Yobe 4 - Setswana 1970

Puisanyo ya ntlha Go bua Elifase

¹ Ke fa Elifase wa Themane a fetola a re:

² “A fa motho a leka go bua le wena, o tla kgopisega? Fela ke mang yo o ka kgonang go ithiba go bua?

³ Kana ke wena o rutileng ba bantsi, wa tiisa diatla tse di repileng.

⁴ Yo o kgopiwang, mafoko a gago a mo tsositse, wa nonotsha mangole a a kgwetlhang.

⁵ Mme fa jaanong di wela wena, o nyema moko; fa di ama wena, o a tshoga.

⁶ Poifo-Modimo ya gago a ga o e ikanye? Tsamao ya gago e e siameng a ga o e solofele?

⁷ A ko o akanye: Ke mang yo o latlhegileng a se na molato? Ke bafe basiami ba ba nyeleditsweng?

⁸ Ka fa ke bonyeng ka teng: Ba ba lemang boikepo le ba ba jwalang tatlhego ba roba tsona tseo.

⁹ Ba latlhega ka pudulo ya Modimo; ba felelela ka phefo ya bogale jwa ona.

¹⁰ Go duma ga tau le go rora ga tawana go a khutla; meno a ditawana a robegile.

¹¹ Tau e kgolo e a swa, fa e se na thopo; bana ba tau e namagadi ba a phatlalala.

¹² Lefoko le ntletse sephiring; tsebe ya me ya utlwa go sebasebelwa ga lone.

¹³ E rile ke akanya dipono tsa bosigo, fa batho ba tshwerwe ke boroko jo bogolo,

¹⁴ therego ya nkwela le go tetesela, ya roromisa marapo a me otlhe.

¹⁵ Ke fa mowa o feta fa pele ga me, mmele wa me wa tlhonya.

¹⁶ Wa ba wa ema, ke sa lemoge ponalo ya ona, mme e le sebopego sa mongwe yo o fa pele ga me; ka utlwa go sebaseba ga lentswe le le reng:

¹⁷ ‘A motho o siame fa pele ga Modimo? Gongwe a monna o itshekile fa pele ga Mmopi wa gagwe?

¹⁸ Bonang, ga o ikanye batlhanka ba ona; baengele ba ona o ba tshwaya phoso.

¹⁹ Bogolo jang bone ba ba agileng mo matlong a letsopa, ba tlholego ya bone e leng mo loroleng, ba ba pšhwetlwang jaaka motoutwana?

²⁰ Le tlhaba ba le gona, le phirima ba remagantswe; ba latlhega ka bosakhutleng, ba sa tlhokomelwe ke ope.

²¹ A ga ke re, fa dimapo tsa tente ya bone di somolwa, ba a swa, ba se na botlhale?’