Yobe 41 - Setswana 1970

¹ “A o ka goga kwena ka kobe le go gatelela loleme lwa yona ka lodi?

² A o ka tsenya mogala wa motlhatlha mo nkong ya yona? A o ka e phunya lesama ka kobe?

³ A e ka go kokotlela thata? Gongwe e bua nao ka boleta?

⁴ A e ka dira kgolagano nao gore o e tshole, e nne motlhanka wa gago ka metlha yotlhe?

⁵ A o ka tshameka nayo jaaka e kete ke nonyane? A o ka e golegela basetsana ba gago?

⁶ A batshwari ba ditlhapi ba ka e bapatsa ba e kgaoganyetsa barekisi?

⁷ A o ka tsepamisa marumo mo letlalong la yona gongwe dikobe tsa ditlhapi mo tlhogong ya yona?

⁸ Baya seatla sa gago mo go yona! O gopole tlhabano! Ga o kitla o dira gape.

⁹ Bona, tsholofelo ya go e tshwara e a aketsa; motho o tla wa fela, fa a e bona.

¹⁰ Ga go na ope yo o pelokgale go ka e rumola! Jaanong yo o ka emelanang le nna ke mang?

¹¹ Ke mang yo o kileng a nnaya sengwe, yo ke ka mmusetsang? Kana tse di fa tlase ga legodimo lotlhe ke tsa me.

¹² Ga nkitla ke didimala ka ga ditokololo tsa yona; ke raya dithata tsa kwena le bontle jwa popego ya yona.

¹³ Ke mang yo o ka e apolang letlalo? Ke mang yo o ka tsenang mo gare ga metlhagare e mebedi ya yona e ntse e utlwa?

¹⁴ Ke mang yo o ka bulang kgoro ya legano la yona? Meno a yona a boitshega ka ntlha tsotlhe.

¹⁵ Mokokotlo wa yona ke methalo ya dithebe tsa makape; a tshwaragantswe ka sekano se se tiileng.

¹⁶ Lengwe le pataganye le le lengwe; ga go tsene phefo mo gare ga ona.

¹⁷ Makape a ngaparelanye a lomaganye; ga a ka ke a patologana.

¹⁸ Go ethimola ga yona go phatsimisa lesedi; dintshi tsa matlho a yona di tshwana le mahube.

¹⁹ Mo leganong la yona go tswa dirumola; go tswa ditlhase tsa molelo.

²⁰ Dinko tsa yona di kua musi jaaka pitsa e e bedisiwang ka molelo wa metlhatlha.

²¹ Pudulo ya yona e tukisa magala. Kgabo ya molelo e tswa mo leganong la yona.

²² Thata e mo thamong ya yona; poitshego e e etelela pele.

²³ Matlhakore a mmele wa yona a ngaparelanye a tiile mo go yona; ga a tshikinyege.

²⁴ Pelo ya yona e thata jaaka lefika; e tiile jaaka lelwala.

²⁵ Fa e tsoga, go boifa dinatla, di tlhakane tlhogo ka go rerega.

²⁶ Le fa motho a e rema ka tšhaka, tšhaka ga e kgone sepe, le fa e le lerumo gongwe motsu gongwe selepe.

²⁷ Kwena e kaya tshipi bojang fela; kgotlho e e kaya dikgong tse di bodileng.

²⁸ Motsu ga o ka ke wa e tshabisa; mafika a seragamajwe ke dirite mo go yona.

²⁹ Molamu e o kaya dirite fela; e tshega mosumo wa lerumo.

³⁰ Ka fa tlase e na le matlape a a bogale; e tlogela metlhala mo lorageng jaaka selei se se phothang.

³¹ E bedisa bodiba jaaka pitsa; e hudua letsha jaaka go huduiwa pitsana ya ditlhare.

³² E phatsimisa metsi fa morago ga yona; motlhala wa yona o tshwana le moriri o mmududu.

³³ Mo lefatsheng ga go na selekane sa yona; e bopetswe go se boife.

³⁴ E lebile tsotlhe tse dikgolo e sa boife, ka yona e le kgosi ya dibata tsotlhe tse di mabela.”