖ ကောင့်ဟဉ်းအောင်းဖိုင်းမိုက်လေန ချားတိုဆီ အောင်းကွန်းလေ ဟသိုင်းမားရောင့်(ဝ်)ကော်ဝိုက်။ 30 နောင်ဟိုင့်လေပေးညော့ လူ့သားတော် ဟောင်ပေါပေါ်မား နောင်နယ့်ကျဉ်းနော့် တပေးဝိုက်။ 31 မေဝမ်းနောင်နယ့်လေန ကွန်းအောင်းရောင်း ခနေခေါင်လေကော့် အောင်းရောင်းခနောဝ်ဟုန်း အဟောင်ကော့ခရောင့်(ဝ်) ပီကွာအောင်း(ဝ်)ဟင်း။ ကွန်းထီန်ခနောဝ်လောက်နားလေကော့် ပီပေါက်ဟုန်းဟင်းနော့်။ 32 ပရလောတပေးမားနောင်နူးဝါလ ဆတိနွိုက်ဟင်း။ 33 ကွန်းကယ်အဆတ်စောင့်ကော်(ဝ်)လ သသိုင်းဟင်းနော့ဝိုက်။ ကွန်းမကယ်အောင်းစောင့်ကော်(ဝ်)လ အောင်းကယ်တနယ့်ခမ်ဝိုက်။ 34 အောင်းမဆူ ကော်တဝါ။ မေခမ်ဟိုင့်လ နေရာတီနိမ်တောင်း အောင်းနွမ်းနွေ့ဟင်း ကွန်းဆောင်(န်)ကော့်လ အောင်းကွန်းယွန်(မ်)ကော်နိမ်နဲဟော် အောင်းဟောင့်နယ်ခမ်ဆီ အောင်းကော်နိမ် တဝိုင့်ဝိုက်။ 35 ဖယဉ်အောင်းတမ်းခေါင့်(ဝ်)ဆောင်(န်)ကော့်လ အောင်းကော်နိမ်နဲဟော် ဟောင့်ဆီ အောင်းကော်နိမ်လ တကျန်ဝိုက်။ 36 ကွန်းရောင်း ခနောဝ်လောက်နား ဆောင်(န်)ကော့်လ အောင်းကော့်နိမ်ဟောင့်ကော်ဆီ အောင်းကော်နိမ် တဝိုင့်ဝိုက်။ 37 မေနယ့်လော့် တပဲ့မွန်းစောင့်လေန "စောင့်၊ အောင်းဟိုင့်လေန တပေးမားနောင်နူးစောင့်"ဆီ ထန်(မ်)ကော်ဝိုက်။ မွန်းစောင့်ကော့် "ရာကွန်းသိုင်းရောင်းလ နုတ်အောင်းကျဉ်းနေ့(လင်းတ)လေ တစူးဟင်း"ဆီ လောင်(ဝ်)ပြားကော်ဝိုက်။ |
This translation of the TaiLaing Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.