Yone 1 - Setswana 1970

Jona o gana go rongwa ke Modimo. Modimo o a mo otla

¹ Lefoko la Morena le kile la tla kwa go Jona, morwa Amithai, la re:

² “Tloga ò ye kwa motseng o mogolo wa Ninife, ò o kgalemele ka thero; gonne bosula jwa bone bo tlhatlogetse fa pele ga me.”

³ Mme Jona a nanoga, a re o tshabela kwa Tharesise, a tshaba sefatlhego sa Morena; a fologela kwa Jafo, a fitlhela mokoro teng o o yang kwa Tharesise, a ntsha tuelo ya ona, a ba a o palama, a re o ya nabo kwa Tharesise go tshaba sefatlhego sa Morena.

⁴ Mme Morena a fokisa phefo e kgolo mo lewatleng; ga nna ledimo le legolo mo lewatleng, mokoro wa ba wa batla go robega.

⁵ Ke fa batsamaisi ba mokoro ba boifa, mongwe le mongwe a goela kwa modimong wa gagwe; ba latlhela dithoto tse di mo mokorong mo lewatleng go imolola mokoro gore o tlhofofale. Jona ene o ne a fologetse mo teng ga mokoro kwa tlase, a robetse, a thulametse.

⁶ Mme molaodi wa mokoro a mo atamela, a mo raya a re: “O robaletse eng? Tsoga o rapele Modimo wa gago! Ka gongwe Modimo wa gago o ka re gopola gore re se nyelele.”

⁷ Mme ba raana ba re: “Tlaang a re tlhameng tengwa, re tle re itse gore re dirafalelwa ke bosula jo ka ntlha ya ga mang?” Jaanong ya re ba tlhama tengwa, tengwa ya supa Jona.

⁸ Ke fa ba mo raya ba re: “A ko ò re bolelele gore tlalelo e e re dirafaletsa ka ntlha mang? Tiro ya gago ke eng? O tswa kae? Lefatshe la ga eno le kwa kae? O mokae, wena?”

⁹ A ba araba a re: “Ke Mohebere, ke boifa Morena, Modimo wa legodimo, o o dirileng lewatle le lefatshe.”

¹⁰ Ke fa banna ba boifa segolo thata, ba mo raya ba re: “Ke eng se ò se dirileng?” Gonne ba ne ba itse gore o tshabile sefatlhego sa Morena, ka a ba boleletse.

¹¹ Ba be ba mmotsa ba re: “Re dire eng ka wena gore lewatle le kokobele mo tikologong ya rona?” Gonne lewatle le ne le ntse le huduegela pele.

¹² Ke fa a ba raya a re: “Ntseeng lo ntigele mo lewatleng; foo lewatle le tla kokobela mo tikologong ya lona. Gonne ke a itse gore ledimo le legolo le, le lo tletse ka ntlha ya me.”

¹³ Mme banna ba hudua gore ba busetse mokoro kwa lefatsheng, fela ba palelwa; gonne lewatle le ne le ntse le huduegela pele, le tlhabaganye le bone.

¹⁴ Ke fa ba rapela Morena ba re: “Ao, Morena, a re se ka ra nyelela ka ntlha ya bophelo jwa monna yo! O se ka wa re bona molato wa re, re bolaile motho yo o se nang molato! Gonne wena Morena ò dirile ka fa ò kgatlhegang ka teng.”

¹⁵ Jaanong ba tsaya Jona, ba mo latlhela mo lewatleng. Ke fa go suma ga lone go khutla.

¹⁶ Mme banna bao ba boifa Morena segolo thata, ba tlhabela Morena setlhabelo, ba ikana maikano.

¹⁷ Mme Morena a roma tlhapi e kgolo gore e metse Jona. Mme Jona a nna mo mpeng ya tlhapi malatsi a le mararo le masigo a le mararo.