Yobe 32 - Setswana 1970

Elihu o simolola go bua

¹ Jaanong banna ba bararo bao ba khutla go fetola Jobe; gonne o ne a ikaya yo o siameng.

² Ke fa go galefa Elihu morwa Baragele wa kwa Busi wa losika lwa ga Rame; a tukela Jobe bogale ka a itshiamisa fa pele ga Modimo.

³ Le gona a galefela ditsala tse tharo tsa gagwe, ka gonne ba palelwa ke go fetola Jobe, mme ba mmona molato fela.

⁴ Ene Elihu o ne a iketlile bone ba ntse ba bua le Jobe; gonne ba ne ba le bagolo mo go ene, ba mo feta ka dinyaga.

⁵ Jaanong e rile Elihu a bona, fa go se na karabo mo melomong ya banna ba bararo bao, a tuka bogale.

⁶ Elihu morwa Baragele wa kwa Busi a fetola a re: “Nna ke sa le mošwa, lona lo ba bagolo lo mpheta ka dinyaga; ka moo ke ne ke itshwere, ka boifa go lo bolelela tse ke di itseng.

⁷ Ka re: ‘A go bolele banna bagolo ba ba nang le malatsi! A ba bontsi jwa dinyaga ba itsise botlhale!’

⁸ Fela ke mowa o o mo bathong, ke Mowa wa Mong-wa-thata-yotlhe o o ba tlhalefisang.

⁹ Ba bagolo ga se bone ba ba botlhale; ba ba tsofetseng ga ba tlhaloganye tse di siameng.

¹⁰ Ke ka moo ke reng: Ntheetseng! Le nna ke bolele se ke se itseng.

¹¹ Bonang, ke emetse mafoko a lona, ka utlwelela dipuo tse di botlhale tsa lona, go fitlhelela lo bone mafoko a a siameng;

¹² ka nna ka lo ela tlhoko, ka fitlhela go se na yo o fenyang Jobe; go se na ope mo go lona yo o fetolang mafoko a gagwe.

¹³ Lo se ka lwa re: ‘Re fitlhetse botlhale mo go ene! Modimo o tla mo kgona, e seng motho.’

¹⁴ Ga a ka a bolela mafoko go lwa le nna; le gona ga nka ke ka mo fetola jaaka go buile lona.

¹⁵ Ba nyemile moko; ga ba tlhole ba araba. Ba feletswe ke mafoko.

¹⁶ A nka leta, fa ba sa bue ba eme fela, ba sa tlhole ba araba?

¹⁷ Nnyaya! Le nna ke tla araba tse ke di abetsweng; le nna ke tla bolela tse ke di itseng.

¹⁸ Gonne ke tletse mafoko; mowa o o mo teng ga me o a ntlhotlheletsa.

¹⁹ Bonang, mafatlha a me a tshwana le weine e e belang e e sa thibololwang; a phanyega jaaka makuka a mašwa.

²⁰ Ke na le go bua, gore ke hupologe mowa. Ke na le go bula molomo le go araba.

²¹ Ga nka ke ka goga le ope le e seng go kgatlha motho ka loleme.

²² Gonne ga ke itse go kgatlha motho ka loleme; Modiri wa me o ne a ka ntlosa ka bonako.