Yobe 33 - Setswana 1970

¹ “Mme wena Jobe, a ko o utlwe dipuo tsa me; mafoko a me otlhe o a sekegele tsebe!

² A ko o bone, ke butse molomo; go bua loleme lwa me mo magalapeng.

³ Mafoko a me ke a boammaaruri jwa pelo; molomo wa me o tla bua kitso e e phepa.

⁴ Mowa wa Modimo o ntirile; Mowa wa Mong-wa-thata-yotlhe o a mphedisa.

⁵ Fa o ka kgona, o mphetole; ipaakanye o eme fa pele ga me!

⁶ Bona, ke tshwana le wena fa pele ga Modimo: Le nna ke ngathilwe mo letsopeng.

⁷ Bona, a go mpoifa go se ka ga go tshabisa; ga nkitla ke go imela ka kgatelelo ya me.

⁸ Fela o buile mo ditsebeng tsa me, ka utlwa lentswe le le buang mafoko le re:

⁹ ‘Ke itshekile, ga ke na boleo; ke nna yo o phepa, ga ke na molato.

¹⁰ Bonang, Modimo o bonye mabaka a go lwa le nna; o nkaya mmaba wa ona.

¹¹ Dinao tsa me o di bofeletse mo dikoteng; o tlhokometse ditsela tsa me tsotlhe.’

¹² Bona, ke a go fetola: Gona fao ga o mo nneteng, gonne Modimo o mogolo bogolo go motho.

¹³ Ke ka ntlha ya eng fa ò o lwantsha ò re: ‘Ga o arabe lefoko lepe la me.’

¹⁴ Gonne Modimo o bua gangwe le gape, mme motho ga a ele tlhoko:

¹⁵ O bua ka toro, ka pono bosigo, fa batho ba le borokong, fa ba robetse mo malaong.

¹⁶ Foo o thibolola batho ditsebe, o ba tlhagisa ka go ba tshosa,

¹⁷ gore o tlogedise motho ditiro tse di bosula, o latlhise monna boikgodiso;

¹⁸ gore o boloke mowa wa gagwe, a se ka a ya lebitleng, le bophelo jwa gagwe gore bo se ka jwa nyelela ka lerumo.

¹⁹ Le gona o a tle a otlwe ka botlhoko mo bolaong jwa gagwe le ka ntwa e e sa feleng mo marapong a gagwe.

²⁰ Bophelo jwa gagwe bo mo tentshe bogobe; mowa wa gagwe o tenwe ke dijo tse di monate.

²¹ Nama ya gagwe e ote e sa tlhole e bonwa; go bonale marapo a gagwe a a neng a bipegile.

²² Mowa wa gagwe o atamele lebitla, bophelo jwa gagwe bo atamele ba ba tlisang loso.

²³ Jaanong fa go na le moengele fa go ene, motsereganyi a le mongwe wa ba le sekete, gore a itsise motho tshwanelo ya gagwe,

²⁴ foo o tla mo tlhomogela pelo a re: ‘Mo golole a se ka a tsena mo lebitleng! Ke bonye serekololo sa bophelo jwa gagwe.’

²⁵ Foo nama ya gagwe e tla ntšhwafala, e tlala thata e ntšhwa; o tla boela malatsing a bošwa jwa gagwe.

²⁶ Fa a rapela Modimo, ona o tla mo itumelela, o mo lebisa sefatlhego sa ona ka tuduetso, o busetsa motho tshiamo ya gagwe.

²⁷ Ene o tla opelela batho a re: ‘Ke ne ke leofile, ka sokamisa tse di siameng, mme Modimo ga o a nkotla ka fa go ntebanyeng.

²⁸ O nthekolotse gore ke se ka ka tsena mo lebitleng; bophelo jwa me bo ka itumelela lesedi.’

²⁹ Bonang, Modimo o direla motho tsotlhe tseo gabedi le gararo,

³⁰ e le go mo thibela go ya lebitleng gore a sedimosediwe ka lesedi la bophelo.

³¹ Ela tlhoko, Jobe, o nkutlwelele! Didimala, ke tla bua!

³² Fa o na le mafoko, mphetole! Bua, gonne nka itumela, fa o le mo nneteng.

³³ Fa o se na phetolo, ntheetse! Didimala, mme ke tla go ruta botlhale.”