Yobe 38 - Setswana 1970

¹ Ke fa Morena a fetola Jobe a le mo ledimong a re:

² “Ke mang yo o fifatsang maikaelelo a me ka dipolelo tse di se nang kitso?

³ A ko o itlame letheka jaaka monna! Ke tla go botsa, o nthute!

⁴ E rile ke thaya lefatshe, wa bo o le kae? Bolela, fa o na le kitso!

⁵ Ke mang yo o beileng ditekanyo tsa lone? – Kana o a itse! – Gongwe ke mang yo o neng a gagamatsa mogala o o le anyang mo go lone?

⁶ Metheo ya lone e tsentswe mo go eng? Ke mang yo o beileng lentswe la sekhutlo la lone

⁷ mogang dinaledi tsa masa di duduetsang mmogo, fa baengele botlhe ba tlhaba mokgosi wa boitumelo?

⁸ Ke mang yo o tswaletseng lewatle ka ditswalo, fa le phašametsega le tswa mo felong ga lone,

⁹ fa ke dira maru diaparo tsa lone le lefifi le lentsho lesela la lone?

¹⁰ Motlhang ke le beelang molelwane wa lone, fa ke le direla losi le ditswalo,

¹¹ ka re: ‘O ka tla go fitlha fano, mme e seng go feta; boikgogomoso jwa dintelo tsa gago bo na le go kokobela fa!’

¹² A o setse o kile wa laola moso ka lengwe la malatsi a gago? A o kile wa itsise mahube felo ga ona

¹³ gore a tshware dikhutlo tsa lefatshe, mme baikepi ba tlhotlhorwe mo go lone?

¹⁴ Gore le fetoge jaaka mmopa fa tlase ga sekano, mme dilo tsotlhe di bonale sentle, di senoge jaaka seaparo?

¹⁵ Gore baikepi ba timiwe lesedi la bone, mme letswele le le tsholetsegileng le robiwe?

¹⁶ A o kile wa ya kwa metsweding ya lewatle, wa itsamaela kwa tlasetlase ga madiba a lone?

¹⁷ A o kile wa bulelwa dikgoro tsa loso? A o kile wa bona dikgoro tsa lefifi le le kwenneng?

¹⁸ A o lemogile bophara jwa lefatshe? Bolela, fa o itse tsotlhe tseo!

¹⁹ Tsela e kae e e yang kwa lesedi le nnang teng? Le felo ga lefifi go kwa kae?

²⁰ Mo o ka di isang kwa teng ga melelwane ya tsona, mo o itseng ditsela tse di yang kwa matlong a tsona.

²¹ Legale o a itse! Kana o tsetswe ka metlha ele; palo ya malatsi a gago e kgolo!

²² A o kile wa fitlha kwa polokelong ya semathana? A o kile wa bona polokelo ya sefako

²³ tse di boloketseng sebaka sa tlalelo le letsatsi la ntwa le la tlhabano?

²⁴ Tsela e kae e e yang kwa lesedi le abelwang teng, kwa phefo ya botlhabatsatsi e tsogang teng go ralala lefatshe?

²⁵ Ke mang yo o epileng melapo ya dipula tse dikgolo, a dira tsela ya logadima lwa maru,

²⁶ e le go nesa pula mo lefatsheng le le se nang motho, le mo sekakeng kwa go sa nneng batho teng;

²⁷ e le go nosetsa naga e e omileng le e e senya, e le go tlhogisa bojang jo bošwa mo nageng?

²⁸ A pula e na le rraayo? Gongwe marothodi a monyo a tsalwa ke mang?

²⁹ Dikgapetla mmaa-tsona ke mang, le kgogotshwane ya legodimo ke mang yo o e belegeng,

³⁰ fa metsi a thatafala, a nna jaaka matlapa, fa sefatlhego sa bodiba se nyele dikgapetla?

³¹ A wena o ka bofaganya Selemela, gongwe a o ka bofolola dithapo tsa Dikolobe?

³² A o ka bolotsa dinaledi ka go latelana ga tsona mo ngwageng? A o ka tsamaisa dinaledi tsa Bere e kgolo le tsa Bere e nnyane?

³³ A o itse melao ya legodimo? A o le laodisa mo lefatsheng?

³⁴ A o ka tsholeletsa lentswe kwa marung gore morwalela wa metsi o go khurumetse?

³⁵ A o ka roma dikgadima gore di bolole di go ree di re: ‘Re fano’?

³⁶ Ke mang yo o beileng botlhale mo marung? Ke mang yo o neileng dilo tsa loapi tlhaloganyo?

³⁷ Ke mang yo o balang maru ka botlhale? Ke mang yo o tshololang makuka a legodimo,

³⁸ fa lerole le fetoga seretse, fa makote a ngaparelana?

³⁹ A o tsomela tau e namagadi phologolo gongwe a o kgorisa ditawana,

⁴⁰ fa di ratela marobalo, fa di di lalela mo sekhung?

⁴¹ Ke mang yo o baakanyetsang legakabe dijo, fa mamphorwana a lone a lelela Modimong, fa a kgarakgatshega ka go tlhoka dijo?