Yobe 9 - Setswana 1970

Jobe o a araba

¹ Jobe a fetola a re:

² “Ke nnete. Ke a itse gore go ntse jalo. Motho o ka nna jang mosiami fa pele ga Modimo?

³ Fa a rata go ganetsanya naô, a ka palelwa le ke go o araba potso e le nngwe fela mo go di le sekete.

⁴ Modimo o pelo-e-botlhale, o thata nonofong. Ke mang yo o kileng a o ganetsa, a se ka a bona petso?

⁵ Dithaba o a di sutisa, go sa lemogiwe; o di ribegetsa ka bogale jwa ona.

⁶ Lefatshe o a le roromisa, le tswe mo felong ga lone; maotwana a lone a be a reketle.

⁷ Letsatsi o a le laela, mme le se ke le tlhabe; dinaledi o a di bipa, di se ke di bonale.

⁸ Legodimo o le tsharolola o le osi, o gate mo godimo ga dintelo tsa lewatle.

⁹ O dirile dinaledi tsa ‘Bere e kgolo’ le tsa ‘Dikolobe’ le tsa ‘Selemela’ le tsa ‘Sefapaano’ kwa ntlheng ya borwa.

¹⁰ O dira tse dikgolo tse di se nang botlhotlhomiso le dikgakgamatso tse di se nang palo.

¹¹ Bonang! O a mpheta, ke sa o bone; o a tlhaga, ke sa o lemoge.

¹² Bonang, fa o amoga, o ka thibelwa ke mang? Ke mang yo o ka o botsang a re: ‘O dira eng?’

¹³ Modimo ga o buse bogale jwa ona; bathusi ba kgogela tlholegong ba ne ba o ikokobeletsa.

¹⁴ Jaanong nna ke mang yo nka o fetolang? Nka tlhopha jang mafoko a a o tshwanetseng?

¹⁵ Le fa nka bo ke le yo o siameng, ga ke na go o araba. Ke na le go kopa bopelotlhomogi mo go Moatlhodi wa me.

¹⁶ Fa ke o bitsa, o sa nkarabe, ga ke dumele gore o tla reetsa lentswe la me.

¹⁷ Kana o ka mpšhwetla ka ledimo, wa ntsifatsa dintho tsa me ka bomo.

¹⁸ Ga o ke o mpha nako ya go ka busa mowa, mme o nkgorisa matlhoko a a galakang.

¹⁹ Fa go lebilwe thata ya yo o tiileng, ona o na nayo. Fa go lebilwe tshiamo, ke mang yo o ka biletsang ona tshekong?

²⁰ Le fa nka bo ke le yo o siameng, molomo wa me o ka bo o nkatlhola ke le moikepi; le fa ke se na molato, ona o ka mpona molato.

²¹ Ga ke na molato! Mme ga ke tlhole ke ikitse. Bophelo jwa me ke a bo nyatsa.

²² Go tshwana fela! Ke ka moo ke reng: Ona o fedisa mosiami jaaka moikepi.

²³ Fa kotlo ya Modimo e bolaya ka tshoganyetso, o tshege tsholofologo ya ba ba se nang molato.

²⁴ Lefatshe o le neetse mo diatleng tsa moikepi; o bipa difatlhego tsa baatlhodi ba lone. Fa e se ona, go dira mang?

²⁵ Malatsi a me a fetile ka lobelo lwa go sia motabogi; a tshabile a ise a bone tse di molemo.

²⁶ A ile ka bobebe jwa mekoro ya lotlhaka jaaka fa lenong le fologela kwa dijong.

²⁷ Fa nka re: ‘A nke ke lebale selelo sa me, ke fetoge sefatlhego se se tlhontseng, e nne se se thabileng;’

²⁸ ke gona ke tshogang matlhoko a me otlhe. Ke a itse gore ga o nke o nkaya yo o se nang molato.

²⁹ Ke tshwanetse ka bo ke le molato. Ke itapisa felafela ka lebaka la eng?

³⁰ Le fa ke le yo o tlhapang ka semathana; le fa ke tlhapa diatla ka molora:

³¹ Wena o tla ntatlhela seretseng gore ke tene diaparo tsa me.

³² Gonne ona ga se motho ka nna yo nka mo fetolang, yo nka yang nae kwa tshekong.

³³ Ga go motsereganyi fa gare ga rona yo o ka bayang seatla sa gagwe mo go ona le mo go nna.

³⁴ A o tlose thupa ya ona mo go nna! Theregiso ya ona a e se ka ya ntshosa!

³⁵ Foo nka bo ke bua, ke sa o boife; kana maikutlo a me a tletse poifo.