Yobe 35 - Setswana 1970

¹ Elihu a simolola gape go bua a re:

² “A ò se kaya se se siameng, a ò a re ke tshiamo ya gago fa pele ga Modimo

³ fa ò re: ‘Go nthusa eng, go ntirela eng, fa ke sa leofe?’

⁴ Nna ke tla go fetola ka mafoko le ditsala tsa gago nao.

⁵ Lelala kwa legodimong o bone; leba maru a a kwa godimo ga gago!

⁶ Fa ò leofa, ona ò ka o senyetsa eng? Fa maleo a gago a le mantsi, ona ò ka o direla bosula bofe?

⁷ Fa ò siame, ò o naya eng? Gongwe Modimo o tla amogela eng mo seatleng sa gago?

⁸ Boikepo jwa gago bo senyetsa motho ka wena; tshiamo ya gago e thusa mongwe-ka-wena.

⁹ Batho ba lela ka ntlha ya bontsi jwa dikgatelelo; ba goela thuso ka ntlha ya mabogo a ba ba thata.

¹⁰ Mme ga ba botse go re: ‘Modimo, Mmopi wa rona o kae o o nayang batho difela tsa tebogo bosigo,

¹¹ o o re rutang bogolo go diphologolo tsa lefatshe, o o re tlhalefisang bogolo go dinonyane tsa loapi?’

¹² Se bao, ba goela thuso, mme ga o ba utlwe ka ntlha ya boikgantsho jwa bone ba ba bosula.

¹³ Ruri, Modimo ga o utlwe dilelo tsa boithamako; Mong-wa-thata-yotlhe ga a di ele tlhoko.

¹⁴ Bogolo jang, fa ò re: ‘Ga ò o bone! Kgang e fa pele ga ona, o lete.’

¹⁵ Mme jaanong e re ka bogale jwa ona bo sa otle, ka o sa tlhokomele thata tse di boatla,

¹⁶ Jobe o tumolola molomo go bua tsa boithamako; o bua tse dintsi a se na kitso.”