Yobe 36 - Setswana 1970

¹ Elihu a tswelela pele a re:

² “Iketle go le gonnye, ke tla go ruta; gonne mafoko a sa ntse a le teng a go emela Modimo.

³ Kitso ya me ke rata go e tsaya kwa kgakala le go supa gore Mmopi wa me ke yo o mo nneteng.

⁴ Gonne ruri, mafoko a me ga se a maaka; monna wa kitso e e tletseng o bua nao.

⁵ Bona, Modimo o mogolo, mme ga o tlhokomologe sepe; ke ona senatla ka thata le ka tlhaloganyo.

⁶ Ga o boloke maphelo a baikepi, mme o siamisetsa ba ba bogisegang.

⁷ Ga o fapose matlho a ona mo basiaming, mme o ba nnisa le dikgosi mo ditulong tsa tsona ka metlha; ba godisiwa jalo.

⁸ Mme fa ba bofilwe ka dikeetane, fa ba tshwerwe ka dikgole tsa matlhoko,

⁹ foo o ba supetsa ditiro tsa bone le maleo a bone, fa ba ne ba ikgodisa,

¹⁰ foo o bulela kgalemelo ditsebe tsa bone, o ba laola gore ba boe mo boikepong.

¹¹ Jaanong fa ba o utlwa le go o ineela, ba tla tlhola malatsi a bone ba le tlhogonolo; ba dika dinyaga tsa bone di le monate.

¹² Mme fa ba sa utlwe, ba tla nyelela ka lerumo ba tla swa ba se na kitso.

¹³ Ba ba pelo-di-bolotsana ba ngala fela; ga ba goele thuso, fa Modimo o ba golegile.

¹⁴ Mewa ya bone e tshwanetse go swa ba sa le bašwa; maphelo a bone a na le go fela jaaka a banna ba medimo ya boaka.

¹⁵ Mme o tla pholosa mmogisegi ka tlalelo ya gagwe; o mo thibolola ditsebe ka pitlaganyo.

¹⁶ Le wena o go bitsa gore o tswe mo leganong la tlalelo; o go biletsa felong fa go atlhameng, fa go se nang pitlaganyo, le mo monateng wa dijo tse di mafura tsa lojelo lwa gago.

¹⁷ Mme katlholo e e welang moikepi e go wetse ka botlalo; tshekiso le katlholo di go tshwere.

¹⁸ A bogale bo se ka jwa go raela go ka kgala Modimo! A bogolo jwa serekololo bo se ka jwa go timetsa!

¹⁹ A Modimo o ka ruta motho go goela thuso kwa ntle ga tlalelo le kwa ntle ga tsotlhe tse di rapedisang motho thata?

²⁰ Se tlhologelelwe bosigo jwa tshekiso, jo bo tlosang merafe mo mannong a yona!

²¹ Itise, o se fapogele boikepong; gonne o bo rata bogolo go boitshoko.

²² Bona, Modimo o itshupa o le mogolo ka thata ya ona. Ke mang yo e leng moruti jaaka ona?

²³ Ke mang yo o ka o laelang tsela ya ona; ke mang yo o ka o rayang a re: ‘O dirile tshiamololo’?

²⁴ Se lebale go godisa tiro ya ona e batho ba e tumisitseng ka difela.

²⁵ Batho botlhe ba e bona ba itumetse; motho o e leba a le kgakala.

²⁶ Bona, Modimo o mogolo, mme ga re o itse; palo ya dinyaga tsa ona ga e tlhotlhomisiwe.

²⁷ Gonne o atametsa marothodi a metsi, o a rothisa e le pula e e tswang mo mouwaneng wa ona.

²⁸ Maru a a e rothisa, a e nesetsa batho ba bantsi.

²⁹ Jaanong e ka nna mang yo o ka tlhaloganyang go thiba ga maru le tumo ya boago jwa ona?

³⁰ Bonang, o phutholola lesedi la ona mo tikologong ya ona, o khurumetsa mateng a lewatle.

³¹ Ee, o atlhola merafe ka dilo tseo, e bile o e naya letlotlo la dijo ka tsona.

³² Ditladi o di tshwere ka diatla, o di romela go lwa le motlhasedi.

³³ Tumo ya ona e a o bega; ee, le letsomane le supa ka ga yo o tlang.