Yobe 34 - Setswana 1970

¹ Elihu a simolola gape go bua a re:

² “Utlwang mafoko a me, lona batlhalefi! Ntshekegeleng ditsebe ba lo nang le kitso!

³ Gonne tsebe e tlhatlhoba mafoko jaaka magalapa a utlwa dijo.

⁴ A re itlhopheleng tse di siameng, re gakololane tse di molemo.

⁵ Gonne Jobe a re: ‘Ke siame, mme Modimo o nkamogile tse di ntshwanetseng.

⁶ Le fa ke siame, ke tshwanetse go nna moaki. Ntho ya me ya motsu ke e e sa foleng, le fa ke se na molato.’

⁷ Monna yo o tshwanang le Jobe o kae yo o nwang dikgalo jaaka metsi,

⁸ yo o tsalanang le badiradibe, a goga le banna ba boikepo?

⁹ Gonne o rile: ‘Ga go thuse motho sepe, fa a rata Modimo.’

¹⁰ Ka moo, ntheetseng, lona banna ba botlhale! Modimo o kgakala le bokgopo; Mong-wa-thata-yotlhe o kgakala le tshiamololo.

¹¹ Nnyaya, o tla duela motho ka fa tirong ya gagwe; o tla dirafaletsa mongwe le mongwe tse di lebanyeng tsamao ya gagwe.

¹² Nnyaya, ruri, Modimo ga o dire tshiamololo. Mong-wa-thata-yotlhe ga a sokamise tshiamo.

¹³ Ke mang yo o mo neetseng go laola lefatshe; le tikologo yotlhe ya lone, ke mang yo o e theileng?

¹⁴ Fa Modimo o ka itlhokomela fela, fa o ka busetsa Mowa wa ona le pudulo ya ona kwa go ona,

¹⁵ foo nama yotlhe e tla swa ka nako e le nngwe fela; motho o tla boela leroleng.

¹⁶ Fa o na le tlhaloganyo, nkutlwelele, o sekegele lentswe la mafoko a me tsebe.

¹⁷ Kana yo o tlhoileng tshiamo o ka busa jang? Gongwe yo o tshiamo le thata, a wena o ka mmona molato?

¹⁸ Ene yo o ka rayang kgosi a re: ‘Ga o wa sepe,’ le dikgosana a re: ‘Lo baikepi!’

¹⁹ Ene yo o sa gobeleleleng batlotlegi, yo o sa tlhokomeleng mohumi bogolo go yo e leng motho fela; gonne bone botlhe ke tiro ya diatla tsa gagwe.

²⁰ Ba swa ka tshoganyetso gare ga bosigo; morafe o rerege o nyelele; yo o thata a tlosiwe e se ka seatla.

²¹ Gonne matlho a ona a lebile ditsela tsa motho; o bona dikgato tsotlhe tsa gagwe.

²² Ga go na lefifi le e seng bontsho jo bo kwenneng kwa badiradibe ba ka iphitlhang teng.

²³ Gonne Modimo ga o tlhole o sekaseka molato wa motho, fa a ya kwa go ona mo tshekong.

²⁴ O pšhwetlakanya ba ba thata kwa ntle ga tsheko; o emisa ba bangwe mo boemong jwa bone.

²⁵ Ke ka moo ke reng: O itse ditiro tsa bone; o ba ribegetsa bosigo, mme ba silakanngwe.

²⁶ Ka e le baikepi o ba otla mo felong fa go bonang botlhe.

²⁷ Ke ka gonne ba ikepile mo go ona; mme ba se ka ba tlhokomela ditsela dipe tsa ona;

²⁸ e le go fitlhisa selelo sa yo mmotlana kwa go ona gore ona o utlwe go goa ga ba ba bogisegang.

²⁹ Jaanong fa ona o ikhutsisa batho, ke mang yo o ka o bonang molato? Fa o fitlha sefatlhego, ke mang yo o ka o bonang? Gonne o okametse setšhaba le batho botlhe

³⁰ gore go se ka ga busa motho yo o pelompe yo o isang morafe mo tatlhegong.

³¹ Jaanong fa motho a ka raya Modimo a re: ‘Ke ikgodisitse, ga nkitla ke senya gape;

³² ke bona jalo, nthute; fa ke dirile ka tshiamololo ke tla baka.’

³³ A ò a re, ona o busolose ka fa go ratang wena? Kana o nyaditse ditsela tsa ona. Ke wena o tshwanetseng go bolela tse di phalang tsa ona, e seng nna. Bolela tse o di itseng!

³⁴ Banna ba ba nang le tlhaloganyo le batlhalefi ba ba ntheetsang ba tla nthaya ba re:

³⁵ ‘Jobe o buile a se na kitso; mafoko a gagwe ga a na botlhale.’

³⁶ Ao! A Jobe a nne a lekwe go ya go ile ka a fetola jaaka batho ba ba bosula.

³⁷ Gonne o oketsa boleo jwa gagwe ka boikepo, o sotla mo gare ga rona; o ntsifatsa mafoko a gagwe a a ganetsang Modimo.”