Yobe 6 - Setswana 1970

Jobe o a araba

¹ Jobe ene a fetola a re:

² “Ao! Botlhoko jwa me bo ka bo bo elwa sentle. Ba ka bo ba baya tatlhego ya me yotlhe mo selekanyetsong.

³ Kana foo e ka bo e le makete bogolo go motlhaba wa lewatle; ke ka moo ke gakiwang ke puo.

⁴ Gonne metsu ya Mong-wa-thata-yotlhe e tsepame mo go nna, e botlhole jwa yona bo nowang ke mowa wa me. Ditheregiso tsa Modimo di a ntlhasela.

⁵ A esele ya naga e ka lela e ntse e na le mafulo? Gongwe a kgomo e ka lela e ntse e jesiwa?

⁶ A go jewa dijo tse di sa baloleng tse di sa lokwang? Gongwe a bosweu jwa lee bo na le monate?

⁷ Tse mowa wa me o ganang go di ama di tshwana le dijo tse di ntenang.

⁸ Ntlha nka bo ke tlelwa ke tse ke di batlang; Modimo wa nnaya tse ke di lelelang!

⁹ Ao! Modimo e kete o ka bo o kgatlhwa ke go mpšhwetla. A o otlolole letsogo, o nkgaole!

¹⁰ Foo nka bo ke sa ntse ke na le kgomotso; nka bo ke ipela ke le botlhokong jo bo se nang thekegelo. Gonne ga ke a itatola mafoko a Moitshepi.

¹¹ Ke eng se se ka nthatafatsang gore ke itshoke? Ke kae kwa nka isiwang teng gore ke se fele pelo?

¹² A thata ya me ke thata ya lefika? A mmele wa me ke wa tshipi?

¹³ Nnyaya! Ga ke na go thusiwa ka sepe! Pholoso e lelekilwe mo go nna.

¹⁴ Moitlhobogi o tshwanetswe ke lorato lwa mongwe-ka-ene, le fa a latlha go boifa Mong-wa-thata-yotlhe.

¹⁵ Bomorwa-rre ba ntshwabisitse jaaka noka le jaaka meedi ya dinoka e e fetang ka pele,

¹⁶ e e leng e mentsho ka dikgapetla, e semathana se iphitlhang mo go yona.

¹⁷ E a re e fisiwa ke letsatsi, e nyelele; e re go le bolelo, e kgale mafelong a yona.

¹⁸ Masomo a baeti a fapoga mo tseleng ya ona, a ya sekakeng, a latlhega.

¹⁹ Masomo a baeti ba Thema a tlhola metsi; makoko a baeti ba Šeba a ikanya metsi.

²⁰ Mme tsholofelo ya bone e tlhabisiwa ditlhong; ba fitlha teng ba a swaba.

²¹ Jaanong lo ntshwabisitse fela jalo; lo bona therego, mme lo a boifa.

²² A nkile ka re: Mpheng, lo ntefele ka di-tsa-lona,

²³ lo mpholose mo diatleng tsa mmaba, lo nthekolole mo diatleng tsa barena ba ba peloethata?

²⁴ Nthuteng, ke tla didimala; lo ntemose fa ke fositseng teng!

²⁵ Mafoko a nnete a na le thata ruri, mme go kgalema ga lona go kgona eng?

²⁶ A lo rata go kgalemela mafoko fela, mme lo tseisa mafoko a mosolofologi phefo?

²⁷ Ee, lesiela le lone lo ka le tlhamela tengwa, lwa bapatsa tsala ya lona.

²⁸ Mme jaanong, a lo ko lo ntebe! Ruri, ga nkitla ke lo aketsa re lebaganye!

²⁹ Boang tlhe, a go se dirwe ka tshiamololo! Boang, go fa ke sa ntse ke le mo nneteng.

³⁰ A go na le tshiamololo mo lolemeng lwa me? Gongwe a magalapa a me ga a lemoge tse di isang mo tatlhegong?