Yobe 8 - Setswana 1970

Go bua Biletate

¹ Ga fetola Biletate wa Sua a re:

² “O tla khutla leng go bua tse di ntseng jalo, mafoko a molomo wa gago e ntse e le phefo e kgolo fela?

³ A Modimo o ka kgopamisa katlholo? Gongwe a Mong-wa-thata-yotlhe o ka sokamisa tshiamo?

⁴ Fa bana ba gago ba ne ba mo leofetse, a ba neela mo petsong ya boleo jwa bone.

⁵ Mme fa wena o batla Modimo, o kopa bopelotlhomogi mo go Mong-wa-thata-yotlhe

⁶ fa o se na molato, o le yo o siameng: Ee, foo o tla go ngoka gape, a go busetsa tlhogonolo ya lapa la gago.

⁷ Foo tlhogonolo ya ntlha ya gago e tla bonala, e ne e le nnyane, mme tlhogonolo ya morago e tla nna e kgolo thata.

⁸ Ee, a ko o botse batho ba kgale, o ele tlhoko se borraabo ba se tlhotlhomisitseng!

⁹ Gonne rona re ba maabane, ga re itse sepe; malatsi a rona fatsheng ke moriti fela.

¹⁰ A ga ke re, bone ba tla go ruta, ba go bolelela, ba go ntshetsa mafoko ka fa kitsong ya dipelo tsa bone?

¹¹ Ba re: A lotlhaka lo ka gola fa go se nang bokgola? A motlhatlha o ka gola, o se na metsi?

¹² Fa e le gona lo tlhogang, lo ise lo butswe go ka segwa, lo tla swaba pele ga bojang jotlhe.

¹³ Ke yona tsela ya botlhe ba ba lebalang Modimo, mme tsholofelo ya moikepi e a nyelela.

¹⁴ O ikgantsha ka tse di nyelelang; tse a di ikanyang ke bobi jwa segokgo fela.

¹⁵ O ikaega ka ntlo ya gagwe, mme ga e nke e ema; o itshwarelela mo go yona, mme ga se e e tlhomameng.

¹⁶ O gola sentle a tletse matute, le fa go le letsatsi; matlhogela a gagwe a farafara tshimo ya gagwe.

¹⁷ Medi ya gagwe e raraana mo mokoeng wa matlapa; e itshwarelela mo gare ga mafika.

¹⁸ Mme fa a kumolwa mo felong ga gagwe, gona go tla mo latola go re: ‘Ga ke ise nke ke go bone.’

¹⁹ Bona, ke jona boitumelo jwa bophelo jwa gagwe, mme yo mongwe o tla tlhoga loroleng.

²⁰ Bona, Jobe! Modimo ga o latlhe yo o o boifang, mme ga o eme basenyi nokeng.

²¹ Molomo wa gago o tla o tlatsa setshego gape le legano la gago tuduetso.

²² Ba ba go tlhoileng ba tla apara tsa ditlhong; lelapa la baikepi ga le nke le tlhola le nna teng.”