Yobe 37 - Setswana 1970

¹ “Ee, pelo ya me e tshosiwa ke tseo, e tsiboga mo felong ga yona.

² Utlwang lo reetse loratla lwa lentswe la ona le tumo e e tswang mo molomong wa ona.

³ O e utlwatsa fa tlase ga legodimo lotlhe, o bonatsa logadima lwa ona kwa mafelelong a lefatshe.

⁴ Lo latelwa ke go duma ga maru; o dume ka kodu ya borena jwa ona; mme ga o thibele dikgadima, fa kodu ya ona e utlwala.

⁵ Modimo o duma ka kodu ya ona mo go gakgamatsang; o dira tse dikgolo tse re sa di tlhaloganyeng;

⁶ gonne o raya semathana o re: ‘Wela fa fatshe!’ Le pula ya leebana le ya medupe le dipula tsa thata ya ona o di raya o re jalo.

⁷ O hunyetsa diatla tsa batho botlhe mariga gore batho botlhe ba lemoge ditiro tsa ona.

⁸ Foo diphologolo di tsene mo maiphitlhong a tsona, di nne mo marobalelong a tsona.

⁹ Ledimo le tle le tswa mo ntlong ya lone; diphefo tse di phatlalatsang maru di tlise serame.

¹⁰ Pudulo e e maruru ya Modimo e bope dikgapetla; metsi a a atlhameng a thatafale ka serame.

¹¹ O imetsa maru ka metsi, o bo o a phatlalatse, a ntshe dikgadima tsa ona.

¹² A tsamaisiwa kwa le kwa ka fa taolong ya ona gore a dire ditiro tsotlhe tse o di a laetseng mo tikologong ya lefatshe.

¹³ Fa o a tlisetsa lefatshe la ona, e ka nna kotlo gongwe tshegofatso.

¹⁴ Wena Jobe, sekegela tseo tsebe; iketle, o tlo o tlhaloganye dikgakgamatso tsa Modimo.

¹⁵ A o itse ka fa Modimo o di laolang ka teng, fa o gadimisa tladi ya maru a ona?

¹⁶ A o tlhaloganya se se tsholeditseng maru le dikgakgamatso tsa yo o kitso e e tletseng?

¹⁷ Wena yo diaparo tsa gago di nnang bolelo, fa go foka phefo e e bolelo ya borwa mo lefatsheng:

¹⁸ A wena o ka tsharolola loapi nao lo lo tiileng jaaka seiponi sa tshipi?

¹⁹ Re itsise se re ka se buang nao; ga re ka ke ra rulaganya puo epe ka ntlha ya lefifi.

²⁰ A ona o ka tewa ga twe: ‘Didimala, ke bue’? Gongwe a motho o kile a re: ‘Ke rata go nyelediwa’?

²¹ Le gona jalo go a pala go ka leba lesedi la letsatsi, fa le phatsima kwa legodimong, fa phefo e sena go feta le go le anosa.

²² Gouta e e phatsimang e tswa kwa bokone, mme kgalalelo e e boitshegang Modimo o mo go yona.

²³ Mong-wa-thata-yotlhe ga re mmone; o mogolo ka thata, o humile tshiamo; ga a ka ke a sokamisa tshiamo.

²⁴ Ka moo batho ba tshwanetse go mmoifa. Ga a re sepe ka botlhe ba ba ikayang matlhale.”